व्यवस्था 2 - नेवाः बाइबलमरुभूमिइ चाःहिलाच्वंगु खँ लुमंकूगु गन्ती २०:१४–२१:२० 1 अले परमप्रभुं जितः धयादीगु थें झीपिं लाल समुद्र वनेगु लँ जुयाः मरुभूमिपाखे वना। यक्व दिं तक सेइरया पर्वत देशयागु सिथं सिथं चाःहिलाच्वना। 2 अले परमप्रभुं जितः धयादिल, 3 “छिपिं थ्व पर्वत देशया सिथं सिथं चाचाःहिलाच्वंगु यक्व दिं दये धुंकल। आः फहिलाः उत्तरपाखे हुँ। 4 अले छं मनूतय्त थथे धकाः आज्ञा ब्यु, ‘छिपिं सेइरय् च्वनिपिं एसावया सन्तान, थः हे दाजुकिजापिनिगु देश जुयाः वनेत्यंगु दु। इपिं छिपिं खनाः ग्याइ। अथे जुयाः बांलाक होश या। 5 इमित ल्वायेत ग्वाके मते, छाय्धाःसा जिं छिमित इमिगु देशय् पला तयेगु तक नं थाय् बी मखु। सेइरया पर्वत देश जिं एसावया सन्तानया अधिकारय् बियागु दु। 6 छिमिसं नयेगु नसा व त्वनेगु लः वहः बियाः न्यानाका।’” 7 परमप्रभु परमेश्वरं छिमित ल्हातं यायेगु फुक्क ज्याय् सुवाः बियादीगु दु। वय्कलं छिमित थ्व तःधंगु मरुभूमिया यात्रा दुच्छि बिचाः यानादीगु दु। थुपिं पिइदँया इलय् परमप्रभु परमेश्वर छिपिंनापं च्वनादीगु दु। अले छिमित छुं नं मगाःमचाः जूगु मदु। 8 अथे जुयाः सेइरय् च्वनिपिं एसावया सन्तान, झी दाजुकिजापिनिपाखें फःहिलाः झीपिं न्ह्यज्यानावना। एलात व एस्योन-गेबेरं वइगु अराबाया लँपु मवंसें झीपिं चाःहिलाः मोआबया मरुभूमिया लँपुइ वना। 9 अले परमप्रभुं जितः धयादिल, “मोआबीतय्त दुःख बी मते, इमित ल्वायेत ग्वाके नं मते। जिं इमिगु देशया छुं नं अंश छिमित बी मखु, छाय्धाःसा जिं आरया फुक्क लागा लोतया सन्तानतय्गु अधिकारय् बियागु दु।” 10 (न्हापाया इलय् अन बल्लाःपिं, ल्याखय् अप्वः दुपिं अले अनाकीत थें ततःधिकःपिं एमीत च्वनाच्वंगु खः। 11 अनाकीतय्त थें इमित नं रपाई हे धाइगु। अय्नं मोआबीतय्सं इमित एमी धाइगु। 12 न्हापाया इलय् सेइरय् होरीत च्वनाच्वंगु खः। अय्नं एसावया सन्तानतय्सं इमित लिनाछ्वल। परमप्रभुं बियादीगु देश इस्राएलीतय्सं अधिकार यानाकाःगु थें इमित लिनाछ्वयाः एसावीत इमिगु थासय् च्वन।) 13 अले परमप्रभुं धयादिल, “आः दनाः जेरेद खुसि छिना हुँ।” अथे जुयाः झीपिं जेरेद खुसियागु खोँच पुलाः उखे वना। 14 कादेश-बर्ने त्वःता वयाः जेरेद खुसि छिनाबलय् तक झीत स्विच्यादँ बित। थ्व इलय् परमप्रभुं पाफयादीगु थें झीगु छाउनीं व पुस्तायापिं सकलें लडाइँ याइपिं मनूत नाश जुल। 15 छाउनीं इपिं सकलें नाश जुया मवंतले परमप्रभुया ल्हाः इमिगु विरोधय् न्ह्यज्याना हे च्वन। 16 मनूतय्गु न्ह्यःनं लडाइँ यायेफुपिं सकलें मनूत सी धुंकाः 17 परमप्रभुं जितः थथे धयादिल, 18 “थौं छिपिं मोआबया लागा जुयाः आर पुलाः उखे वनेमाः। 19 छिपिं अम्मोनीतय् सिमानाय् थ्यनीबलय् इमित दुःख बी मते। इमित ल्वायेत ग्वाके मते छाय्धाःसा जिं छिमित अम्मोनीतय्गु देशयागु छुं नं अंश अधिकारया निंतिं बी मखु। जिं व देशयात लोतया सन्तानयागु अधिकारय् बियागु दु।” 20 (न्हापा अन रपाईत च्वनाच्वंगु खः। अथे जुयाः व देशयात नं रपाईतय्गु धाइगु। अम्मोनीतय्सं धाःसा जमजुम्मीत धाइगु। 21 इपिं बल्लाः, ल्याखय् अप्वः अले अनाकीत थें ततःधिकः। अय्नं परमप्रभुं इमित अम्मोनीतय्गु न्ह्यःने नाश यानादिल। अम्मोनीतय्सं इमित पितिनाछ्वल अले इपिं इमिगु थासय् च्वंवल। 22 वय्कलं सेइरय् च्वनिपिं एसावया सन्तानतय्गु निंतिं नं थथे यानादिल। वय्कलं इमिगु न्ह्यःने होरीतय्त नाश यानादिल। इमित लिनाः थौं तक नं एदोमीत इमिगु थासय् च्वनाच्वंगु दु। 23 अले गाजा तक गांगामय् च्वनाच्वंपिं अव्वीतय्त कप्तोरं वःपिं कप्तोरीतय्सं नाश यानाबिल। अले इपिं इमिगु थासय् च्वन।) सीहोन जुजुयात बुकूगु खँ लुमंकूगु गन्ती २१:२१-३० 24 “आः न्ह्यज्या हुँ, अर्नोन खुसिया न्हसिकाप पुलाहुँ। जिं हेश्बोनया जुजु एमोरी, सीहोन व वयागु देश छिमिगु ल्हातय् बियागु दु। अथे जुयाः व देश थःगु अधिकारय् हयेगु शुरु या अले व जुजुलिसें लडाइँ या। 25 थनिंनिसें आकाशया क्वय् दुपिं सकलें जातितय्गु मनय् छिमिगु ग्याःचिकु तयाबी। छिमिगु खँ न्यनाः इपिं थुरथुर खाइ अले इमिगु नुगः भाराभारा मिनी।” 26 कदेमोतया मरुभूमिं हेश्बोनया जुजु सीहोनयाथाय् शान्तिया थ्व खँ धायेत दूत छ्वया, 27 “जिमित छिगु देश जुयाः वनेबियादिसँ। जिपिं मूलँपु जुयाः जक वने, जिपिं जवंखवं वने मखु। 28 जिमित नयेत नसा व त्वनेत लः वहः कयाः मियादिसँ। जिमित छिगु देशं जुयाः न्यासि वने जक बियादिसँ। 29 सेइरय् च्वनिपिं एसावया सन्तान व आरय् च्वनिपिं मोआबीतय्सं याःगु थें छिं जिमित यानादिसँ। थुकथं जिपिं यर्दन खुसि छिनाः परमप्रभु जिमि परमेश्वरं बियादीगु देशय् थ्यंकः वने।” 30 अय्नं हेश्बोनया जुजु सीहोनं झीत थःगु देश जुयाः वने मब्यू छाय्धाःसा परमप्रभु छिमि परमेश्वरं वयात छिमिगु ल्हातय् बीत वयागु मनयात जिराहा व अतेरि यानादिल। अले थौं तक व छिमिगु ल्हातय् दु। 31 परमप्रभुं जितः धयादिल, “सीहोन व वयागु देश जिं छिमित बी। वयागु देशयात त्याकाः अधिकार यायेगु शुरु या।” 32 सीहोनं थः सकलें सेना ज्वनाः जिपिंलिसें ल्वायेत यहसाय् वःबलय् 33 परमप्रभु झी परमेश्वरं वयात झीगु ल्हातय् बियादिल। अले वयात, वया काय्पिन्त, वया सकलें सेनातय्त झीसं स्यानाबिया। 34 उबलय् झीसं वयागु फुक्क शहर त्याकाकयाः उपिं शहरय् च्वंपिं मिजंत, मिसात व मस्तय्त भज्यंक नाश यानाबिया। झीसं छम्हय्सित नं मत्वःता। 35 झीसं अधिकार यानागु शहरय् लाका कयागु सामान व पशुत धाःसा थःपिनिगु लागिं कया। 36 अर्नोन खुसियागु न्हसिकाप च्वसं दुगु अरोएरनिसें अले न्हसिकापया दथुइ दुगु शहरंनिसें गिलाद तक झीसं त्याकाकाये मफुगु बल्लाःगु शहर छगू नं मदु। परमप्रभु झी परमेश्वरं दक्व झीत बियादिल। 37 अय्नं परमप्रभु झी परमेश्वरं वने मते धकाः आज्ञा बियादीगु यब्बोक खुसिया सिथय् दुगु अम्मोनीतय्गु देशया लिक्क अले पर्वत देशया शहर शहरय् झीपिं मवना। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.