२ शमूएल 7 - नेवाः बाइबलदाऊदयात परमप्रभुया बचं १ इति १७:१-१७ 1 दाऊदं थःगु लाय्कू रक्षा याये धुंकाः व वया प्यखें च्वंपिं शत्रुतपाखें परमप्रभुं वयात आराम बियादी धुंकाः 2 दाऊदं नातान अगमवक्तायात धाल, “थन जि देवदारु सिं दय्कूगु लाय्कुलिइ च्वनाच्वनागु दु, परमप्रभुया बाचाया सनू धाःसा पालय् दु।” 3 नातानं दाऊदयात धाल, “छिगु मनय् छु दु व यानादिसँ। छाय्धाःसा परमेश्वर छिलिसे दी।” 4 उखुन्हु चान्हय् परमेश्वरया वचन नातानयाथाय् वल, 5 “आः वनाः जिम्ह दास दाऊदयात थथे धा, ‘परमप्रभुं थथे धयादी, जि च्वनेत जिगु लागि परमप्रभुया देगः छं हे दय्केगु ला? 6 जिं इस्राएलीतय्त मिश्र देशं पित हयागु दिनंनिसें थौं तक जि गुबलें देगलय् च्वनागु मदु। जि न्ह्याबलें पालय् च्वनागु दु अले छथासं मेगु थासय् वयेगु वनेगु यानाच्वना। 7 गन जि फुक्क इस्राएलनापं वयेगु वनेगु यानाः छु जिं जिगु लागि देवदारु सिँया देगः छाय् मदय्कागु धकाः जिमि प्रजा इस्राएलया जवाः जुइत जिं आज्ञा बियापिं सुं नायःयात न्यना ला?’” 8 “उकिं आः वनाः जिम्ह दास दाऊदयात थथे धा, ‘दक्व शक्ति दुम्ह परमप्रभुं थथे धयादी, जिं छन्त ख्यलय् फैच्वलय् ज्वयेगु ज्यां लिकयाः इस्राएलया जिमि मनूतय् शासक दय्का। 9 छ गन वन, जि छनापं च्वना, अले जिं छिमि फुक्क शत्रुतय्त छंगु न्ह्यःनेनं चीकाबिया। आः जिं छन्त पृथ्वीयापिं नांजाःपिं मनूत मध्ये छम्ह दय्काबी।’” 10-11 “जिं जिमि मनूत इस्राएलया निंतिं छगूथाय् ल्यये। जिं अन हे इमित तये अले इपिं थःगु हे देशय् च्वनी। अले जिं थः प्रजा इस्राएलया निंतिं न्यायकर्तात धाइपिं नायःत ल्ययागु इलंनिसें थुखे इमिसं न्हापा दुःख ब्यू थें दुष्ट मनूतय्सं इमित हाकनं गुबलें दुःख बी मखुत। जिं छिमि सकल शत्रुतय्त नं नाश यानाबी।” “‘जि परमप्रभुं छंगु निंतिं छगू वंश दय्काबी धकाः जिं छन्त धाये। 12 छ सिनाः छन्त थः पुर्खातनापं थुने धुंकाः जिं छिमि छम्ह काय्यात जुजु दय्के, अले जिं वयागु राज्ययात बल्लाकाबी। 13 जिगु लागि देगः दय्कीम्ह व हे जुइ, अले जिं वयागु सिंहासन न्ह्याबलेंया लागि पलिस्था याये। 14-15 जि वया बौ जुइ अले व जिम्ह काय् जुइ। वं अधर्म यात धाःसा कथिं वयात जिं सजाँय बी अले मनूत छ्यलाः वयात कोर्रां दाये तर जिं छ स्वयाः न्हापा शासन याइम्ह शाऊलपाखें लित कयागु थें जिं वपाखें धाःसा जिगु सदां दयाच्वनीगु दयामाया गुबलें लित काये मखु। 16 छंगु घराना न्ह्याबलें दयाच्वनी अले छिमि सन्तानतय्सं जुजु जुयाः न्ह्याबलें शासन याइ। अले छंगु सिंहासन न्ह्याबलें दयाच्वनी।’” 17 परमेश्वरं दर्शनय् वयात धयादीगु फुक्क खँ नातानं दाऊदयात कन। दाऊदं परमप्रभुयात सुभाय् ब्यूगु १ इति १७:१६-२७ 18 अले जुजु दाऊद दुहां वनाः परमप्रभुया न्ह्यःने च्वन, अले वं थथे प्रार्थना यात, “हे परमप्रभु परमेश्वर, छिं जितः थन तक हयादीत जि सु खः धकाः अले जिगु परिवार छु खः धकाः? 19 हे परमप्रभु परमेश्वर, थ्व छिगु मिखाय् चिधंगु खँ जुल, छाय्धाःसा छिं थःदासया घरानाया लिपा वइगु ईया बारे धयादिल। हे परमप्रभु परमेश्वर, छिं जितः छम्ह तःधंम्ह मनू भाःपियादीगु दु। 20 “थः दासयात ब्यूगु इज्जतया बारे दाऊदं छितः मेगु छु धाये फइ धकाः? हे परमप्रभु परमेश्वर, छिं थः दासयात बांलाक म्हस्यू। 21 थःगु वचनया कारणं अले थःगु इच्छा कथं छिं छिम्ह दासयात सीके बियादीत थ्व तःधंगु ज्या यानादीगु दु। 22 “हे परमप्रभु परमेश्वर, छि थें मेपिं सुं नं मदु, अले जिमिसं थःगु हे न्हाय्पनं न्यनागु थें छि बाहेक मेम्ह परमेश्वर मदु। 23 अले छिगु जाति इस्राएल थें ज्याःगु जाति मेगु छु जाति दु धकाः? थः हे मू पुलाः त्वःतकेत झाःगु पृथ्वीइ मेगु छुं जाति दु ला? छिं मिश्रं थः मनूतय्त मू पुलाः त्वःतकाः थःगु नां तःधंकादिल, छिं अजू चायापुगु ज्या क्यनादिल अले छि थःमनूतय्गु लँय् दंपिं जाति जातियात व इमि द्यःतय्त ख्याना छ्वयादिल। 24 छिं थः प्रजा इस्राएलयात न्ह्याबलेंया लागि थःगु दय्कादीगु दु। अले छि हे परमप्रभु, इमि जुयादीगु दु। 25 “आः हे परमप्रभु परमेश्वर, थः दास व जिगु घरानायात छिं छु बचं बियादीगु खः व न्ह्याबलेंया लागि थापं जुयाच्वनेमा। छिं बचं बियादीगु थें यानादिसँ। 26 अले व थापं जुइमा व छिगु नां न्ह्याबलेंया लागि तःधनेमा। अले मनूतय्सं थथे धाइ, ‘दक्व शक्ति दुम्ह परमप्रभु इस्राएलयाम्ह खः।’ अले छिं थः दास दाऊदया घरानायात छिगु न्ह्यःने सदां तयातयेमा। 27 “हे दक्व शक्ति दुम्ह परमप्रभु, इस्राएलया परमेश्वर, छिम्ह दासं छिगु न्ह्यःने थ्व प्रार्थना यायेगु आँट यानागु दु छाय्धाःसा छिं थुपिं फुक्क खँ जि छिम्ह दासयात क्यनादिल अले जिमि सन्तानयात जुजु दय्के धकाः जितः धयादिल। 28 अले आः, हे परमप्रभु परमेश्वर, छि हे खः, छिगु वचन विश्वास यायेबहः जू अले छिं थः दासयात थ्व भिंगु बचं बियादीगु दु, 29 अथे जुयाः, आः छिं थःदासया घरानायात लय्तायाः आशिष बियादिसँ, थ्व न्ह्याबलें छिगु न्ह्यःने दयाच्वनेमा। छाय्धाःसा हे परमप्रभु परमेश्वर, छिं हे थथे धयादीगु दु। छिगु सुवालं हे छिकपिनि दासया परिवारयात न्ह्याबलें सुवाः दयाच्वनी।” |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.