होशे 14 - नेवाः बाइबलइस्राएलयात होशेया इनाप 1 अय् इस्राएल, परमप्रभु थः परमेश्वरयाथाय् लिहां वा। छंगु पापं यानाः हे छ पतन जूगु दु। 2 थःगु पाप मानय् यानाः परमप्रभुयाथाय् लिहां वा। वय्कःयात धा, “जिमिगु दक्व पाप क्षमा यानादिसँ, जिमिगु प्रार्थना न्यनादिसँ, अले जिमिसं छितः प्रशंसाया बलि छाये। 3 अश्शूरं जिमित बचय् याये फइ मखु, जिपिं सल गयाः लडाइँ याः वने मखु। जिमिसं हाकनं गुबलें थःगु ल्हातं दय्कागु मूर्तियात ‘जिमि द्यःत’ धकाः धाये मखु, छाय्धाःसा छिपाखें मांबौ मदुपिन्त कृपा दइ।” इस्राएलया निंतिं न्हूगु जीवनया बचं 4 “जिमि थः मनूत मखुगु लँय् वंगुलिइ जिं इमित क्षमा यानाबी, जिं थःयत्थें इमित माया याये, आवंलि गुबलें इपिंनापं तंम्वय् मखु। 5 जि इस्राएलया निंतिं सुतिलः थें जुये। व लिली स्वां थें ह्वइ, अले लेबनानया देवदार सिमात थें वं हा काइ, 6 उकिया नकतिनि ह्वःगु मुखू थाहां वइ। उकिया गौरव जैतूनया सिमा थें जुइ, अले व लेबनानया देवदारुया सिमा थें बास्ना वइ। 7 जिमि मनूत हाकनं छकः जिगु किचलय् च्वनी। इपिं अन्नमा थें लहलह जुया वइ, इपिं दाखमा थें तःमा जुया वइ, इमिगु नां लेबनानया दाखमद्य थें बय्बय् जुइ। 8 अय् एफ्राइमया मनूत, मूर्तितनापं जिगु छुं हे ज्या मदु। जिं छिमिगु प्रार्थनाया लिसः बी अले छिमिगु सुसाःकुसाः याये। जि न्ह्याबलें वाउँसे च्वनीगु सल्लाया सिमा थें खः। जि हे छिमिगु आशिषया मूल खः।” 9 सु बुद्धिमान खः? वं थुपिं खँत थुइकेमाः, थुइकाकाये फुम्ह सु दु? वं थुपिं खँत सीकेमाः। परमप्रभुया लँपु थिक जू, धर्मीपिं मनूत व हे लँपुइ जुइ। तर पापीपिं मनूत उकी लुफिं हानाः क्वदइ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.