३ यूहन्ना 1 - नेवाः बाइबलयूहन्नापाखें ज्वजलपा 1 तसकं यःम्ह गायसयात जि मण्डलीया थकालियापाखें दुनुगलंनिसें माया दु। 2 यःम्ह किजा, छंगु आत्मा थें शरीर नं बल्लायेमा, अले न्ह्यागु खँय् नं च्वन्ह्यायेमा धकाः प्रार्थना यानाच्वना। 3 सत्ययात विश्वास याःथें छ सत्ययागु लँपुइ वनाच्वंगु दु धकाः आम्कनं वःपिं विश्वासीतय्सं कंबलय् जितः तसकं लय्ता वल। 4 थः सन्तान सत्ययागु लँपुइ वनाच्वंगु दु धकाः न्यनेगुति लय्ताः मेगु छु दइ? 5 यःम्ह किजा, आम्कन न्यंकेत वःपिं म्हमस्यूपिं विश्वासीतय्त छं दुकयाः इमित माक्व ग्वाहालि बिल, थ्व तसकं बांलात। 6 छं थुकथं इमित माया यानाः ग्वाहालि यात धकाः इमिसं थन च्वंगु मण्डलीयापिन्त कन। इमित माःगु लँ खर्च बियाः छ्वया हःसा तसकं बांलाइ, उकिं परमेश्वर छ खनाः लय्तायादी। 7 ख्रीष्टयात विश्वास मयाःपिंपाखें छुं हे मकासे इपिं ख्रीष्टयागु ज्या यायेत वःगु खः। 8 अय्जूगुलिं झी विश्वासीतय्सं अथे ख्रीष्टयागु ज्या याना जूपिन्त माक्व ग्वाहालि बीमाः। थुकथं झीपिं नं सत्ययागु लागि ज्या याःपिं जुइ। 9 न्हापा नं जिं आम्कन च्वंगु मण्डलीयात पौ च्वया हये धुन। तर छिपिं मध्ये तःधंछुया जुइमाःम्ह डियोत्रिफसं जिगु खँय् च्यूताः मतः। 10 वं अथे यानाच्वंगु खँ फुक्कं जिं आम्कन वयेबलय् कनाबी। वं जिमित बांमलाका च्वंगु दु। अले वं जिमिगु बारे मभिंगु खँ धया जुयाच्वंगु दु। उलि जक मखु, आम्कन वःपिं दाजुकिजापिन्त नं वं दुमकाः। अथे वःपिं दाजुकिजापिन्त दुकायेत स्वःपिन्त नं वं मण्डलीं पितिनाछ्वत। 11 यःम्ह किजा, अय्जूगुलिं छं मभिंगु बांमलाःगु खँ याये सय्के मते, बरु भिंगु बांलाःगु खँ जक सय्कि। भिंगु बांलाःगु यानाजुइपिं परमेश्वरया मनूत खः। मभिंगु बांमलाःगु यानाजुइपिं मनूतय्सं परमेश्वरयात म्हमस्यू। 12 फुक्क मनूतय्सं डेमेत्रियसयात भिं धकाः धाः। अले हानं वयागु चालचलनं नं व भिंम्ह मनू खः धकाः सीका धायेफु। व भिंम्ह मनू खः धकाः जिं नं धायेफु। जिं धयागु खँ सत्य खः धकाः छं स्यू। 13 छन्त च्वयेमाःगु खँ ला यक्व हे दु, अय्नं मसी व कलमं मखु। 14 याकनं हे जि आम्कन वयेत स्वयाच्वनागु दु। अले जिं छन्त फुक्क खँ कने। 15 छन्त शान्ति दयेमा। छं म्हस्यूपिं थनच्वंपिं विश्वासीतय्सं छन्त ज्वजलपा धयाहःगु दु। आम्कन च्वंपिं सकलें विश्वासीतय्त जिमिगु ज्वजलपा दु धकाः धयाब्यु। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.