दानिएल 5 - नेवाः बाइबलअंगलय् च्वयातःगु आखः 1 बेलसजर जुजुं थः द्वःछिम्ह भारदारतय्गु लागि छगू तःधंगु भ्वय् न्याय्कल। इपिं लिसे वं दाखमद्य त्वन। 2 दाखमद्य त्वनाच्वंबलय् हे बेलसजर जुजुं थःम्हं, थः भारदारतय्सं अले थः कलाःपिन्सं व मथ्याःपिं कलाःपिन्सं दाखमद्य त्वनेत न्हापायाम्ह जुजु नबूकदनेसरं यरूशलेमया देगलं हःगु लुँ व वहःयागु थलबल अन हयेगु आज्ञा बिल। 3 उकिं इमिसं यरूशलेमय् दुगु परमेश्वरया देगलं हःगु लुँया थलबल हल। अले जुजु व वया भारदारत, वया कलाःपिं व मथ्याःपिं कलाःपिन्सं उपिं थलबलं दाखमद्य त्वन। 4 इमिसं दाखमद्य त्वंबलय् लुँ, वहः, कँय्, नँ, सिँ व ल्वहँतं दय्कातःपिं द्यःतय्त तःधंकल। 5 आकाझाकां छम्ह मनूया ल्हाः खनेदत। अन लाय्कुलिइ त्वाःदेवाःया जः न्ह्यःने लेवं पानातःगु अंगलय् छुं च्वल। ल्हातं च्वयाच्वंगु जुजुं स्वयाच्वन। 6 वयागु ख्वाः वँचुसे च्वन। तसकं ग्याःगुलिं वयागु निगुलिं पुलि थुरथुर खात। 7 जुजुं ज्वखना स्वइपिं, ज्योतिषीत व साइत स्वइपिं सःतके छ्वत। बेबिलोनयापिं थुपिं ज्ञान दुपिं मिजंतय्त धाल, “सुनां थ्व च्वयातःगु आखः ब्वनी अले थुकिया अर्थ जितः कनी वयात प्याजीगु वसः फीकाबी, अले वयागु गःपतय् लुँयागु सिखः क्वखाय्काबी, अले व मनूयात देशय् स्वंगूगु तःधंम्ह शासक यानाबी।” 8 अले जुजुया सकलें ज्ञान दुपिं मिजंत वल, तर इमिसं थ्व च्वयातःगु आखः ब्वने मफुत वा उकिया अर्थ नं जुजुयात कने मफुत। 9 अथे जुयाः जुजु बेलसजर अज्ज ग्यात अले वयागु ख्वाः झन वँचुसे च्वन। वया भारदारतय्त छु याये छु याये जुल। 10 जुजु व भारदारत हालाच्वंगु सः तायाः रानीमां भ्वय् नयेगु क्वथाय् वयाः थथे धाल, “हे महाराज, छःपिं ताःई तक म्वानादीमा! थथे ख्वाः वँचुसे च्वंकादी मते। 11 छःपिनिगु देशय् पवित्र द्यःपिनिगु आत्मा दुम्ह छम्ह मनू दु। न्हापायाम्ह जुजुया पालय् थ्व मनुखं द्यःपिन्सं थें दुग्यां, अक्कल व बुद्धि क्यंगु खः। छःपिनि न्हापायाम्ह जुजु नबूकदनेसरं वयात जादु क्यनिपिं, साइत स्वइपिं, ज्योतिषीत, व ज्वखना स्वइपिनि नायः दय्कादीगु खः। 12 थ्व सःस्यूम्ह मनू दानिएल खः, गुम्हय्सित जुजुं बेलतसजर धाइगु खः। वयाके तच्वःगु मन व ज्ञान दु। व म्हगसया अर्थ कने फुम्ह खः। क्वाःया लिसः बीगुलिसें समस्यात ज्यंकेगु ज्या नं याये फुम्ह खः। दानिएलयात सःतके छ्वयादिसँ, अले वं आखःया अर्थ कनाबी।” दानिएलं आखःया अर्थ कंगु 13 उकिं दानिएलयात जुजुया न्ह्यःने हल अले जुजुं वयात धाल, “जिमि न्हापायाम्ह जुजुं यहूदां ज्वनाहःपिं मध्ये छम्ह दानिएल धाःम्ह छ हे खः ला? 14 छंके द्यःतय्गु आत्मालिसें दुग्यां, अक्कल व तसकं बुद्धि दु धयागु खँ जिं न्यनागु दु। 15 थ्व च्वयातःगु आखः ब्वनाः अर्थ कनेत जिगु न्ह्यःने ज्ञान दुपिं मनूत अले ज्वखना स्वइपिं मनूत हल तर इमिसं थुकिया अर्थ कने हे मफुत। 16 “छं सुलाच्वंगु खँया अर्थ कनेफु अले थाकुगु समस्यात ज्यंके फु धयागु खँ जिं न्यनागु दु। छं थ्व च्वयातःगु आखः ब्वनाः उकियागु अर्थ जितः कने फत धाःसा छन्त प्याजीगु रंगया लाय्कू वसः पुंकाबी, छंगु गःपतय् हनाबनाया लुँयागु सिखः क्वखाय्काबी, अले छ देशय् स्वंगूगु तःधंगु पदयाम्ह मनू जुइ।” 17 अले दानिएलं जुजुयात लिसः बिल, “छःपिन्सं थःगु देछात थःके हे तयादीफु अले छःपिनिगु सिरपाःत मेपिं सुयातं बियादी फु। अथेसां छःपिं महाराजया लागि थ्व च्वयातःगु आखः ब्वनाबी अले थुकिया अर्थ कनाबी। 18 “हे महाराज, दक्वसिबय् तःधंम्ह परमेश्वरं छःपिनि न्हापायाम्ह जुजु नबूकदनेसरयात तःधंगु राज्य, तःधंसू, नां व महिमा बियादीगु दु। 19 अले परमेश्वरं वय्कःयात तःधंकादीगुलिं जाति जातियापिं, देश देशयापिं, अले थीथी भाय् ल्हाइपिं मनूत वय्कः खनाः ग्याइगु व थुरथुर खाइगु। वय्कलं सुयात स्याये मास्ति वय्कादी वयात स्यानादी, सुयात म्वाकातये मास्ति वय्कादी वयात म्वाःका तयादी। सुं मनूयात हनाबना यायेगु व क्वह्यंकेगु वय्कःया ल्हातय् दु। 20 तर वय्कः तःधंछु, जिराहा जूगुलिं राजगद्दीं लिकाल अले वय्कःयागु शान वय्कःपाखें लाकाकाल। 21 वय्कःयात मनूतय् दथुं पित छ्वत अले वय्कःयागु मनयात पशुयागु मन थें यानाबिल। देश देशय् दक्वसिबय् तःधंम्ह परमेश्वरं राज्य यानादी व थःत यःम्हय्सित देशयाम्ह शासक दय्कादी धयागु खँ वय्कलं सीकामकातले वय्कः गुँ गधातलिसे च्वन, सा-द्वहंतय्सं थें घाँय् नल। वय्कःयागु म्हयात आकाशया सुति लखं प्याकल। 22 “हे बेलसजर, छःपिं वय्कःया थासय् जुजु जूम्ह खः। थ्व फुक्क खँ छःपिन्सं स्यूसां छःपिनिगु मन क्वमिलु मजू। 23 उकिया पलेसा छःपिन्सं स्वर्गयाम्ह प्रभुयागु विरोधय् ज्या यानादिल। वय्कःया देगलं हःगु थलबलत थन हयादिल। अले छःपिं व भारदारत, छःपिनि कलाःपिं व मथ्याःपिं कलाःपिन्सं उपिं ख्वल्चां दाखमद्य त्वनादिल। अले छःपिन्सं लुँ, वहः, कँय्, नँ, सिँ व ल्वहँतं दय्कूपिं द्यःतय्त च्वछाल। उपिं द्यःत न्यनेफुपिं नं मखु, खंके फुपिं नं मखु, अले छुं स्यूपिं नं मखु। परमेश्वरया ल्हातय् हे छःपिनिगु प्राण व फुक्क लँपु दुसां वय्कःयात हनाबना यानामदी। 24 उकिं थ्व खँग्वः च्वयेत वय्कलं ल्हाः छ्वयाहयादीगु खः। 25 “च्वयातःगु खँग्वः थथे दु – मेने, मेने, टेकेल, पर्सिन 26 “थुपिं खँग्वःतय्गु अर्थ थ्व हे खः – “मेने – परमेश्वरं छःपिनिगु राज्यया न्हि ल्याःखनाः थुकियात क्वचाय्कादीगु दु। 27 “टेकेल – छःपिन्त तराजुइ लंगु दु, अले याउँसे च्वंगु लुइकूगु दु। 28 “पर्सिन – छःपिनिगु राज्य ब्वथलाः मादी व फारसीतय्त ब्यूगु दु।” 29 अनंलि बेलसजरया आज्ञाय् दानिएलयात प्याजीगु रंगया वसः फिकल। वयागु गःपतय् लुँयागु सिखः क्वखाय्कल। अले वयात देशय् स्वंगूगु तःधंगु पद बिल। 30 उखुन्हु चान्हय् बेबिलोनीतय् जुजु बेलसजरयात स्यात। 31 अले खुइनिदँ दुम्ह मादी दारां व देश त्याका काल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.