इजकिएल 3 - नेवाः बाइबल1 अले वय्कलं जितः धयादिल, “अय् सीमानिम्ह मनू, छंगु न्ह्यःने दुगु थ्व भ्वंथू न! अले वनाः इस्राएलया घरानायात धा।” 2 उकिं जिं थःगु म्हुतु चाय्का, अले वय्कलं जितः भ्वंथू नयेत बियादिल। 3 अनंलि वय्कलं जितः धयादिल, “अय् सीमानिम्ह मनू, जिं छन्त बियागु थ्व भ्वंथू न, थुकिं छंगु प्वाः जाय्की!” उकिं जिं व भ्वंथू नया, व जिगु म्हुतुइ कस्ति थें चाकुसे च्वन। 4 अले वय्कलं जितः धयादिल, “अय् सीमानिम्ह मनू, इस्राएलया घरानायाथाय् हुँ अले इमित जिगु खँ न्यंकि! 5 जिं छन्त अजू चाइपुगु व थाकुगु भाय् ल्हाइपिं मनूतय्थाय् छ्वये मखु तर इस्राएलीतय्थाय् छ्वयाच्वनागु दु। 6 छं मथूगु अजू चाइपुगु व थाकुगु भाय् ल्हाइपिं मनूतय्थाय् मखु। जिं छन्त अज्याःपिन्थाय् छ्वयागु जूसा इमिसं धात्थें हे छंगु खँ न्यनीगु। 7 तर इस्राएलया घरानायात छंगु खँ न्यने मास्ति मवः, इमित जिगु खँ न्यने मंमदु। छाय्धाःसा इस्राएलया फुक्क घराना हे जिद्दी व नुगः छाःपिं खः। 8 तर जिं छन्त इपिं थें हे जिद्दी व नुगः छाःपिं यानाबी। 9 जिं छंगु कपाःयात च्वल्वहं स्वयाः छाःगु ल्वहं थें छाकाबी। उपिं विद्रोही घराना जूसां इपिं खनाः ग्याये मते! इमिगु ख्वाः खनाः नं ग्याये मते!” 10 अले वय्कलं जितः थथे धयादिल, “अय् सीमानिम्ह मनू, जिं छन्त धयागु फुक्क खँ बांलाक न्यँ, अले नुगलय् ति! 11 आः उपिं यहूदां ज्वनाहःपिं छिमि मनूतय्थाय् हुँ! इमिसं ध्यान बियाः न्यनेमा वा मन्यनेमा, इमित धा, ‘परमप्रभु परमेश्वरं थथे धयादी।’” 12 अले आत्मां जितः च्वय् थकयादिल। जिं थःगु ल्युने छगू घुनुनुनु मिंगु सः ताल, “स्वर्गय् परमप्रभु परमेश्वरया महिमा प्रशंसा जुइमा!” 13 व सः उपिं प्राणीतय्गु पपुतिं छम्हय्सिनं मेम्हय्सित थ्यूबलय् पिहां वःगु व इमिगु लिक्क दुगु उपिं घःचाःया सः खः, भुखाय् ब्वइबलय् वइगु घुनुनुनु मिंगु सः थें। 14 अले आत्मां जितः ल्ह्वनाः यंकादिल। म्हाइपुसे च्वंकाः तंमय् जि वना। परमप्रभुया शक्ति जिके दुगु जुल। 15 अले जि कबार खुसिया लिक्क तेल-अबीबय् च्वंपिं यहूदां ज्वनाहःपिं मनूतय्थाय् वया। अन जि न्हय्न्हु तक नुगः मछिंकाः च्वना। इस्राएलया पिवाः 16 न्हय्न्हु लिपा परमप्रभुया वचन जिथाय् वल, 17 “अय् सीमानिम्ह मनू, जिं छन्त इस्राएलया घरानाया पिवाः यानागु दु। उकिं जिं आः धयाच्वनागु खँ न्यँ, अले इमित जिगुपाखें ख्याच्वः ब्यु! 18 जिं छम्ह मभिंम्ह मनूयात ‘छ धात्थें हे सी’ धकाः धायेबलय् तर वयागु ज्यान बचय् यायेत छं ख्याच्वः मबिल, वा वयागु मभिंगु पहःचहःया लागि वयागु विरोधय् सल्लाह मबिल धाःसा व मनू पापया कारणं सी, अले वयागु हियागु ल्याःचाः जिं छंके काये। 19 तर छं व मभिंम्ह मनूयात ख्याच्वः बिल अले व थःगु मभिंगु ज्यापाखें वा थःगु मभिंगु पहःपाखें लिहां मवल धाःसा व थःगु अधर्मय् हे सी, छं धाःसा थःम्हं थःत बचय् याइ। 20 “हाकनं सुं धर्मी मनू थःगु धार्मिकतां लिहां वयाः मभिंगु ज्या यात, धाःसा जिं वयागु न्ह्यःने लुफिं हाइगु ल्वहं तये अले इपिं सी। छं वयात ख्याच्वः मब्यूगुलिं इपिं थःगु हे पापया कारणं सी। इमिसं याःगु धर्मया ज्यायात लुमंकीगु जुइ मखु। इमिगु हियागु ल्याःचाः जिं छंके काये। 21 तर उम्ह धर्मी मनूयात पाप याये मते धकाः छं ख्याच्वः बिल अले वं पाप मयात धाःसा धात्थें व म्वाइ, छाय्धाःसा वं ख्याच्वः नालाकाल, अले छं थःम्हं थःत बचय् याइ।” 22 परमप्रभुया शक्ति अन जिके दु, अले वय्कलं जितः धयादिल, “दँ, मैदानय् हुँ, अन जिं छलिसें खँ ल्हाये।” 23 उकिं जि दनाः मैदानय् वना। कबार खुसिया सिथय् जिं खनागु परमप्रभुया महिमा अन नं खने दु। अले जि बँय् भ्वसुला। 24 उबलय् परमप्रभुया आत्मा जिके दुबित अले जितः तुतिं थनादिल। वय्कलं जिलिसें खँ ल्हानादिल, जितः थथे धयादिल, “हुँ, थःगु छेँय् खापा तिनाः च्वँ। 25 अय् सीमानिम्ह मनू, इमिसं छन्त खिपतं ची, छ मनूतय्गु दथुइ वने फइ मखु। 26 जिं छंगु मेयात छंगु थक्वय् प्यपुंकाबी। उकिं यानाः छ नवाये फइ मखु अले छं इमित हक्के फइ मखु। खः ला इपिं विद्रोही घरानायापिं खः। 27 तर जिं छलिसें खँ ल्हायेबलय् जिं छंगु म्हुतु चाय्काबी अले छं इमित धा, ‘परमप्रभु परमेश्वरं थथे धयादी,’ न्यने मास्ति वःपिन्सं बांलाक न्यनेमा न्यने मास्ति मवःपिन्सं मन्यनेमा, छाय्धाःसा इपिं विद्रोही घराना खः।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.