इजकिएल 30 - नेवाः बाइबलमिश्र देशया निंतिं नुगः मछिंकूगु 1 परमप्रभुयागु थ्व वचन जिथाय् वल, 2 “अय् सीमानिम्ह मनू, थ्व अगमवाणी ल्हानाः थथे धा, ‘परमप्रभु परमेश्वरं थथे धयादी, “‘ख्वःसलं थथे धा, “हाय! व दिं!” 3 छाय्धाःसा व दिं लिक्क हे दु, व सुपाँय्या दिं जुइ, व जाति जातिया लागि नाशया दिं जुइ। 4 मिश्र देशय् लडाइँ जुइ, कूश देशय् नं संकट वइ। स्याःपिं मनूत मिश्र देशय् क्वःदलीबलय् उकिया धन-सम्पत्ति यंकीगु जुइ। उकिया जग थुनाबीगु जुइ। 5 “‘कूश, पूत, लूद व सारा अरब देश, कूब व बाचा चिनातःगु देशयापिं मनूतय्त मिश्र देशयापिं मनूतनापं तरवारं स्याइ। 6 “‘परमप्रभुं थथे धयादी, “‘मिश्र देशनापं मिलय् जूपिं पतन जुइ, मिश्रीतय्सं घमण्ड याइगु शक्ति पतन जुइ। वया उत्तरय् मिग्दोलंनिसें दच्छिनय् आश्वान तक च्वंपिं मनूतय्त तरवारं स्याइ।’” जि, परमप्रभु परमेश्वर न्ववानागु दु। 7 “‘व देश संसारय् दकलय् झिजांमिजां दंगु देश जुइ। उकिया शहरत भज्यंक नाश जूगु शहरतय्गु दथुइ लानाच्वनी। 8 जिं मिश्र देशय् मि तयाबीबलय् अले वयात ग्वाहालि बीपिं फुक्क चुंचुं जुइबलय् इमिसं जि हे परमप्रभु खः धकाः सी। 9 “‘उखुन्हु याउँक च्वनाच्वंपिं कूशीतय्त ख्याइगु खबर बीत जिगु न्ह्यःनं दूतत नांचाय् च्वनाः पिहांवनी। मिश्र देश नाश जुइगु दिनय् इपिं ग्याइ, छाय्धाःसा व दिं धात्थें हे वइ। 10 “‘परमप्रभु परमेश्वरं थथे धयादी – “‘जिं बेबिलोनयाम्ह जुजु नबूकदनेसरया ल्हातं मिश्र देशया सेनायात नाश यानाबी। 11 व अले वया तसकं दयामदुपिं मनूत व देशयात तहसनहस यायेत हइगु जुइ। इमिसं मिश्रया विरोधय् तरवार सालाः देशयात स्याःपिं मनूतय्गु सीम्हं जाय्काबी। 12 जिं नील खुसिया लः गंकाबी अले व देशयात दुष्ट मनूतय्गु ल्हातय् मियाबी। व देश व उकी दुगु फुक्कयात जिं विदेशीतय्गु ल्हातं तहसनहस यानाबी। जि परमप्रभुं थ्व खँ धयागु खः। 13 “‘परमप्रभु परमेश्वरं थथे धयादी – “‘जिं मूर्तितय्त नाश यानाबी। नोपय् दुगु झ्वातात मदय्काबी। मिश्र देशय् हाकनं गुबलें शासक दइ मखु, थुकथं जिं थ्व देशय् आतंक थ्यंकाबी। 14 दच्छिन मिश्रयात जिं तहसनहस यानाबी, सोअनय् मि तयाबी, थेबेस शहरयात जिं सजाँय बी। 15 जिं मिश्र देशया बल्लाःगु किल्ला दुगु शहर पेलुसियमयाके जिगु तं प्वंके, अले थेबेस शहरया सेनायात नाश यानाबी। 16 जिं मिश्र देशय् मि तयाबी, अले पेलुसियम स्याः चायाः वाथा वाथा कनी। थेबेस शहरया पःखाःया छुं भाग दुनी, नोप धाःसा मदिक्क आपतय् लानाच्वनी। 17 हेलीओपोलिस व बुबास्तीसयापिं ल्याय्म्हपिन्त तरवारं स्याइ, अले फुक्क शहरयात ज्वना यंकी। 18 तहपनेसय् जिं मिश्रीतय्गु जुवा त्वथुलाबीबलय् अन न्हिनय् हे खिउँसे च्वनी, वं घमण्ड याइगु वयागु शक्तिया नाश जुइ। वयात सुपाँचं त्वपुइ, वया गांतय्त ज्वना यंकी। 19 थुकथं जिं मिश्र देशयात सजाँय बी, अले इमिसं जि हे परमप्रभु खः धकाः सी।’” फारोया लप्पा त्वःथुलाब्यूगु 20 झिंछगूगु दँया न्हापांगु लाया न्हय्न्हु दुखुन्हु परमप्रभुयागु थ्व वचन जिथाय् वल, 21 “अय् सीमानिम्ह मनू, जिं मिश्र देशयाम्ह जुजु फारोया लप्पा त्वथुलाबियागु दु। हाकनं तरवार चले याये फयेमा धकाः थुकियात पट्टी चिनाब्यूगु मदु थुकियात लंकेत मलम पट्टी नं तःगु मदु। 22 उकिं परमप्रभु परमेश्वरं थथे धयादी – जि मिश्र देशयाम्ह जुजु फारोया विरोधय् दु। जिं वयागु त्वमधूगु व त्वधूगु निपुं हे लप्पा त्वथुलाबी, अले जिं वयागु तरवार वयागु ल्हातं कुर्काबी। 23 जिं मिश्रीतय्त जाति जातितय्गु दथुइ छ्यालब्याल यानाबी, अले इमित देश देशय् थुखेलाः उखेलाः यानाबी। 24 जिं बेबिलोनयाम्ह जुजुया ल्हाःयात बल्लाकाः जिगु तरवार वयागु ल्हातय् बी। तर जिं फारोया लप्पा त्वथुलाबी, व धाःसा वयागु न्ह्यःने सी थें च्वंक घाःपाः जूम्ह मनू थें हाली। 25 जिं मिश्र देशयाम्ह जुजुयात कमजोर यानाबी, बेबिलोनयाम्ह जुजुयात बल्लाकाबी। जिं जिगु तरवार बेबिलोनयाम्ह जुजुया ल्हातय् बीबलय्, वं व तरवार मिश्र देशया विरोधय् चले याइबलय् इमिसं जि हे परमप्रभु खः धकाः म्हसी। 26 जिं मिश्रीतय्त जाति जातितय्गु दथुइ छ्यालब्याल यानाबी अले देश देशय् थुखेलाः उखेलाः यानाबी। अले इमिसं जि हे परमप्रभु खः धकाः सी।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.