इजकिएल 41 - नेवाः बाइबल1 अले वं जितः दुने पवित्र थासय् हल। अले उकिया लुखायाखसित नापे यात। उपिं खुसिया निखेंपाखेया ब्या ३.२ मिटर ३.२ मिटर दु। 2 लुखाया ब्या ५.३ मिटर दु। लुखाखसिया निखेंपाखेया अंगया ब्या २.७ मिटर २.७ मिटर दु। वं पवित्रथाय् नापे यात। व २१ मिटर ताहाकः अले ११ मिटर तब्या। 3 अले व महा-पवित्र थासय् दुने दुहां वनाः लुखायाखसित नापे यात। छपु छपु थां १-१ मिटर तब्या। लुखा ३.२ मिटर तब्या। लुखाया निखेपाखेंया अंगःत ३.७ मिटर ३.७ मिटर तब्या। 4 अले वं दुनेया महा-पवित्रगु थाय्या हाकः व ब्या नापे यात, व ११ मिटर ११ मिटर दु। अले वं जितः धाल, “थ्व महा-पवित्रगु थाय् खः।” देगःया पःखाःनापं स्वाःगु क्वथात 5 अले वं देगःया अंगः नापे यात। व ३.२ मिटर तःफि। अले स्वखेपाखे स्वानाच्वंगु क्वथातय्गु ब्या २.१ मिटर २.१ मिटर दु। 6 उपिं क्वथात स्वतँ जाः। उपिं छगू छगू तँय स्विगू स्विगू क्वथात दु। देगःया प्यखें पाखेयागु अंगलय् उपिं क्वथातय्गु निंतिं लिधंसात दय्कातःगु दु, गुकें यानाः उपिं लिधंसात देगःया अंगलय् दुहां मवनेमा। 7 देगःया स्वखेपाखेया क्वथात गुलि गुलि थाहां वंगु दु उलि उलि तब्या जुयावंगु दु। देगःयात घेरय् यानातःगु क्वथात छगू तँया च्वय् मेगु तँय थपय् जुयावंगु दु। थुकथं क्वथात छगुलिं मेगुया द्यःने वंबलय् झन तब्या जुल। दकलय् क्वय्यागु तंनिसें दकलय् च्वय्यागु तँ तक दथुइया तँ जुयाः वनीगु स्वाने दु। 8 अनंलि देगःया प्यखेंपाखे थकयातःगु छगू लिधंसा खना, गुगु क्वथातय्गु जग जुल। व ३.२ मिटर ताहाकः। 9 उपिं क्वथातय्गु पिनेया अंगः २.७ मिटर तःफि। देगःया उपिं क्वथात 10 व पुजाहारीतय्गु क्वथातय्गु दथुइया खुला थाय् देगःया प्यखेरं ११ मिटर दु। 11 खुला थासं उपिं क्वथाय् वनीगु निइगू लुखात दु, छगू उत्तरपाखे स्वःगु व मेगु धाःसा दच्छिनपाखे स्वःगु दु। उगु खुला थाय्या लिक्कया लिधंसा प्यखेरं २.७ मिटर तब्या। पच्छिमपाखेया छेँ 12 देगःया चुकपाखे स्वःगु पच्छिमपाखेया छेँ ३७ मिटर तब्या। उगु छेँया अंगः प्यखेंपाखे २.७ मिटर तःफि। व ४८ मिटर ताहाक। देगःयागु मुक्कं नाप 13 अले वं देगः नापे यात। व ५३ मिटर ताहाक। देगःया चुक व व छेँनं उकिया अंगःतनापं ५३ मिटर ताहाकः। 14 देगःया पुर्बपाखेया चुक नं, देगःया न्ह्यःनेयागु कुन्चानापं ५३ मिटर ताहाकः। 15 अले वं देगःया ल्यूनेयागु चुकपाखे स्वःगु छेँ अले उकियागु फुक्क अंगलय् दय्कातःगु छखे छखेपाखेया बार्दलीत नापे यात। उकिया हाकः ५३ मिटर दु। चुकपाखे स्वःगु दलान, पवित्रगु थाय् व महा-पवित्रगु थाय्, देगःयागु पूरा खँ 16 अले उपिं स्वंगूयागु हे प्यखेरं दुगु लुखाखलुइ, चिब्यागु ग्वाखंत व बार्दलीत, लुखाखलुया दुने व पिनेया फुक्क ज्वलं, सिं हिनातःगु दु। 17 महा-पवित्रगु थासय् दुहां वनेगु लुखाया च्वय्यागु खालि थासय् व तच्वकं पवित्रथाय् व पवित्रगु थाय्या अंगःया प्यखें, 18 कियातःपिं करूबतय् दथुइ दथुइ कियातःगु ताय्गःमा दु। छम्ह छम्ह करूबया निपा निपा ख्वाःपाः दु। 19 छपा धाःसा मनूया ख्वाः थें छखेपाखेयागु ताय्गःमापाखे स्वःगु, अले मेगु धाःसा सिंहयागु ख्वाः थें मेखेपाखेयागु ताय्गःमापाखे स्वःगु दु। फुक्क देगःया प्यखेरं उपिं थथे हे कियातःगु दु। 20 करूब व ताय्गःमा बंनिसें पवित्र थासय् दुहां वनीगु ध्वाखाया च्वय् तक पवित्र थाय्या फुक्क अंगलय् कियाः दय्कातःगु दु। 21 पवित्र थाय्या लुखाया चौकोस पेकूंलाः। अले तच्वकं पवित्रगु थाय्या न्ह्यःनेया लुखाया चौकोस नं न्हापायागु थें च्वं। 22 अन १.६ मिटर तज्जाःगु व छखे छखेपाखेयागु ब्या १ मिटर दुगु छगू सिँया वेदी दु। उकिया कुंत, उकिया लिधंसा व पाटात सिँयागु हे दु। उम्ह मनुखं जितः धाल, “थ्व परमप्रभुया न्ह्यःने तयातःगु टेबिल खः।” देगःया निगू लुखा 23 पवित्रथाय् व तच्वकं पवित्रगु थासय् निगू निगू लुखा दु। 24 छगू छगू लुखाया निंतिं चाहिके ज्यूगु निपा निपा खापा दु, अर्थात निपा खापा छगू लुखाया निंतिं, निपा खापा मेगु लुखाया निंतिं। 25 पिनेया पवित्र थाय्या लुखा लुखाय् अंगलय् कियातःगु थें हे करूबत व ताय्गःमात कियातःगु दु। दलानया न्ह्यःने सिँयागु कार्नेस दय्कातःगु दु। 26 दलानया अंगलय् चिब्यागु ग्वाखंया निखेंपाखे ताय्गःमात कियातःगु दु। देगःया प्यखेरं च्वंगु क्वथाय् नं यग्गानाच्वंगु कार्नेसत दु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.