एज्रा 4 - नेवाः बाइबलदेगः दय्केगु ज्याय् विरोध 1 ज्वनायंकूपिं लिहां वयाः परमप्रभु इस्राएलया परमेश्वरया देगः दय्काच्वंगु दु धयागु खँ यहूदा व बेन्यामीन कुलया शत्रुतय्सं न्यन। 2 उकिं इमिसं यरूबाबेल व परिवार परिवारया नायःतथाय् वनाः धाल, “जिमित नं छिपिंनापं देगः दय्केब्यु छाय्धाःसा जिपिं नं छिमि परमेश्वरयात आराधना याइपिं खः। जिमित थन हःम्ह अश्शूरया जुजु एसरहदोनया पालंनिसें हे जिमिसं वय्कःयात हे बां बियावयाच्वनागु दु।” 3 यरूबाबेल, येशूअ व इस्राएलया परिवारया मेपिं सकल नायःतय्सं धाःसा इमित थथे लिसः बिल, “परमप्रभु जिमि परमेश्वरया निंतिं दय्का च्वनागु थ्व देगःलिसे छिमिगु छुं नं स्वापु मदु, फारसयाम्ह जुजु कोरेसं जिमित आज्ञा ब्यू थें देगः जिमिसं हे दय्के।” 4 अनंलि व थासय् च्वनाच्वंपिं मनूतय्सं यहूदीतय्गु नुगः क्वतुंकाबीत व देगः दय्केगु ज्या पनेत ख्यायेगु याना हल। 5 यहूदीतय्गु योजना स्यंकाबीत इमिसं फारसया सरकारी हाकिमतय्त घुस नकल। फारसयाम्ह जुजु कोरेस जुजुया जिवंकाछि व फारसयाम्ह जुजु दाराया पालय् तक इमिसं अथे याना हे च्वन। अहासूरस व अर्तासास्त जुजु जुयाच्वंबलय् विरोध 6 अहासूरस जुजुं शासन याःगु शुरुया इलय् यहूदा व यरूशलेमय् च्वंपिं मनूतय्गु विरोधय् इमि शत्रुतय्सं छगू द्वपं पौ च्वयाः छ्वत। 7 हाकनं फारसयाम्ह जुजु अर्तासास्तया पालय् विश्लाम, मित्रेता, ताबेल व इपिंनापं ज्या याइपिन्सं जुजुयात छगू पौ च्वल। पौ आरमेइक भाषाय् व आरमेइक आखलं च्वःगु खः। 8 राज्यपाल रेहूम व प्रदेशयाम्ह छ्यान्जे शिम्शैनं नं यरूशलेमया विरोधय् थज्याःगु पौ अर्तासास्तयात च्वल। 9 राज्यपाल रेहूम व प्रदेशयाम्ह छ्यान्जे शिम्शै, इपिंनापं ज्या याइपिं अर्थात त्रीपोलीस, फारस, एरेक व बेबिलोनयापिं मनूतय्त अधिकार याइपिं न्यायाधीशत व हाकिमत अले शूशनयापिं एलामीत व 10 तःधंम्ह व हनाबना बहःम्ह अशूरवनिपलं देशं पितछ्वयाः सामरिया शहरय् व पच्छिम यूफ्रेटिस प्रदेशया मेमेगु थासय् हयातःपिं, 11 इमिसं छ्वगु पतिइ थथे धकाः च्वयातःगु दु – महाराज अर्तासास्तयात छःपिनि दास, यूफ्रेटिस पारियापिं मनूतपाखें ज्वजलपा, 12 “छःपिनिगु राज्ययागु थीथी थासं वःपिं यहूदीत यरूशलेमय् च्वनाच्वंगु अले व दुष्ट व विद्रोही शहरयात हाकनं दय्काच्वंगु खँ महाराजं सीकादिसँ। अले इमिसं उकियागु जग ल्ह्वनाः पखाः दय्काच्वंगु दु धयागु खँ सीकादिसँ। 13 महाराज, थ्व शहर हाकनं दय्कल धाःसा अले थुकिया पखाः दय्केगु ज्या सिधल धाःसा मनूतय्सं कर पुली मखु अले महाराजया धुकुतिइ धिबा कम जुइ। 14 “छःपिन्सं जिमिगु लागि यक्व गुण यानादीगुलिं सकसिनं छःपिन्त हनाबना तःगु जिमित यः। अथे जुयाः छःपिनि न्ह्यःयापिं जुजुपिन्सं तयातःगु पुलांगु भ्वँतय् मालास्वयादिसँ धकाः थ्व खबर छ्वया हयाच्वनागु दु। 15 पुलांगु भ्वँतय् माला स्वल धाःसा थ्व यरूशलेम शहर छगू विद्रोही शहर जूगु व पुलांगु इलंनिसें हे जुजुपिं व प्रदेशयापिं शासकतय्त दुःख बियावयाच्वंगु खँ छःपिन्सं सीकादी। अथे जुयाः हे थ्व शहरयात नाश याःगु खः। 16 यरूशलेम शहर हाकनं दय्कल धाःसा अले थुकिया पखाः दनेगु ज्या सिधल धाःसा यूफ्रेटिसया पच्छिमया प्रदेशय् छःपिनिगु छुं अधिकार दइ मखु धकाः महाराजं सीकादिसँ।” पखाः दय्केगु ज्या दिकूगु 17 जुजु अर्तासास्तं थथे लिसः बिल, राज्यपाल रेहूम, प्रदेशयाम्ह छ्यान्जे शिम्शै अले सामरिया व पच्छिम यूफ्रेटिसयागु प्रदेशया मेगु ल्यंदनिगु इलाकाय् च्वंपिं इमिनापं ज्या याइपिन्त ज्वजलपा। 18 छिमिसं छ्वयाहःगु पौ भाय् हिलाः जितः ब्वना न्यंकल। 19 जिं मालास्वयेत आज्ञा बिया, पुलांगु इलंनिसें हे यरूशलेमं जुजुया अधिकारया विरोधय् राजद्रोह याःगु व अन गोलमाल व राजद्रोह जुया वयाच्वंगु खँ सीदत। 20 बल्लाःपिं जुजुपिन्सं अन यूफ्रेटिस पच्छिमया प्रदेश न्यंक राज्य याःगु दु। अनयापिं मनूतय्के सरकारी कर काःगु दु। 21 उकिं जिं हानं मेगु आज्ञा मब्युतले थुपिं मनूतय्त शहर दय्केगु ज्या दिकेत आज्ञा ब्यु। 22 थ्व ज्या यायेत लिबाके मते। जुजुपिन्त स्यंकीगु ज्या मजुइमाः। 23 जुजु अर्तासास्तयागु थ्व पौ रेहूम व छ्यान्जे शिम्शै व इपिंनापं ज्या याइपिं मनूतय्गु न्ह्यःने ब्वनाः न्यंके धुंकाः इपिं याकनं यरूशलेमया यहूदीतय्थाय् वन अले इमित जबरजस्ती ज्या यायेत पन। 24 थुकथं यरूशलेमय् परमप्रभुयागु देगःया ज्या दित। फारसया जुजु दारां राज्य याःगु निगूगु दँ तक व ज्या दित। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.