प्रस्थान 8 - नेवाः बाइबलदक्व थासय् ब्यांचा हे ब्यांचा निगूगु महामारी 1 हाकनं परमप्रभुं मोशायात धयादिल, “फारोयाथाय् वनाः वयात धा, ‘परमप्रभुं थथे धयादी, जिगु आराधना यायेत जिमि मनूतय्त वनेब्यु। 2 छं इमित वने मबिल धाःसा जिं ब्यांचा छ्वयाहयाः छंगु देशयात सास्ती बी। 3 नील खुसि ब्यांचां जाइ, अले इपिं छंगु लाय्कुलिइ, छ द्यनिगु क्वथाय्, छंगु लासाय्, छिमि भारदारतय्गु छेँय्, छिमि मनूतय्थाय्, छिमि भुतुलिइ व छुचुं न्हाइगु बाताचाय् तकं वइ। 4 ब्यांचा छ, छिमि मनूत व छिमि भारदारतय्गु म्हय् तकं थहां वइ।’” 5 परमप्रभुं मोशायात हानं धयादिल, “हारूनयात धा, ‘थःगु कथि ज्वनाः खुसि, धः व पुखूपाखे क्यँ, अले मिश्र देश न्यंकं ब्यांचा हे ब्यांचां जाइ।’” 6 हारूनं मिश्र देशय् च्वंगु फुक्क लःपाखे थःगु ल्हाः न्ह्यज्याकल, अले देशय् हे त्वपुक ब्यांचा पिहां वल। 7 जादु क्यनिपिन्सं नं थःगु जादुनं अथे हे यानाः मिश्र देशय् न्यंक ब्यांचा पिकाल। 8 अले फारोनं मोशा व हारूनयात सःतके छ्वयाः धाल, “परमप्रभुयात प्रार्थना यानाः फुक्क ब्यांचातय्त जि व जिमि मनूतय्थासं लित यंकि धा। अले परमप्रभुया निंतिं बां बीत छिमि मनूतय्त वनेबी।” 9 मोशां फारोयात धाल, “धयादिसँ, जिं गुबलय् छिथासं, छिगु छेँनं अले छिकपिनि मनू व भारदारतय्थासं ब्यांचा चिलावनेमा, नील खुसिइ जक ल्यनेमा धकाः प्रार्थना यायेगु?” 10 फारोनं धाल, “कन्हय्।” मोशां लिसः बिल, “छिं धयादी थें जुइमा। अले छिं परमप्रभु जिमि परमेश्वर थें जाःम्ह मेपिं सुं मदु धकाः सीकादी। 11 ब्यांचा छिथासं, छिगु छेँनं अले छिकपिनि मनू व भारदारतय्थासं मदयावनी, नील खुसिइ जक दयाच्वनी।” 12 अनं लिपा मोशा व हारून फारोयाथासं पिहां वल। मोशां फारोयाथाय् छ्वयाहःपिं ब्यांचा मदय्का छ्वयादिसँ धकाः परमप्रभुयात इनाप यात। 13 परमप्रभुं मोशां धाःथें यानादिल। अले छेँय्, चुकय् व ख्यलय् च्वंपिं ब्यांचा फुक्कं सित। 14 मिश्रीतय्सं ब्यांचा मुनाः द्वँचिन। उकिं देशन्यंक तसकं नवल। 15 ब्यांचा स्यूगु खंबलय् परमप्रभुं धयादी थें हे हाकनं फारोनं थःगु नुगः छाय्कल, अले वं मोशा व हारूनयागु खँ मन्यन। धुलं भुयुपति पिहां वःगु स्वंगूगु महामारी 16 परमप्रभुं मोशायात हानं धयादिल, “थःगु कथि कयाः बँय् च्वंगु धुलय् दायादिसँ धकाः हारूनयात धा, अले धू मिश्र न्यंकं भुयुपति जुयावनी।” 17 इमिसं अथे हे यात। हारूनं कथि कयाः ल्हाः न्ह्यज्याकाः बँय् च्वंगु धुलय् दाल। अले मनूतय्त व पशुतय्त भुयुपतिं त्वपुवल। मिश्र देशय् च्वंगु धू फुक्कं भुयुपति जुल। 18 जादु क्यनिपिन्सं नं थःगु जादुं भुयुपति दय्केगु कुतः यात, अय्नं इमिसं दय्के मफुत। अले मनूतय्त, पशुतय्त व न्ह्याथासं भुयुपतिं भुनाच्वन। 19 अले जादु क्यनिपिन्सं फारोयात धाल, “थुकी ला परमेश्वरयागु हे ल्हाः दु।” अय्नं परमप्रभुं धयादी थें हे फारोया नुगः छानाच्वन। वं इमिगु खँ मन्यन। ग्वाः ग्वाः भुजिं वःगु प्यंगूगु महामारी 20 परमप्रभुं मोशायात धयादिल, “सुथय् न्हापां दनाः फारो खुसिपाखे वनीबलय् वया न्ह्यःने दं हुँ। वयात धा, ‘परमप्रभुं थथे धयादी, जिगु आराधना यायेत जिमि मनूतय्त वनेब्यु। 21 छं जिमि मनूतय्त वने मबिल धाःसा जिं छन्थाय्, छिमि भारदारतय्थाय्, छिमि प्रजायाथाय् अले छंगु लाय्कुलिइ ग्वाः ग्वाः भुजिं छ्वयाहये। मिश्रीतय्गु छेँ पतिकं व इपिं च्वनीगु बँ तक नं भुजिंनं जाइ। 22 “‘जिं जिमि मनूत च्वनीगु गोशेन लागायात धाःसा अलग्ग तये, अन भुजिं दइ मखु। अले जि परमप्रभु थ्व देशय् दु धकाः छं सी। 23 जिं थः मनू व छिमि मनूतय्त अलग्ग तयाबी। थ्व अजू चायापुगु ज्या कन्हय् हे जुइ।’” 24 अले परमप्रभुं अथे हे यानादिल। फारोया लाय्कू, वया भारदारतय्गु छेँय् ख्वातुक भुजिंनं त्वपुल, अले मिश्र देशन्यंक हे भुजिंनं जाल। 25 अले फारोनं मोशा व हारूनयात सःताः धाल, “छिमिसं वनाः थ्व हे देशय् थः परमेश्वरया निंतिं बां ब्यु।” 26 मोशां धाल, “थथे यायेगु पाय्छि जुइ मखु। छाय्धाःसा परमप्रभु जिमि परमेश्वरया निंतिं जिमिसं छायेगु बलिं मिश्रीतय्त घौचाय्की। छुं जुयाः मिश्रीतय् न्ह्यःने जिमिसं थज्याःगु बां बिल धाःसा छु इमिसं जिमित ल्वहँतं कय्काः मस्याइ ला? 27 जिपिं स्वन्हुया लँपु जुयाः मरुभूमिइ परमप्रभु थः परमेश्वरं उजं बियादी थें वय्कःया निंतिं बां बीत वनेमाः।” 28 फारोनं धाल, “जिं छिमित मरुभूमिइ परमप्रभु छिमि परमेश्वरया निंतिं बां बीत वनेबी, तर यक्व तापाक्क धाःसा वने दइ मखु। आः जिगु निंतिं नं प्रार्थना या।” 29 मोशां लिसः बिल, “जि थनं वनेवं कन्हय् हे फारो व वया भारदार व वया मनूतय्थासं फुक्क भुजिं चिलावनेमा धकाः परमप्रभुयात प्रार्थना याये। अय्नं फारोनं मनूतय्त परमप्रभुया निंतिं बां बीत वने मब्यूसे हानं ध्वंलायेगु ज्या मयायेमा धयागु खँ पक्का जुयेमाः।” 30 अले मोशां फारोयाथासं पिहां वयाः परमप्रभुयात प्रार्थना यात। 31 परमप्रभुं मोशां धाःथें यानादिल। अले फारो, वया भारदारत व वया मनूतय्थासं भुजिं चिला वन। छम्ह हे भुजिं ल्यं मन्त। 32 हाकनं फारोनं थःगु नुगः छाय्कल। अले मनूतय्त वने मबिल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.