एफिसी 1 - नेवाः बाइबलपावलपाखें ज्वजलपा 1 परमेश्वरं हे ख्रीष्ट येशूयाम्ह प्रेरित यानातःम्ह पावलपाखें एफिससय् च्वंपिं ख्रीष्ट येशूयात विश्वास यानाच्वंपिं परमेश्वरया मनूतय्त ज्वजलपा! 2 झी परमेश्वर बाः व प्रभु येशू ख्रीष्टया दया माया व शान्ति छिमिके दयाच्वनेमा। ख्रीष्टया मनूतय्त परमेश्वरं आशिष बियादी 3 ख्रीष्टयात विश्वास यानागुलिं परमेश्वरं झीत स्वर्गयागु फुक्क आशिष बियादीगुलिं झी प्रभु येशू ख्रीष्टया बाः परमेश्वरयात तःधंकेमाः। 4 संसार मदुनिबलय् हे परमेश्वरं झीत वय्कःया न्ह्यःने धर्मी ठहरय् जुइत व पवित्र यायेत ल्ययादीगु खः। 5 वय्कलं झीत माया यानाः येशू ख्रीष्टपाखें थःकाय्पिं यानादिल। वय्कलं थः यःकथं हे थथे यानादीगु खः। 6 वय्कलं झीत थथे तःधंगु दया माया यानादीगुलिं झीसं वय्कःयात तःधंकेमाः। वय्कलं थः यःम्ह काय्पाखें झीत दया माया यानादिल। 7 ख्रीष्ट येशूं हि हाय्कादीगुलिं झीगु पाप क्षमा जुल। अले झीत छुत्कारा बियादिल। परमेश्वरयागु दया माया गुलि तःधं! 8 वय्कलं फुक्क ज्ञान व बुद्धि बियाः झीत यक्व दया माया यानादिल। 9 ख्रीष्टपाखें पूवंकादीगु फुक्क गुप्ति ज्याखँ वय्कलं झीत सीके बियादिल। 10 पाय्छिगु ई वइबलय् स्वर्ग व पृथ्वीइ दुगु फुक्क खँ ख्रीष्टया अधीनय् हयेगु परमेश्वरया ग्वसाः खः। 11 परमेश्वरं थ्व फुक्क न्हापा हे क्वःछिना तःकथं यानादीगु खः। वय्कलं झीत न्हापांनिसें हे ख्रीष्टनाप मिलय् यानाः थः मनू यायेत ल्ययादीगु खः। 12 झीपिं ख्रीष्टयाके भरोसा तयापिं दक्वसिबय् न्हापां हे ल्ययातःपिं खः। उकिं परमेश्वरयात झीसं तःधंके। 13 अथे हे छिमिसं नं थ्व मुक्ति बीगु सत्य व भिंगु खँ न्यनाः ख्रीष्टयात विश्वास यात। अले थःम्हं बाचा चिना तःकथं पवित्र आत्मा बैना बियाः परमेश्वरं छिमित थः मनू यानादिल। 14 परमेश्वरं बी धकाः धयादीगु झीत नं दइ, अले वय्कःया थः मनूतय्त पापं छुतय् यानादी धयागु दसिकथं झीत पवित्र आत्मा बियातःगु खः। झीसं वय्कःयात तःधंके। पावलं परमेश्वरयात सुभाय् देछाःगु 15 छिमिसं येशू ख्रीष्टयात क्वात्तुक विश्वास यानाच्वंगु व फुक्क विश्वासीतय्त दया माया यानाच्वंगु खँ न्यनाः 16 जिं परमेश्वरयात न्ह्याबलें सुभाय् बियाच्वनागु दु। अले प्रार्थना यायेबलय् छिमित नं लुमंकाच्वनागु दु। 17 ज्ञान बीम्ह व परमेश्वरयात म्हसीका बीम्ह पवित्र आत्मा छिमित बियादीमा धकाः जिं दकलय् तःधंम्ह व येशू ख्रीष्टया बाः परमेश्वरयाके फ्वनाच्वना। 18 परमेश्वरयागु ज्याखँ फुक्कं थुइके फय्केत छिमिगु नुगः चाय्कादिसँ धकाः नं जिं प्रार्थना यानाच्वनागु दु। अले छु आशायागु निंतिं वय्कलं छिमित सःतादीगु खः व वय्कलं थः मनूतय्त छु छु आशिष बियादी धकाः धयादीगु खः, छिमिसं सी। 19 अले वय्कःयात विश्वास याःपिन्त ग्वाहालि यानादीगु वय्कःया शक्ति गुलि तःधं धयागु सीमा धकाः नं जिं प्रार्थना यानाच्वनागु दु। वय्कःया शक्ति तसकं तःधं। 20 थ्व हे शक्तिं वय्कलं सी धुंकूम्ह ख्रीष्टयात म्वाकाः स्वर्गय् थःगु जवय् तयादिल। 21 ख्रीष्ट फुक्क अधिकार दुम्ह, शासन यानादीम्ह, शक्तिं जाःम्ह व फुक्क प्रभुत स्वयाः नं तःधंम्ह खः। वय्कःयात थ्व संसारय् जक मखु, वइतिनिगु संसारय् नं फुक्क नां स्वयाः च्वय् तयादिल। 22 थुकथं दक्व फुक्कं परमेश्वरं ख्रीष्टयागु अधीनय् तयादिल। अले मण्डलीया थकालि नं यानादिल। 23 मण्डली ख्रीष्टयागु म्ह खः। थ्व हे म्ह न्ह्याथाय् दीम्ह व न्ह्यागु खं पूवंकादीम्ह वय्कःयागु पूवंगु रूप खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.