आमोस 5 - नेवाः बाइबलपस्ताय् चायेत इनाप 1 अय् इस्राएलया घराना, जिं हालागु विलापया म्ये न्यँ– 2 “कन्या इस्राएल हाकनं गुबलें दने मफय्क क्वःदःगु दु, वयात थःगु देशय् हे त्वःताथकल, वयात थनीम्ह सुं हे मदु।” 3 परमप्रभु परमेश्वरं थथे धयादी – “इस्राएलया छगू शहरं द्वःछिम्ह सिपाइँ लडाइँलय् वनी, उपिं मध्ये सछिम्ह जक ल्यं दइ। मेगु शहरं सछिम्ह सिपाइँ लडाइँलय् वनी, उपिं मध्ये झिम्ह जक बचय् जुइ।” 4 परमप्रभुं इस्राएलया घरानायात थथे धयादी – “जितः माला स्व, अले बचय् जुइ। 5 बेथेलयात माले मते, गिलगालय् वने मते, बेर्शेबाय् वनाः पुजा याये मते, गिलगालया मनूतय्त धात्थें हे ज्वनायनी, बेथेल धाःसा मदयावनी।” 6 परमप्रभुयात माला स्व, अले बचय् जुइ, मखुसा वय्कः योसेफया कुलपिंके मि थें जुयावनी, अले उकिं इमित भस्म याइ, बेथेलय् व मि स्याइम्ह सुं नं दइ मखु। 7 छिमिसं न्याययात स्यंकीगु अले थुकियात खाइकाबीगु, छिमिसं धार्मिकतायात धुलय् वान्छ्वया बीगु। 8 किरकिटी व मृगशिरा नगु पुचःयात सृष्टि यानादीम्ह, तसकं खिउँगुयात सुथसिया जलय् हीकादीम्ह, न्हियात खिउँकाः चा यानादीम्ह, गुम्हय्सिनं समुद्रया लःयात सःतादी अले उकियात बँय् प्वंकादी वय्कःया नां हे परमप्रभु खः। 9 वय्कलं थत्थें बल्लाःपिन्त नाश यानादी, अले किल्ला दुगु शहर नं नाश यानादी। 10 इमान्दारपिं न्यायधीसतय्त छिमिसं तच्वकं मयय्कूगु दु, अले खःगु सत्य खँ ल्हाइपिन्त नं क्वह्यंकूगु दु। 11 छिमिसं मगाःमचाःपिन्त क्वत्यला च्वन, इमिगु अन्न लुतय् यानाच्वन। अथे जुयाः ल्वहंया ततःखाःगु छेँ छिमिसं दय्कूसां छिपिं उकी च्वने दइ मखु। छिमिसं लहलह वइगु दाखमा प्यूसां छिमिसं उकियागु दाखमद्य त्वने खनी मखु। 12 छाय्धाःसा छिमिगु द्वंबिद्वं गुलि यक्व दु अले छिमिगु पाप गुलि तःधं धकाः जिं स्यू। छिमिसं धर्मीपिन्त दुःख बी अले घुस काइ, अदालतय् गरीबतय्गु न्याय स्यंकूगु दु। 13 अथे जुयाः बुद्धि दुम्ह मनू थज्याःगु इलय् सुम्क च्वनी, छाय्धाःसा ई तसकं मभिं। 14 छु याःसा भिं जुइ वया, मभिंपाखें तापाक च्वँ, गुकिं यानाः छिपिं म्वानाच्वनी। अले जक छिमिसं धाःथें दक्व शक्ति दुम्ह परमप्रभु परमेश्वर छिपिंनापं च्वनादी। 15 मभिंगु फुक्क त्वःताछ्व, छु छु भिंगु खः व हे जक यय्की। अदालतय् न्याय ल्यंकाः तयाति, सके दक्व शक्ति दुम्ह परमप्रभु परमेश्वरं योसेफया ल्यंदनिपिं मनूतय्त दया यानादी ला। 16 अथे जुयाः प्रभु, दक्व शक्ति दुम्ह परमप्रभु परमेश्वरं थथे धयादी – “दक्व शहरया लँय् लँय् नुगः चेचेतुंक ख्वइगु व बिलाप जुइ, दक्व चुक चुकय् इमिसं हाय हाय याइ। बुँज्यायाइपिन्त बिलाप यायेत व मलामीतय्त दुखं च्वनेत सःती। 17 दक्व दाखक्यबय् नुगः चेचेतुंक ख्वइगु जुइ, छाय्धाःसा जि छिमिगु दथुं जुयावने,” परमप्रभुं धयादी। परमप्रभुया दिं 18 धिक्कार दु छिमित, गुपिन्सं परमप्रभुया दिंयात पियाच्वनी। उगु दिनय् छिमित छु फाइदा दइ? व दिं ला खिउँसे च्वनी, तुइसे च्वनी मखु। 19 सिंहपाखें बिस्युं वनाः सुं मनूया भालूयात नापलाःगु थें वा छेँ दुहां वनाः अंगलय् ल्हाः तःबलय् सर्पं वयात न्या थें व दिं जुइ। 20 खः धात्थें हे परमप्रभुया दिं तुइसे मखु, खिउँसे च्वनी। व भचा नं निभाः मत्वःगु तसकं खिउँगु दिं जुइ। 21 “छिमिगु धर्मयागु नखःचखः खनाः जि घच्चाः, जिं छिमिगु मुँज्यात सह याये हे मफु। 22 छिमिसं जिगु निंतिं होमबलि व अन्नबलि छाःसां जिं व नालाकाये मखु। छिमिसं छाःगु दकलय् बांलाःगु मेलबलियात नं जिं वास्ता याये मखु। 23 छिमिगु भजन म्येया ग्यानापुगु सः जिपाखें तापाक ति। छिमिगु वीणाया सः जितः न्यने मयः। 24 तर न्याय धाःसा खुसि थें अले धार्मिकता गुब्सं मसुइगु खुसि थें न्ह्याना च्वनेमा। 25 “अय् इस्राएलया घराना, छु मरुभूमिं हयाबलय् छिमिसं पिइदँ तक जितः बलि व भेटी छाया ला? 26 मखु, छिमिसं ला थःगु हे निंतिं दय्कातःगु छिमिगु मूर्तित, छिमि राज द्यः सिक्कूत व नगु-द्यः कीयूनयात क्वबिया जुल। 27 अथे जुयाः दमस्कसं नं उखे तापाक जिं छिमित ज्वंकाछ्वये,” परमप्रभुं धयादी, गुम्हय्सिगु नां दक्व शक्ति दुम्ह परमेश्वर खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.