एज्रा 5 - नेवाः बाइबलदेगः दय्केगु ज्या हाकनं शुरु याःगु 1 उबलय् अगमवक्ता हाग्गै व इद्दोया सन्तान जकरिया अगमवक्तां यरूशलेम व यहूदायापिं यहूदीतय्त, इमित अधिकार यानादीम्ह इस्राएलयाम्ह परमेश्वरया नामय् अगमवाणी यात। 2 इमिगु खँ न्यनाः शालतिएलया काय् यरूबाबेल व योसादाकया काय् येशूअं यरूशलेमय् परमेश्वरयागु देगः दय्केगु ज्या हाकनं शुरु यात। परमेश्वरया अगमवक्तातय्सं नं इपिंनापं च्वनाः इमित ग्वाहालि यात। 3 उगु हे इलय् पच्छिम यूफ्रेटिसया प्रदेशयाम्ह राज्यपाल तत्तनै, शत्तर-बोज्नै व इपिंनापं ज्या याइपिं इमिथाय् वयाः थथे धाल, “सुनां छिमित थ्व देगः दय्केगु व थुकियात माःगु सामान ज्वरय् यायेगु अधिकार बिल?” 4 इमिसं इमिके देगलय् ज्या यानाच्वंपिं मनूतय्गु नां नं न्यन। 5 अय्नं यहूदी नायःतय्त परमेश्वरं बिचाः यानाच्वनादीगुलिं दारायाथाय् थ्व बुखँ थ्यनाः उकियागु लिसलय् जुजुया पौ मवतले सुनानं इमित पने मफुत। दारा जुजुयात तत्तनैया पौ 6 पच्छिम यूफ्रेटिसया प्रदेशयाम्ह राज्यपाल तत्तनै, शत्तर-बोज्नै व इपिंनापं ज्या याइपिं यूफ्रेटिसया पच्छिमयापिं हाकिमतय्सं दारा जुजुयात छ्वःगु पौ थ्व हे खः। 7 इमिसं थथे च्वयातःगु पौ छ्वल – महाराज दाराया ज्वजलपा! 8 महाराज, जिपिं यहूदा जिल्लाय् तःधंम्ह परमेश्वरया देगः दुगु थासय् वना। अन मनूतय्सं तःधंम्ह परमेश्वरया देगः ततःग्वःगु ल्वहँतं दनाच्वंगु दु। अले पःखालय् ततःहाकःगु सिँ तयाच्वंगु दु। ज्या बांलाक जुयाच्वंगु दु अले इमिसं याकनं याकनं ज्या यानाच्वंगु दु। 9 “सुनां छिमित देगः हाकनं दय्केगु व उकियागु सामान ज्वरय् यायेगु अधिकार बिल धकाः जिमिसं मनूतय् नायःतय्त न्यना।” 10 च्वयाः छिथाय् छ्वयाहयेत जिमिसं इमि नायःतय्गु नां नं न्यना। 11 इमिसं जिमित थथे लिसः बिल, “जिपिं स्वर्ग व पृथ्वीयाम्ह परमेश्वरयात सेवा याइपिं खः। यक्व दँ न्ह्यः इस्राएलयाम्ह छम्ह तःधंम्ह जुजुं दय्कूगु देगः हे जिमिसं हाकनं दय्का च्वनागु खः। 12 अय्नं जिमि पुर्खातय्सं स्वर्गयाम्ह परमेश्वरयात तंचाय्कूगुलिं वय्कलं जिमि पुर्खातय्त बेबिलोनयाम्ह कल्दी जुजु नबूकदनेसरया ल्हातय् बियादिल। नबूकदनेसरं थ्व देगःयात भज्यंक स्यंकाबिल अले मनूतय्त बेबिलोनय् ज्वना यंकल। 13 “अथेसां बेबिलोनयाम्ह जुजु कोरेसया न्हापांगु दँय् जुजुं परमेश्वरया थ्व देगः हाकनं दय्केत आज्ञा बिल। 14 नबूकदनेसरं यरूशलेमया देगलं बेबिलोनया देगलय् हःगु परमेश्वरया देगःयागु लुँ व वहःयागु थलबल नं थम्हं राज्यपाल ल्ययातःम्ह शेशबस्सर नांयाम्ह मनूयात लित बिल। 15 अले वं वयात धाल, ‘थ्व फुक्क थलबल यंकाः यरूशलेमया देगलय् हाकनं तयाब्यु अले परमेश्वरयागु देगः न्हापायागु हे थासय् हाकनं दय्कि।’ 16 “उकिं शेशबस्सरं यरूशलेमय् वयाः परमेश्वरयागु देगःया जग तल। उबलय् निसें आः तक देगः दय्केगु ज्या जुयाच्वंगु दु तर आः तक सिधःगु मदुनि।” 17 अथे जुयाः महाराज! छिगु इच्छा दुसा जुजु कोरेसं थ्व यरूशलेमयागु देगः हाकनं दय्केत उजं ब्यूगु खः कि मखु धकाः बेबिलोनय् दुगु जुजुया सफूधुकुतिइ मालादिसँ। अनंलि महाराजया इच्छा छु खः व जिमित च्वयाः हयादिसँ। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.