इजकिएल 34 - नेवाः बाइबलइस्राएलया फैजवाःत 1 परमप्रभुयागु थ्व वचन जिथाय् वल, 2 “अय् सीमानिम्ह मनू, इस्राएलया फैजवाःतय्गु विरोधय् अगमवाणी यानाः उपिं फैजवाःतय्त थथे धा! ‘परमप्रभु परमेश्वरं थथे धयादी – धिक्कार दु, थःगु जक वास्ता याइपिं इस्राएलया फैजवाःतय्त। छु! फैजवाःतय्सं फैच्वलय्तय्गु जक वास्ता यायेमाःगु, मखु ला? 3 छिमिसं धौ नइगु, ऊनया वसः फीगु, ल्ह्वंल्ह्वंपिं पशुत स्याइगु, बथांयात धाःसा वास्ता हे मयाः। 4 छिमिसं बमलाःपिन्त बल्लाकूगु मदु, बिरामीतय्त लाय्कूगु मदु, घाःपाः जूपिन्त मलम बुलाः पट्टी तयाब्यूगु मदु। छिमिसं लँ द्वंकुपिन्त खःगु लँय् हःगु मदु, तनाच्वंपिन्त माःगु मदु। छिमिसं इमित बल व जबरजस्तिं शासन याःगु दु। 5 अथे जुयाः फैजवाः मदुगुलिं इपिं छ्यालब्याल जुल, इपिं फुक्क गुँपशुया आहार जुल। 6 जिम्ह फैत लँ द्वंकाः पहाड पहाडय् व ततःजाःगु डाँडाय् वन। इपिं पृथ्वीया फुक्क थासय् छ्यालब्याल जुल। सुनानं इमित वास्ता मयाः, सुनानं इमित माःमवं। 7 “‘उकिं हे फैजवाःत, जि, परमप्रभुया वचन न्यँ! 8 जि, परमप्रभु परमेश्वर न्ववानागु दु, गथे जि धात्थें म्वाःम्ह खः, फैजवाः मदुगुलिं जिगु बथांयात लुतय् याःगु दु, गुँपशुया आहारा जूगु दु। छाय्धाःसा जिम्ह फैजवाःतय्सं जिगु बथांयात माःमवं, फैतय्त वास्ता मयासें थःगु हे जक वास्ता यात। 9 उकिं, हे फैजवाःत, जि, परमप्रभुयागु वचन न्यँ! 10 जि, परमप्रभु परमेश्वर थथे न्ववानागु दु – जि फैजवाःतय्गु विरोधय् दु। जिं इमिके थःगु बथांया ल्याःचाः काये। जिं उपिं फैजवाःतय्त बथांयात नकेगु ज्यापाखें लिकयाबी, इमिसं हाकनं थथःगु प्वाः जाय्के खनी मखु। जिं छिमिगु म्हुतुं जिगु बथांयात बचय् याये, अले जिम्ह फैत इमिगु निंतिं आहारा जुइ मखु।’” भिंम्ह फैजवाः 11 “‘परमप्रभु परमेश्वरं थथे धयादी – आः जिं थःम्हं हे जिम्ह फैतय्त मालाः इमित स्वये। 12 गथे थःगु बथां थुखे उखे छ्यालब्याल जुइबलय् फैजवालं फैच्वलय्तय्त माःवनी, अथे हे जिं जिम्ह फैतय्त माले। सुपाँय् व तसकं खिउँगु दिनय् छ्यालब्याल जूगु फुक्क थासं जिं इमित बचय् याये। 13 जिं इमित जाति जातिया थासं लिगना हये, अले देश देशं मुंके। जिं इमित इमिगु थःगु हे देशय् हये, जिं इमित इस्राएलया पहाड पहाडय् उकिया खुसिचा खुसिचाय् व देशयागु फुक्क बस्तीइ ज्वये। 14 जिं इमित बांलाःगु घाँय्ख्यलय् ज्वये। इस्राएलया ततःजाःगु पहाडत इमिगु ज्वयेगु थाय् जुइ। अन इपिं भिंगु ख्यलय् ग्वार्तुलाच्वनी। इस्राएलया पहाड पहाडय् भिंगु ख्यलय् इपिं ज्वये खनी। 15 जिं थःम्हं हे जिम्ह फैत स्वये, अले इमित अन थ्यने, परमप्रभु परमेश्वरं धयादी। 16 तंपिन्त जिं माले, लँ द्वंकुपिन्त जिं लुइकाः हये। घाःपाः जूपिन्त मलम तयाः पट्टी चिनाबी, बमलाःपिन्त बल्लाकाबी। तर ल्ह्वंपिं व बल्लाःपिन्त जिं नाश यानाबी। खःकथं बथां स्वइम्ह फैजवाः जि जुइ। 17 “‘हे जिगु बथां, छिमित धाःसा परमप्रभु परमेश्वरं धयादी – जिं छम्ह फै व मेम्ह फैया दथुइ, अले मिजंपिं फैतय्गु व दुगुतय्गु दथुइ न्याय याये। 18 भिंगु ख्यलय् ज्वये दयाः नं छिमित मगात ला? छु छिमिसं ल्यं दुगु घाँय्ख्यःयात तुतिं न्हुइमाः ला? छु सफा लखं छिमित मगात ला? छाय् छिमिसं मेगु लःयात तुतिं ध्याचः हे ध्याचः यानागु? 19 छु! जिगु बथानं छिमिसं तुतिं न्हूगु घाँय् नयेगु ला, अले छिमिगु तुतिं ध्याचः हे ध्याचः याःगु लः त्वनेगु ला? 20 “‘उकिं जि परमप्रभु परमेश्वरं इमित थथे धाये – स्व! जिं थःम्हं हे ल्ह्वंपिं ल्ह्वंपिं व गंसि गंसिपिं फैतय्गु दथुइ न्याय याये। 21 छाय्धाःसा छिमिसं ला गंसिपिं फैतय्त ब्वहलं घ्वाघ्वां, नेकुलिं च्वच्वं, इमित लिनाच्वंगु दु, छ्यालब्याल यानाच्वंगु दु। 22 जिं जिगु छ्यालब्याल जूगु बथांयात बचय् याये, इमित हाकनं गुबलें लुतय् याइ मखु। जिं छम्ह फै व मेम्ह फैया दथुइ न्याय याये। 23 जिं इमि छम्ह हे जक फैजवाः जुइत जिम्ह दास दाऊदयात ल्यये। वं इमित स्वइ, व इमि फैजवाः जुइ। 24 जि, परमप्रभु छिमि परमेश्वर जुइ, जिम्ह दास दाऊद इमिगु दथुइ शासक जुइ। जि परमप्रभुं थ्व धयागु खः।’” परमप्रभुया शान्ति व सुरक्षाया बाचा 25 “‘जिं इपिंलिसें शान्ति व सुरक्षाया बाचा ची, अले इपिं ढुक्क जुयाः मरुभूमिइ च्वनेदयेमा व गुँइ द्येने दयेमा धकाः गुँपशुतय्त देशं पितिना छ्वयाबी। 26 जिं इमित व जिगु डाँडाया प्यखेरं च्वंगु थाय्यात आशिष दय्काबी। जिं खःगु इलय् इमिगु निंतिं वा वय्काबी। जिं आकाशं वइगु वायात आशिष यानाबी। 27 ख्यलय् दुगु सिमातय्सं फलफुल बी, जमिनं थःगु बाली बी, मनूत देशय् सुरक्षित जुइ। इमिगु जुवाया सिँ त्वधुलाः इमित दास दय्कूपिंपाखें त्वःतकीबलय् जि हे परमप्रभु खः धकाः इमिसं सी। 28 इमित जाति जातितय्सं हाकनं लुटपाट याइ मखु, न गुँपशुतय्सं इमित नइ, इपिं याउँक च्वनी, अले इमित सुनानं ख्याइ मखु। 29 जिं इमित अन्नया निंतिं नां जाइगु देश बी। उगु देशय् इपिं हाकनं गुबलें नये मखना सी मखु। इमित हाकनं जाति जातितय्सं हेस्याइ मखु। 30 अबलय् जि परमप्रभु इमि परमेश्वर इपिंनापं दु व अले इस्राएलया मनूत जिमि प्रजा खः धकाः इमिसं सी, जि, परमप्रभु परमेश्वर न्ववानागु दु। 31 “‘छिपिं जिम्ह फैत खः, जिगु ख्यःयापिं फैत, जिम्ह हे मनूत खः, जि छिमि परमेश्वर खः, परमप्रभु परमेश्वरं धयादी।’” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.