एस्तर 6 - नेवाः बाइबलजुजुं मोर्दकैयात हनाबना याःगु 1 उखुन्हु चान्हय् जुजु द्यने मफुत, अथे जुयाः भारदारतय्त सःताः थःगु शासनया इलय् जूगु फुक्क घटना च्वयातःगु सफू ब्वनाः न्यंकेत उजं बिल। अले जुजुयात व ब्वनाः न्यंकल। 2 उकी निम्ह ध्वखा ब्यूम्ह, बिग्थाना व तेरेशं जुजुयात स्यायेगु ग्वसाः ग्वःगु अले मोर्दकैनं व खँया बारे न्यंकूगुया बारे च्वयातःगु खः। 3 थ्व ज्याया निंतिं मोर्दकैयात छु इनाम व हनाबना ब्यूगु दु धकाः जुजुं न्यन। जुजुया सेवकतय्सं लिसः बिल, “मोर्दकैया निंतिं छुं हे याःगु मदु।” 4 जुजुं न्यन, “पिनेयागु चुकय् सु दु?” उबलय् हे हामान जुजु लुखाया न्ह्यःने थःम्हं मोर्दकैयात फांसि बीगु सिँयागु थामय् यख्खाय्गु धकाः जुजुयाके बिन्ति यायेत वःगु खः। 5 अले जुजुया सेवकतय्सं लिसः बिल, “महाराज, हामान अन दु।” जुजुं इमित धाल, “वयात दुने हजि।” 6 अले हामान दुने दुहां वल, जुजुं वयात धाल, “जिं छम्ह मनूयात हनेगु इच्छा दु, वयात गुकथं हनेमालि?” अले हामानं थःगु मनय् थथे बिचाः यात, “जुजुं सुयात हनेगु इच्छा यात जुइ? जि हे ला खनि?” 7 अथे जुयाः हामानं जुजुयात लिसः बिल, “हने मास्ते वःम्हय्सिगु निंतिं, 8 वयागु निंतिं जुजुं थःम्हं हे फीगु वसः, जुजुं गइम्ह छेनय् शाही चिं दुम्ह सल हय्केबियादिसँ। 9 वयात हे जुजुया दक्वसिबय् तःधंम्ह भारदारं वसः फिकाः सल गय्काः शहरया चुक चुकय् वनाः थथे धा, ‘जुजुं हनेगु इच्छा याःम्ह मनूया निंतिं छु याःगु दु, स्वयादिसँ।’” 10 अले जुजुं हामानयात धाल, “याकनं वनाः छं धाःथें वसः व सल हिँ। अले यहूदी मोर्दकैयात हनेगु या। व दरबारया मू ध्वाखाय् च्वनाच्वंगु दु। छं धाःथें हे वया निंतिं फुक्कं यानाब्यु। छुं नं मगाःमचाः मजुइमाः।” 11 अथे जुयाः हामानं वसः फिकाः हनेगु यात। अले सल कयाः वयात गय्काः शहरया चुक चुकय् थथे धाधां न्ह्यः न्ह्यः वन, “जुजुं हनेगु इच्छा याःम्ह मनूया निंतिं छु याःगु दु, स्वयादिसँ।” 12 अनंलि मोर्दकै जुजुया मू ध्वाखाय् तुं लिहां वन। हामान धाःसा मछाय्काः नुगः पिच्याकाः हथासं थःगु छेँय् लिहां वन। 13 अले वं थः कलाः जेरेश व थः फुक्क पासापिन्त अनं मोर्दकैयात छु छु जूगु खः व फुक्क खँ न्यंकल। वयात सल्लाहबीपिं व वया कलातं थथे धाल, “मोर्दकैया न्ह्यःने छिगु शक्ति कम जुयावंगु दु। व यहूदी जाति खः, वया विरोधय् छिसं छुं याये फइ मखु, धात्थें छि बरबाद जुइन।” 14 थथे इपिंनापं खँ ल्हाना च्वंबलय् जुजुया नपुंसक भारदारत वयाः हामानयात रानी एस्तरं ज्वरय् यानातःगु भ्वय् नकेत हथासं यंकल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.