२ शमूएल 2 - नेवाः बाइबलदाऊद यहूदाया जुजु जूगु 1 अनंलि दाऊदं परमप्रभुयात थथे धकाः न्यन, “छु जि यहूदाया छुं छगू शहरय् वने ला?” परमप्रभुं लिसः बियादिल, “हुँ।” दाऊदं न्यन, “गुगु शहरय् वनेगु?” अले थथे लिसः वल, “हेब्रोनय्।” 2 अथे जुयाः दाऊद थः निम्ह कलाःत, यिजरेली अहीनोम व कर्मेलया नाबालया विधवा अबीगेलनापं अन वन। 3 थःनापं दुपिं मनूतय्त नं इमि परिवारनापं दाऊदं हल अले इपिं हेब्रोन व अनया शहरय् च्वंच्वन। 4 अले यहूदाया मनूत हेब्रोनय् वल अले दाऊदयात अन यहूदाया घरानाया जुजु कथं अभिषेक यात। याबेश-गिलादया मनूतय्सं शाऊलयात थुनाब्यूगु खः धयागु खँ दाऊदयात न्यंकल। 5 अनंलि वं इमित थ्व खबर छ्वल, “छिमिसं थः मालिक शाऊलप्रति क्यंगु भक्ति व वय्कःयाम्ह थुनाब्यूगुलिं परमप्रभुं छिमित आशिष बियादीमा। 6 थुकिया निंतिं परमप्रभुं छिमित थःगु दयामाया व विश्वासबहः क्यनादीगु दु, अले छिमिसं थ्व ज्या याःगुलिं जि नं थःगुपाखें दयामाया याये। 7 बल्ला व मग्याःम्ह जु छाय्धाःसा छिमि मालिक शाऊल सीगु दु अले यहूदाया मनूतय्सं जितः थः जुजु अभिषेक याःगु दु।” ईश्बोशेत इस्राएलया जुजु जूगु 8 थुकिया दथुइ शाऊलया सेनापति नेरया काय् अबनेरं शाऊलया काय् ईश्बोशेतयात महनोमय् यंकल, 9 अले गिलाद, अशूरी, यिजरेल, एफ्राइम, बेन्यामीन अथवा फुक्क इस्राएलया जुजु दय्कल। 10 इस्राएलया जुजु जूबलय् ईश्बोशेत, शाऊलया काय्, पिइदँ दुगु जुयाच्वन, अले वं निदँ तक राज्य यात। यहूदाया कुल धाःसा दाऊदया हे ल्यूल्यू वन। 11 अले दाऊदं इमित हेब्रोनय् न्हय्दँ व खुला तक शासन यात। इस्राएल व यहूदाया दथुइ लडाइँ जूगु 12 नेरया काय् अबनेरं शाऊलया काय् ईश्बोशेतया पुचः ज्वनाः महनोमपाखें गिबोनय् वन। 13 व हे इलय् सरूयाहया काय् योआब दाऊदया पुचः ज्वनाः गिबोनया पुखूया लिक्क इपिं नापलात। ल्वायेत इपिं पुखूयात दथुइ लाकाः चुलिंचू फेतुत। 14 अबनेरं योआबयात चिल्लाय् दनाः धाल, “छिमि व जिमि ल्याय्म्हपिं मनूत मध्ये सुं वयाः जिमिगु न्ह्यःने छम्ह छम्ह यानाः ल्वाये ज्यू ला?” योआबं लिसः बिल, “ज्यू, इमिसं अथे हे याये धकाः धाल।” 15 अथे जुयाः दाऊदया झिंनिम्ह मनूतलिसे ल्वायेत ईश्बोशेतया बेन्यामीन कुलयापिं झिंनिम्ह मनूत दन। 16 अनंलि इपिं फुक्कसिनं थथःगु विरोधीया छ्यं ज्वनाः बेक्वय् चुपिं सुयाबिल। थुकथं इपिं सकलें छक्कलं क्वदल। अथे जुयाः गिबोनया व थाय्यात हेल्कत-हज्जुरीम धकाः धाइ। 17 उखुन्हु हे तःधंगु लडाइँ जुल। अबनेर व इस्राएलया मनूत दाऊदया पुचःतपाखें बुत। 18 सरूयाहया स्वम्ह काय्पिं, योआब, अबीशै व असाहेल अन हे दु। असाहेल ख्यलय् ब्वाँय् वनेगुलिं चल्ला थें हे ब्वाँय् वनेफुम्ह खः। 19 अथे जुयाः वं तप्यंक हे अबनेरयात लित्तुलित। 20 अबनेरं लिफः स्वयाः धाल, “हे असाहेल, छ हे खः ला?” वं लिसः बिल, “खः।” 21 अबनेरं धाल, “जवं कि खवं वनाः ल्याय्म्हपिं मध्ये छम्हय्सित ज्वनाः वयात हमला यानाः वयाके दुगु ल्वाभः लाकाः का।” तर असाहेलं वयात लित्तुलियेगु मत्वःतू। 22 अबनेरं हाकनं “जितः लिइगु त्वःति” धकाः ख्याच्वः बिल। वं धाल, “जिं छन्त गथे यानाः स्यायेगु? छिमि दाजु योआबयात जिं गुकथं ख्वाः क्यनेगु?” 23 तर असाहेल थुखे उखे वने मानय् मजुल। उकिं अबनेरं थःगु भालाया ल्युने च्वंगु चूं वयागु प्वाथय् सुयाबिल, अले भाला वया ल्यूनेपाखे पिचाल। अले व लँय् हे क्वदयाः सित। असाहेल क्वदयाः सीगु थासय् थ्यने धुंकाः फुक्क अन हे दित। 24 योआब व अबीशैनं धाःसा अबनेरयात लिना हे च्वन। निभाः बीवं इपिं अम्मा डाँडाय् थ्यन। अम्मा डाँडा गिबोनया मरुभूमिइ वनीगु लँय् दुगु गीहया पुर्बय् लाः। 25 बेन्यामीनीत अबनेरपाखे मुन, अले छगू पुचः जुयाः छगू डाँडाया च्वकाय् लडाइँया निंतिं तयार यात। 26 अबनेरं तःसलं हालाः योआबयात धाल, “छु स्यायेगु पालेगु यानां हे तुं च्वनेगु ला? उकिया लिच्वः लिपा तसकं बांमलाइ धकाः छं मस्यू ला? थःथितिपिन्त लियेगु त्वःति धकाः छु छं थः मनूतय् लित हये मखु ला?” 27 योआबं लिसः बिल, “धात्थें म्वाःम्ह परमेश्वरया नामं जिं धाये, छं मधाःगु जूसा मनूत सुथय् तक हे मनूतय्सं थःथितिपिन्त लिनाजुइगु त्वःति मखु।” 28 अले योआबं तुरही पुल, अले फुक्क मनूतय्सं इस्राएलीतय्त लियेगु त्वःतल। अनंलि लडाइँ दित। 29 अबनेर व वया मनूत चच्छि हे अराबा जुयाः न्यासि वनाः यर्दनया ब्यासि जुयाः वनाच्वन, अले यर्दन खुसि छिनाः इपिं सुथ बःछि न्यासि वनाः महनोमय् थ्यंकः वल। 30 योआबं अबनेरयात लियेगु त्वःताः थः पुचःयात छथाय् मुंकल। अले असाहेल बाहेक दाऊदया झिंगुम्ह मनूत कम जूगु सीकल। 31 तर दाऊदया पुचलं अबनेरया ल्यूल्यू वंपिं बेन्यामीनीतय् स्वसः व खुइम्ह मनूत स्याःगु खः। 32 इमिसं असाहेलयात क्वबिया यंकल, अले बेथलेहेमय् वयागु अबुया चिहानय् थुन। अनंलि योआब व वया मनूत चच्छि न्यासि वनाः सुथय् खिउँ खिउँ धाबलय् हेब्रोनय् थ्यंकः वल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.