आमोस 3 - नेवाः बाइबलइस्राएलया विरोधय् साक्षीत सःतूगु 1 अय् इस्राएलयापिं मनूत, परमप्रभुं छिमिगु विरोधय् अर्थात मिश्र देशं जिं हयापिं फुक्क खलःया विरोधय् धयादीगु थ्व वचन न्यँ – 2 “पृथ्वीइ च्वंपिं फुक्क परिवारतय्गु दथुइ जिं छिमित जक ल्ययागु दु। अथे जुयाः छिमिगु दक्व पाप व अधर्मया निंतिं जिं छिमित सजाँय बी।” अगमवक्ताया ज्या 3 छु निम्ह मनू खँ मिलय् मजुइकं निम्हं नापनापं जुइ ला? 4 शिकार मदय्कं झालय् सिंह हाली ला? छुं हे मदय्कं व थःगु गुफाय् घ्वारघ्वार याइ ला? 5 बँय् जाः मतय्कं झंग जालय् क्यनी ला? जालय् हे मक्यंक जाः बँय्थासं च्वय् तिंकन्हूइ ला? 6 गुगुं शहरय् लडाइँया तुरही पुइबलय् मनूत मग्याइ ला? परमप्रभुं मछ्वतले छु गुगुं शहरय् विपत्ति वइ ला? 7 धात्थें हे परमप्रभु परमेश्वरं थः दास अगमवक्तातय्त थःगु योजना मक्यंसे छुं नं यानादी मखु। 8 सिंह गर्जय् जुइबलय् सु मग्याइ? परमेश्वरं न्ववानादीबलय् सुनां अगमवाणी न्वमवासे च्वने फइ? सामरिया नाश जूगु 9 अश्दोदया किल्लात व मिश्र देशया किल्लाय् च्वनीपिं मनूतय्त थ्व घोषणा या, “सामरियाया पहाड पहाडय् छिपिं मूंवा। अन दुने जूगु तःधंगु हो हल्ला व अन च्वंपिं मनूतय् दथुइ क्वत्यलेगु ज्या जुयाच्वंगु स्व।” 10 परमप्रभुं धयादी, “खःगु गय् यानाः यायेगु धकाः इमिसं मस्यू, इमिसं लुतय् याःगु व खुयाहःगु सामान थःपिनिगु किल्लाय् दुने मुंकी।” 11 अथे जुयाः परमप्रभु परमेश्वरं थथे धयादी, “छम्ह शत्रुं देशयात घेरय् याइ, वं छंगु सुरक्षाया किल्लात नाश याइ, च्वनेगु थाय्यात लुतय् याइ।” 12 परमप्रभुं थथे धयादी, “गथे फैजवालं सिंहयागु म्हुतुं तुतियागु निपु क्वँय् वा छकुचा न्हाय्पं जक छुटे याइ, अथे हे उपिं इस्राएलीत मध्ये कम मनूतय्गु जक उद्धार जुइ, अले इमिके लासा वा खाताया कुचा स्वयाः मेगु छुं हे ल्यं दइ मखु।” 13 दक्व शक्ति दुम्ह परमप्रभु परमेश्वरं धयादी, “आः थ्व खँ न्यँ, याकूबया घरानायागु विरोधय् साक्षी ब्यु। 14 “जिं इस्राएलीतय्त इमिसं याःगु पापया सजाँय बीगु दिनय् इमिसं याःगु पापया निंतिं सजाँय बी, जिं बेथेलया वेदीतय्त भज्यंक नाश याये, अले वेदीया नेकूत त्वधुलाः बँय् कुतुंवइ। 15 जिं चिकुलाबलय् च्वनीगु छेँ व तान्वःबलय् च्वनीगु छेँ निगू नं भज्यंक नाश यानाबी, किसिया वां छाय्पिया तःगु छेँ नाश जुइ, ततःखाःगु छेँ स्यंकी तिनि।” परमप्रभुं धयादी, |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.