१ शमूएल 5 - नेवाः बाइबलपरमेश्वरया बाचाया सनू पलिश्तीतय्गु शहरय् 1 पलिश्तीतय्सं परमेश्वरया बाचाया सनू लाकायंकाः एबेन-एजेरं अश्दोद शहरय् यंकल। 2 अले इमिसं परमेश्वरया सनू क्वबियाः दागोनया देगलय् हल अले दागोनया मूर्तिया लिक्कसं तुं तल। 3 कन्हय् खुन्हु सुथय् अश्दोदया मनूत दनावःबलय् इमिसं दागोनया मूर्ति परमप्रभुया सनू न्ह्यःने भ्वसुलाच्वंगु खन। अथे जुयाः इमिसं व मूर्तियात ल्ह्वनाः वयागु हे थासय् तल। 4 तर कन्हय् खुन्हु सुथय् इपिं दनावःबलय् हाकनं व मूर्ति परमप्रभुया सनूया न्ह्यःने भ्वसुलाच्वंगु खन। अले वया छ्यं व निपा ल्हाः नं छुतय् जुयाः लुखा क्वय् लाःवनाच्वन। वयागु म्ह धाःसा तमज्याः। 5 अथे जुयाः उखुन्हुनिसें थौं तक नं अश्दोदय् दागोनया पुजाहारीत व दागोनया देगलय् वनीपिं सकलें दागोनया लुखाखलुइ पलाः तइ मखु। 6 परमप्रभुं अश्दोदया मनूतय्त तःधंगु दण्ड बियादिल अथे जुयाः इपिं तसकं ग्यात। वय्कलं इमि लिक्क लाःगु जवंखवं च्वंगु इलाकाय् च्वंपिं मनूतय्त नं ला बुयावइगु ल्वचं कय्काः दण्ड बियादिल। इमिगु फुक्क शहरय् हे सीगु विनाश वल। 7 थःपिन्त छु जुयाच्वंगु खः व खनाः अश्दोदया मनूतय्सं धाल, “इस्राएलया परमेश्वरं झीत व झीम्ह द्यः दागोनयात दण्ड बियाच्वंगु दु। अथे जुयाः थ्व परमेश्वरया बाचाया सनू आः यक्व ई तक झीनापं थन तयातये मज्यू।” 8 इमिसं थ्व सनूयात छु यायेमाली धकाः न्यनेत पलिश्तीतय् फुक्क शासकतय्त सःताहल, अले इमिके न्यन, “थ्व इस्राएलया परमेश्वरया सनूयात जिमिसं छु यायेगु?” अले इमिसं लिसः बिल, “इस्राएलया परमेश्वरया सनूयात गातय् तयेयंकि।” अथे जुयाः इमिसं इस्राएलया परमेश्वरया सनूयात अन तये यंकल। 9 तर सनू अन थ्यनेवं हे परमप्रभुं थःगु ल्हाः अन शहरय् च्वंपिं मनूतय्गु विरोधय् ल्ह्वनादिल अले व शहरय् च्वंपिं मनूत तसकं ग्यात। अन च्वंपिं ल्याय्म्हपिं व बुरापिं सकसितं वय्कलं ला ग्वारा दयावइगु ल्वचं कयेकाः दण्ड बियादिल। 10 अथे जुयाः परमेश्वरया बाचाया सनू इमिसं नं एक्रोनय् छ्वल। तर परमेश्वरया बाचाया सनू एक्रोनय् थ्यनेवं अनयापिं मनूत थथे धकाः ततःसलं हाल, “जिपिं व जिमि मनूतय्त स्यायेत छिमिसं इस्राएलया परमेश्वरया बाचाया सनू थन हयागु ला?” 11 अथे जुयाः हाकनं इमिसं पलिश्तीतय् फुक्क शासकतय्त सःताहल, अले इमित धाल, “परमेश्वरया बाचाया सनू जिमि थासं छ्वयादिसँ। थ्व सनूयात तइगु थासय् हे लित छ्वयादिसँ। मखुसा थुकिं यानाः झीपिं सकलें सी माली।” मृत्युया कारण फुक्क शहरय् भयया ल्वचं जाल। छाय्धाःसा परमप्रभुया ल्हाः इमिगु विरोधय् ल्ह्वनादीगु खः। 12 अले मसीनिपिं मनूतय्त धाःसा ला ग्वारां तसकं सास्ती जुल अले व शहरय् च्वंपिनिगु तःसलं हाःगु सः स्वर्गय् तक हे थ्यन। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.