व्यवस्था 6 - नेवाः बाइबलदक्वसिबय् तःधंगु आज्ञा 1 छिमिसं यर्दन छिनावनाः अधिकार यायेत्यंगु देशय् मानय् यायेमाः धकाः छिमित स्यनेत परमप्रभु छिमि परमेश्वरं जितः धयादीगु आज्ञा, विधि व नियम थुपिं हे खः। 2 जिवंकाछि परमप्रभु छिमि परमेश्वरयागु भय कयाः छिमि काय्म्ह्याय्पिं व छय्पिन्सं वय्कःया फुक्क आज्ञा व नियम मानय् यायेमाः। अले छिपिं ताःई तक म्वाइ। 3 हे इस्राएल न्यँ, थुपिं फुक्क बांलाक्क मानय् या अले छिमिगु भिं जुइ। परमप्रभु छिमि पुर्खातय् परमेश्वरं छिमित बचं बियादीगु थें दुरु व कस्ति बाः वयाच्वंगु देशय् छिमिगु ल्याः यक्व अप्वः जुइ। 4 हे इस्राएल न्यँ! परमप्रभु झी परमेश्वर छम्ह हे जक दु। 5 परमप्रभु झी परमेश्वरयात दुनुगलंनिसें माया या, थःगु प्राण बिया तकं माया या, अले थःगु बलं फत्तले माया या। 6 जिं थौं छिमित बीत्यनागु आज्ञा छिमिगु नुगलय् दया हे च्वनेमाः। 7 उपिं आज्ञा छिमिसं थःकाय् म्ह्याय्पिन्त बांलाक स्यँ। छेँय् च्वनीबलय्, लँय् जुइबलय् ग्वार्तुला च्वनीबलय् अले दनीबलय् उकिया बारे खँल्हाबल्हा यायेगु या। 8 उपिं आज्ञा व विधि चिंकथं ल्हातय् व कपालय् चिना ति। 9 उपिं आज्ञा थथःगु छेँया लुखा दुवालय् व मूध्वाखाय् च्वया ति। उजं मानय् मयाःगु खँय् ख्याच्वः 10 अले परमप्रभु छिमि परमेश्वरं अब्राहाम, इसहाक व याकूब नांयापिं छिमि पुर्खालिसें छिमित बी धकाः पाफयादीगु देशय् हयादीबलय् व छिमिसं मदय्कूगु ततःधंगु बाबांलाःगु शहर 11 ज्वरय् मयाःगु भिंगु भिंगु सामानं जाःगु छेँ, मम्हूगु तुं, मप्यूगु दाखक्यब व जैतूनया सिमा, थुपिं फुक्कं वय्कलं छिमित बियादी। उबलय् छिमिसं नयाः प्वाः जाइबलय्, 12 होश या! छिमित मिश्र देशं दासत्वं पितहयादीम्ह परमप्रभुयात ल्वःमंके मते। 13 छिमिसं परमप्रभु छिमि परमेश्वरयागु ग्याःभय का, वय्कःयागु जक सेवा या अले वय्कःया हे नामय् पाफयेगु या। 14 छिमिसं थः जःखः च्वंपिं जातितय् द्यःतय्त पुजा याये मते। 15 छाय्धाःसा छिमिगु दथुइ च्वनादीम्ह परमप्रभु छिमि परमेश्वर नुगः मुइकादीम्ह परमेश्वर खः। अथे मयात धाःसा परमप्रभु छिमि परमेश्वरयागु तं छिमित लाइ, अले वय्कलं छिमित पृथ्वीं नाश यानादी। 16 छिमिसं मस्साहय् यानागु थें परमप्रभु परमेश्वरयागु मन स्वये मते। 17 परमप्रभु छिमि परमेश्वरयागु आज्ञा व वय्कलं छिमित बियादीगु आज्ञा, विधि व नियम बांलाक मानय् या। 18 परमप्रभुयागु मिखाय् छु छु पाय्छि व भिं जू व हे जक या, अले छिमिगु भिं जुइ। अले छिमि पुर्खानापं परमप्रभुं पाफयाः बचं बियादीगु थें छिमिसं व भिंगु देश त्याकाकाये फइ। 19 अनंलि परमप्रभुं धयादीगु थें छिमिसं सकल शत्रुतय्त थःगु न्ह्यःनं लिनाछ्वये फइ। 20 लिपाया इलय् छिमि काय्नं “परमप्रभु झी परमेश्वरं बियादीगु थुपिं आज्ञा, नियम व विधितय्गु मतलब छु खः?” धकाः न्यनीबलय् 21 छिमिसं वयात थथे धा, “झीपिं मिश्रय् फारोया दास जुयाच्वनागु खः, अले परमप्रभुं झीत मिश्रं थःगु बल्लाःगु ल्हातं पितहयादिल। 22 परमप्रभुं झीगु मिखाया न्ह्यःने हे मिश्रीत, फारो व वया सकलें छेँजःतय्त तसकं ग्यानापुसे च्वंगु चिं व अजू चायापुगु ज्या क्यनादिल। 23 झी पुर्खालिसें पाफयाः बी धकाः धयादीगु देशय् हयेत वय्कलं झीत अनं पितहयादिल। 24 परमप्रभुं हे झीत थुपिं फुक्क नियम मानय् यायेगु व परमप्रभु झी परमेश्वरयागु भय कायेगु आज्ञा बियादीगु खः। अथे याःसा झीगु भिं जुया हे च्वनी, अले थौं तक थें वय्कलं झीत म्वाःकातइ। 25 परमप्रभु झी परमेश्वरं बियादीगु थुपिं फुक्क आज्ञा झीसं बांलाक मानय् यात धाःसा, व हे झीगु धार्मिकता जुइ।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.