२ थेसलोनिकी 2 - नेवाः बाइबलप्रभु झाइगु खँय् मखुगु बिचाः 1 दाजुकिजापिं, झी प्रभु येशू ख्रीष्ट झाइबलय् झीपिं फुक्कसितं वय्कः नाप छथाय् मुंकीतिनि धयागु खँ थुइकि। 2 जिमिसं छिमित बिन्ति यानाच्वना – सुनानं झी प्रभु झाइगु ई वये धुंकल धाल धायेवं छिपिं आछु-आछु कने मते, अले ग्याये मते। गुम्हय्सिनं अगमवक्तां धाःथें च्वंक, गुम्हय्सिनं वचनपाखें धाःथें च्वंक, अले गुम्हय्सिनं जिमिसं पौ च्वया थें च्वंक थथे धायेफु। 3 सुनानं छिमित मिखाय् धुलं छ्वाके मफयेमा। मनूतय्सं धर्म यायेगु मत्वःतुतले, अले नाश जुइमाःम्ह पापयाम्ह मनू खनेदय्कः मवतले प्रभु झाइ मखु। 4 वं थथःम्हं तःधं जुयाः मनूतय्सं परमेश्वर धयाच्वंगु व पुजा यानाच्वंगु फुक्कयात क्वह्यंकी। थःम्हं थःत परमेश्वर धयाः व परमेश्वरया देगलय् च्वंवनी। 5 छिमिथाय् दुबलय् हे जिं छिमित थथे धयागु खः। छिमिसं आः तक लुमंकातःगु हे दयेमाः। 6 ई जुल कि व खनेदय्कः वइ। आः थथें खनेदय्कः वयेत वयात सुनां पनातःगु दु धकाः ला छिमिसं सि हे स्यू। 7 अय्नं वं थःगु ज्या दुनें दुनें यानाच्वंगु दु। वयात पनातःम्ह चिलामवंतले वयागु मभिंगु ज्याखँ खने दइ मखु। 8 वयात पनातःम्ह चिला वन कि व दुष्ट खनेदय्कः वइ। अले प्रभु येशू ख्रीष्ट जलय् झःझः धाय्क झाइबलय् छगू सासलं हे वयात नाश यानाछ्वइ। 9 दुष्टयाके शैतानयागु शक्ति दइ। वं तःतामछि अजू चायापुगु ज्या व चिं यानाक्यनी। 10 नाश जुया वनीपिन्त वं थथे यानाः मिखाय् धुलं छ्वाकि, छाय्धाःसा इमिसं मुक्ति बीगु सत्य खँयात मयय्कू। 11 अय्जूगुलिं इमिसं मखुगु खँय् जक विश्वास यानाच्वनेमा धकाः परमेश्वरयागु शक्तिं इमित मखुगु खँ जक पत्याः याका तइ। 12 सत्य खँय् विश्वास मयासें मखुगु खँय् जक यःयःथें सना जुइकाः इमित सजाँय बीत वय्कलं थथे यानादीगु खः। मुक्ति बीत ल्ययातःपिं 13 प्रभुया यःपिं दाजुकिजापिं, जिमिसं परमेश्वरयात सुभाय् मब्यूसे च्वने मफु, छाय्धाःसा वय्कलं छिमित पवित्र आत्मां जाय्काः पवित्र यानाः व सत्य खँय् विश्वास याकाः मुक्ति बीत न्हापांनिसें हे ल्ययादीगु खः। 14 थुकियागु निंतिं हे वय्कलं जिमिगुपाखें भिंगु खँ न्यंकाः छिमित झी प्रभु येशू ख्रीष्टनापं तुं तःधंकेत सःतादीगु खः। 15 अय्जूगुलिं दाजुकिजापिं क्वात्तुक विश्वास याना च्वँ। जिमिसं धयागु व च्वयाहयागु खँ न्यनेगु या। 16 प्रभु येशू ख्रीष्टं हे व झीत माया यानादीम्ह व दया माया याना गुबलें सिना मवनीगु साहस व भिंगु आशा बियादीम्ह परमेश्वर बाःनं 17 फुक्क भिंगु ज्याखँय् छिमिगु नुगः बल्लाकादीमा। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.