प्रस्थान 10 - नेवाः बाइबलक्वःबुइँचात छ्वयाहःगु च्यागूगु महामारी 1 परमप्रभुं मोशायात धयादिल, “फारोयाथाय् हुँ, इमिगु दथुइ जिं थःगु अजू चायापुगु चिं क्यनेत हे जिं वयागु व वया भारदारतय्गु नुगः छाय्काबियागु खः। 2 अले जिं गथे यानाः मिश्रीतय्त हेस्यानाः इमिगु दथुइ गज्याः गज्याःगु अजू चायापुगु चिं क्यना, छं थः काय्पिन्त व छय्पिन्त कँ। अले छिमिसं जि हे परमप्रभु खः धकाः सी।” 3 उकिं मोशा व हारूनं वनाः फारोयात धाल, “हिब्रूतय् परमप्रभु परमेश्वरं थथे धयादी, ‘गुबलय् तक छ जिगु खँ मन्यंसे च्वनेगु? जिमि मनूतय्त जिगु आराधना यायेत वनेब्यु। 4 छं जिमि मनूतय्त वने मबिल धाःसा जिं कन्हय् हे छंगु देशय् क्वःबुइँचात छ्वयाहये। 5 इमिसं खने हे मदयेक बँयात त्वपुयाबी। प्वँ गाये धुंकाः ल्यं दुगु फुक्कं इमिसं नयाबी, अले गुँइच्वंगु फुक्क सिमासामा नं नयाबी। 6 छंगु लाय्कू, छं भारदारतय्गु व फुक्क मिश्रीतय्गु छेँय् क्वःबुइँचातय्सं जाइ। छिमि बौ बाज्यापिन्सं पृथ्वीइ दुबलय्निसें थौं तक थथे जूगु खंगु मदुनि।’” अले मोशा फहिलाः फारोयाथासं पिहां वन। 7 फारोया भारदारतय्सं वयात धाल, “गुबलय् तक थ्व मनुखं झीत दुःख बियाच्वनीगु खः? वया मनूतय्त इमि परमप्रभु परमेश्वरया आराधना यायेत वनेबियादिसँ। छिं आः तक नं मिश्र देश गुलि स्यने धुंकल धयागु मस्यूनि ला?” 8 अले मोशा व हारूनयात फारोयाथाय् हानं ब्वनाहल। वं इमित धाल, “छिपिं थः परमेश्वरया आराधना याः हुँ। अय्नं सु सु वनेगु खः?” 9 मोशां धाल, “जिपिं थः मचाखाचा, ल्यासे ल्याय्म्ह, बुराबुरी, फैच्वलय्, सा द्वहं दक्वं ज्वनाः वनेगु खः। छाय्धाःसा जिमिसं परमप्रभुया निंतिं नखः हनेमाः।” 10 फारोनं धाल, “छिमि परमप्रभु छिपिंलिसे हे दयेमा। जिं छिपिंनापं मस्त व मिस्त वनेबी हे मखु। छिमिगु मति मभिंगु खने दु। 11 अहं, थथे जुइ फइ मखु। छिपिं मिजंत जक वनाः परमप्रभुयागु आराधना या। छिमिसं थ्व हे फ्वंगु खः।” अले मोशा व हारूनयात फारोयाथासं पितिनाछ्वत। 12 अले परमप्रभुं मोशायात धयादिल, “थःगु ल्हाः मिश्र देशया च्वय् न्ह्यज्याकि, अले क्वःबुइँचात वयाः प्वँ गाये धुंकाः मिश्र देशय् ल्यं दुगु बुँइ सयाच्वंगु फुक्कं नयाबी।” 13 मोशां थःगु कथियात मिश्रया च्वय् ल्ह्वन। अले परमप्रभुं उखुन्हु न्हिच्छि व चच्छि देय्न्यंक पुर्बं फय् वय्कादिल। कन्हय् सुथय् व फसं क्वःबुइँचात हल। 14 क्वःबुइँचात मिश्र देश हे त्वपुक्क वल, अले देशया फुक्क थासय् च्वन। थुकथं क्वःबुइँचात मिश्र देशय् वःगु न न्हापा हे दु, न लिपा हे वइ। 15 फुक्क बँ हे हाक्कुसे च्वंक इमिसं त्वपुल। इमिसं प्वँ गाये धुंकाः ल्यं दुगु बाली व सिमाय् च्वंगु फल फुक्कं नयाबिल। मिश्र देशय् गनं हे वाउँगु धयागु मन्त। 16 अले फारोनं हथासं मोशा व हारूनयात सःतके छ्वल। अले वं धाल, “जिं छिमि परमप्रभु परमेश्वरयागु व छिमिगु विरोधय् हाकनं पाप यानागु दु। 17 उकिं जिगु पापयात हानं छकः क्षमा यानाब्यु। अले परमेश्वरयात थ्व महामारीयात जिथासं चीकाबीत प्रार्थना या।” 18 अले मोशां फारोयाथासं वनाः परमप्रभुयात प्रार्थना यात। 19 अले परमप्रभुं फय्यात हीकाः पच्छिमं तसकं फय् वय्कादिल। व फसं दक्व क्वःबुइँचातय्त लाल समुद्रय् ब्वय्का यंकल। अले मिश्रया गनं हे छम्ह हे क्वःबुइँचा ल्यं मन्त। 20 परमप्रभुं अज्ज नं फारोयागु नुगः छाय्कादिल। वं इस्राएलीतय्त वने मब्यू। देय्न्यंक खिउँसे च्वंगु गुंगूगु महामारी 21 परमप्रभुं मोशायात धयादिल, “थःगु ल्हाः आकाशपाखे न्ह्यज्याकि। अले मिश्र न्यंक खिउँसे च्वनेमा। ल्हातिं थी फइ थें च्वंक क्वात्तुक खिउँसे च्वनेमा।” 22 अले मोशां थःगु ल्हाः आकाशपाखे न्ह्यज्याकल। मिश्र देय्न्यंक स्वन्हु तक तसकं खिउँसे च्वन। 23 स्वन्हु तक सुनानं सुयातं खंके मखुत। अले सुं नं मिश्रीत थःगु थाय् त्वःताः तकं वने मफुत। इस्राएलीत च्वनाच्वंगु थाय् धाःसा खिउँसे मच्वं। 24 अले फारोनं मोशायात सःतके छ्वयाः धाल, “छिपिं छिमि थः मिसात व मचाखाचा ज्वनाः परमप्रभुया आराधना याः हुँ। पशुत धाःसा छिमिसं यंके मते।” 25 मोशां धाल, “परमप्रभु जिमि परमेश्वरया निंतिं बां बीत छिं जिमित मेलबलि व होमबलियाम्ह पशु नं बियादिमाः। 26 जिमिसं हयापिं पशुत नं जिपिंनापं हे वनी। छम्ह हे त्वःतावने मज्यू। इपिं मध्ये हे छम्हय्सित जिमिसं परमप्रभु जिमि परमेश्वरयात छायेत ल्ययेमाः। अन जक जिमिसं परमप्रभुया आराधनाया निंतिं छु छु माः धकाः सी।” 27 परमप्रभुं अज्ज नं फारोया नुगः छाय्कादिल। वं इमित वने मब्यू। 28 फारोनं मोशायात धाल, “जिथासं वना हे छ्व। जिगु न्ह्यःने हानं खनेदय्कः वये मते। गुखुन्हु छं जिगु ख्वाः खनी उखुन्हु हे छ सी।” 29 मोशां धाल, “छिं धयादी थें हे जि हानं छिगु न्ह्यःने खनेदय्कः वये मखुत।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.