आमोस 4 - नेवाः बाइबल

इस्राएलया मनूत परमेश्‍वरपाखे लिहां मवःगु

¹ अय् सामरिया डाँडाय् च्‍वनीपिं बाशानया ल्‍ह्वंपिं सात, छिपिं मिसात, गुपिन्‍सं चीमिपिन्‍त क्‍वत्‍यलाच्‍वन अले मगाःमचाःपिन्‍त दुःख बियाच्‍वन। अले थः भाःतयात धयाच्‍वन, “जिमित त्‍वनेत छुं हयाबियादिसँ।”

² परमप्रभु परमेश्‍वरं थःगु पवित्रतां थ्‍व पाफयादीगु दु, “स्‍व, व दिं धात्‍थें वइ गबले इमिसं छिमित न्‍यायात बल्‍छीं सालाकाः थें अंकुसें सालायंकी।

³ छिपिं दक्‍वसित पःखाःया ह्वतं यनी, अले छिमित हर्मोनपाखे वांछ्वइ,” परमप्रभुं धयादी।

इस्राएलीतय्‌सं सय्‌के फइ मखु

⁴ “बेथेलय् वनाः पाप या। गिलगालय् वनाः झन अप्‍वः पाप या। सुथ पतिकं छिमिगु भेटी हति, अले स्‍वन्‍हु स्‍वन्‍हु दुखुन्‍हु थथःगु झिब्‍वय् छब्‍व हति।

⁵ सोडा तःगु मरिं सुभाय्‌या बलि छा, थःयसें बलिया निंतिं धक्‍कु त्‍वःताः न्‍यासि हुँ­, उकिया निंतिं घमण्‍ड या, छाय्‌धाःसा अथे यायेगु छिमित यः,” परमप्रभु परमेश्‍वरं धयादी।

⁶ “जिं दक्‍व शहरय् छिमित द्यांलाका बिया, अले छिपिं च्‍वनीगु फुक्‍क थासय् मरि कम यानाबिया, अथे जूसां छिपिं जिथाय् फहिला मवः,” परमप्रभुं धयादी।

⁷ “अन्‍न मुनीगु स्‍वला न्‍ह्यः हे जिं छिमिथाय् वा वयेगु दीकाबिया। जिं छगू शहरय् वा वय्‌काबिया, मेगु शहरय् वा मवय्‌का। छगू बुँइ वा वल अले मेगु बुँ वा मवयाः गना वन।

⁸ मनूत शहर शहर जुयाः लःया निंतिं धेधे चुइक जुयाजुल, तर त्‍वनेत माक्‍व मदु, अथे जूसां छिपिं जिथाय् फहिला मवः,” परमप्रभुं धयादी।

⁹ “जिं तःकः मछि छिमिगु क्‍यब व दाखक्‍यबय् ल्‍वय् व फ्‍वसा वय्‌काः सखाप याना। छिमिगु यःमरि व जैतूनया सिमायात क्‍वःबुइँचातय्‌सं सखाप याका, अथे जूसां छिपिं जिथाय् फहिला मवः,” परमप्रभुं धयादी।

¹⁰ “जिं छिमिगु दथुइ मिश्र देशय् थें महामारी छ्वयाहया। जिं छिमि ल्‍याय्‌म्‍हपिं मनूतय्‌त छिमिसं लाका काःपिं सलतनापं लडाइँ­लय् स्‍याना, छिमि सीपिं मनूतय्‌गु सीम्‍ह तसकं नवयाच्‍वंगु दु, अथे जूसां छिपिं जिथाय् फहिला मवः,” परमप्रभुं धयादी।

¹¹ “जिं छिपिं मध्‍ये गुलिंसित सदोम व गमोरायात थें नाश याना। छिपिं च्‍यानाच्‍वंगु मिं लिकागु ह्यंग्‍वाः थें जुल, अथे जूसां छिपिं जिथाय् फहिला मवः,” परमप्रभुं धयादी।

¹² “अथे जुयाः अय् इस्राएलयापिं मनूत, जिं छिमित सजाँय बी, जिं अथे याः हे याये। अय् इस्राएलयापिं मनूत जिं अथे याये त्‍यनागुलिं छिपिं परमेश्‍वरया न्‍ह्यःने वयेत तयार जु।”

¹³ पर्वतत दय्‌कादीम्‍ह व फय्‌यात सृष्‍टि यानादीम्‍ह परमेश्‍वर हे खः। वय्‌कलं मनूतय्‌त थःगु बिचाः सीकेबी। वय्‌कलं न्‍हियात चा यानादी, अले पृथ्‍वीया ततःजाःगु थासय् न्‍यासि झायादी। दक्‍व शक्ति दुम्‍ह परमप्रभु परमेश्‍वर वय्‌कःया हे नां खः।