१ शमूएल 25 - नेवाः बाइबलशमूएल सीगु 1 शमूएल सित अले सकलें इस्राएलीत मुनाः दुखं च्वन। इमिसं वयात रामाया थःगु हे छेँ लिक्कसं थुन। अनंलि दाऊद माओनया मरुभूमिइ क्वहां वन। दाऊद व अबीगेल 2 अन माओनय् छम्ह मनू दु। वया कर्मेल शहरय् यक्व सम्पत्ति दु। व तसकं धनीम्ह खः। वया स्वद्वः फै व द्वःछि च्वलय् दु। वं कर्मेलय् थः फैतय्गु सँ चानाच्वंगु खः। 3 वयागु नां नाबाल खः अले वया कलाःया नां अबीगेल खः। अबीगेल तसकं बांलाःम्ह व बुद्धि दुम्ह खः। तर वया भाःत कालेबया वंशया छम्ह नुगः छाःम्ह व मभिंगु ज्या याइम्ह खः। 4 नाबालं थः फैतय्तगु सँ चानाच्वंगु धयागु खँ मरुभूमिइ दाऊदं न्यन। 5 वं थः झिम्ह मनूतय्त थथे धयाः छ्वत, “कर्मेलय् हुँ अले नाबालयात लुइकाः जिं ज्वजलपा धयाहःगु दु धयाब्यु। 6 छिमिसं वयात धयाब्यु, ‘छि, छिकपिनि परिवार अले छिनापं दुपिं सकलें मनूतय्गु भिं जुइमा। छिं थः फैतय्गु सँ चानाच्वंगु दु धयागु खँ जिं न्यनागु दु। 7 “‘छिकपि फैजवाःत थुलिमछि दिं तक जिमिथाय् च्वन नं जिमिसं इमित दुःख मबिया अले इपिं कर्मेलय् दुबलय् नं इमिगु छुं तंगु नं मदु। 8 छिकपिनि थः मनूतय्के न्यनादिसँ, अले इमिसं छितः फुक्कं सत्य खँ धयाबी। जिमि मनूतय्त दया यानाः स्वीकार यानादिसँ छाय्धाःसा थौंयागु न्हि तसकं भिं अले छिकपिनि दासतय्त व छपिनि काय् दाऊदयात छु बी फु बियादिसँ।’” 9 दाऊदया मनूत वयाः नाबालयात दाऊदयापाखें थ्व खबर बिल। अनंलि इपिं लिसःया निंतिं पियाच्वन। 10 नाबालं दाऊदया मनूतय्त थथे लिसः बिल, “दाऊद सु खः? थ्व यिशैया काय् धाःम्ह सु खः? थौंकन्हय् अप्वः यानाः दासत थः मालिकपाखें बिस्युं वनाच्वंगु दु। 11 जि नयेगु नसा, जि त्वनेगु दाखमद्य व फैया सँ चाइपिनिगु निंतिं ज्वरय् यानातयागु ला म्हमस्यूपिं मनूतय्त जिं छाय् बियेगु?” 12 दाऊदया मनूत लिहां वयाः थःगु लँपु जुयावन अले दाऊदयात थ्व फुक्क खँ कनाबिल। 13 दाऊदं थः मनूतय्त धाल, “सकसिनं थथःगु तरवार ज्वँ।” इपिं सकसिनं थथःगु तरवार जँय् चित अले दाऊदं नं थःगु तरवार जँय् चित। प्यसःति मनूत दाऊदया ल्यूल्यू वन अले निसःति मनूत धाःसा सामान स्वयेत च्वन। 14 नाबालया सुं छम्ह च्यलं नाबालया कलाः अबीगेलयात धाल, “दाऊदं क्वमिलु जुयाः मरुभूमिइ झी मालिकयात ज्वजलपा धाय्केत मनूत छ्वयाहःगु खः। तर वं ला इमित हेस्यात। 15 इमिसं जिमित तसकं बांलाःगु हे व्यवहार यात अले जिमित दुःख नं मब्यू। इपिं नापं तुं जिपिं ख्यलय् न्ह्याथासं वंसां जिमिगु छुं नं मालसामानत तंगु नं मदु। 16 जिपिं थः फैत ज्वःवनेबलय् इपिं चान्हि जिमिगु चाकःछिं पःखाः थें च्वनाबीगु खः। 17 आः छु यायेमाःगु खः छिं बांलाक बिचाः यानादिसँ छाय्धाःसा झी मालिक व वया परिवारय् पक्का हे नाश वयेत्यंगु दु। व तसकं लुच्चाम्ह मनू खः व नापं ला सुं नं मनू खँ तक नं ल्हाइ मखु।” 18 अथे जुयाः हथाय् चाचां निसःपा मरि, निगू मशक छेंगूया म्हिचाय् दाखमद्य, न्याम्ह फैया ला, निइनिगू किलोग्राम सियातःगु अन्न, सच्छिगः किसमिस व गंकातःगु निसःगः यःमरिसि अबीगेलं कयाः गधातय् म्हय् तयाबिल। 19 अले थः च्यःतय्त धाल, “छिपिं न्ह्यःने न्ह्यःने हुँ जि ल्यूल्यू वये।” तर थुकिया बारे वं थः भाःतयात धाःसा छुं हे मधाः। 20 व गधाया म्हय् गयावनाः पहाडया बच्छि लँपुइ थ्यंबलय् अन दाऊद व वया मनूत थःपिनिपाखे वयाच्वंगु खन। अले अबीगेलं इमित नापलात। 21 दाऊदं थथे मति तयाच्वंगु खः, “मरुभूमिइ छुं नं मतंक उलिमछि बांलाक थ्व मनूया सम्पत्ति रक्षा यानागु ला सितिं वन। वं जितः भिं यायेगु पलेसा मभिंगु यात। 22 कन्हय् सुथय् तक व नापं दुपिं छम्ह जक मिजंत म्वानाच्वन धाःसा परमेश्वरं जितः कडा सजाँय बियादीमा।” 23 अबीगेलं दाऊदयात खनाः हथाय् चाचां थःगु गधानं क्वहां वल अले दाऊदया न्ह्यःने बँय् पुलिं चुयाः 24 पाली भ्वःपुयाः थथे धाल, “हे जिमि प्रभु, जितः हे दोष लायेमा। छिकपिनि दासीयात छकः खँ ल्हाय्के बियादिसँ, जिमि प्रभु, छपिनि दासया खँ न्यनादिसँ। 25 जिमि मालिक, व लुच्चाम्ह मनूया च्यूताः तयादी मते। गथे वयागु नां नाबाल खः व अथे हे खः। वयागु नांया अर्थ ‘मूर्ख’ खः अले वयागु पहःचहः नं अथे हे च्वं। तर जिं छिकपिनि दासं धाःसा छपिन्सं छ्वयाहयादीपिं मनूतय्त खनागु मदु। 26 “आः हे जिमि प्रभु, ल्वापु ख्याःपु यानाः हि हायेकेगु व बदला कायेगु खँय् छितः परमप्रभुं पनादीगु दु। धात्थें परमप्रभु छिकपिनि परमेश्वर म्वाःम्ह खः थें, अले छि म्वाःम्ह खः थें, जिं धाये, छपिनि शत्रुतय्गु व छिकपिनिगु नाश जुइगु यय्कीपिनिगु गति नाबालया थें हे जुइमा। 27 जि छिकपिनि दासीं थः प्रभुयाथाय् ज्वनाः वयागु कोस्यालि थन दु। थ्व छपिनि अधीनय् दुपिं मनूतय्त बियादिसँ। 28 हे जिमि प्रभु, छिकपिनि दासीं मभिं याःगु दुसा क्षमा यानादिसँ। परमप्रभुं छिकपिनि वंशयात सदां दय्का तयादी, छाय्धाःसा छिं परमेश्वरया हे लडाइँ यानादीगु दु। छपिनिगु जिवंकाछि छु नं कथंयागु मभिंगु मजुइमा। 29 छुं जुयाः सुं मनुखं छितः हमला यानाः छिगु प्राण कायेत स्वल धाःसा परमप्रभु छिमि परमेश्वर मनूतय्गु तसकं मू वंगु सम्पत्तिया रक्षा याःथें हे छिगु प्राण रक्षा यानादी। छिकपिनि शत्रुतय्गु प्राण धाःसा वय्कलं खिपतय् ल्वहं तयाः वांछ्वःथें वान्छ्वयादी। 30 परमप्रभु जिमि प्रभुं छितः बियादीगु फुक्क बचं पूरा यानाः इस्राएलया जुजु यानादीबलय्, 31 छितः दोष मदुपिनिगु हि हाय्काः अले थःत ब्वलासापिन्त बदला कयाः धकाः दुःख जुयाः सितिं थथे यानाः धायेमालि मखु। परमप्रभुं जिमि मालिकयात ताःलाकादीबलय् छसपोलया दासी जितः नं लुमंकादिसँ।” 32 अनंलि दाऊदं अबीगेलयात धाल, “थौं जिनापं नापलायेत छितः छ्वयाहयादीम्ह परमप्रभु इस्राएलया परमेश्वरया महिमा जुइमा। 33 धन्य खः छंगु बुद्धि, छ धन्यम्ह खः, छाय्धाःसा थौं छं जितः स्यायेगु व जिगु थःगु ल्हातं बदला कायेगु दोषपाखें बचय् यानाबिल। 34 छाय्धाःसा धात्थें छन्त स्यंकेगुपाखें बचय् यानादीम्ह परमप्रभु इस्राएलया परमेश्वर म्वाःम्ह खः थें, जिं धाये, थथे छ जिनापं याकनं हे नापमलाःगु जूसा नाबालया परिवारय् च्वंपिं मिजंत छम्ह नं कन्हय् सुथ तक ल्यं दइ मखु।” 35 अनंलि दाऊदं अबीगेलं वया निंतिं हःगु कोस्यालि कयाः थथे धाल, “याउँक छेँ लिहां हुँ। जिं छंगु खँ न्यनागु दु अले छंगु बिन्ति स्वीकार यानागु दु।” 36 अबीगेल छेँ थ्यनाः वं अन नाबालं जुजुपिन्त नकेगु भ्वय् थें नयाच्वंगु खन। नाबाल लय्तायाः दाखमद्य त्वनाः तसकं काय्काच्वंगु दु। अथे जुयाः वया कलातं वयात सुथ तक नं छुं मधासे च्वन। 37 सुथ न्हापां दाखमद्यं मकाःबलय् वया कलाः अबीगेलं फुक्क खँ कनाबिल, अले व ला छुं हे मचायाः ल्वहं थें जुयाः सने मफयावन। 38 झिंन्हु लिपातिनि परमप्रभुं वयात हय्कयादिल अले व सित। 39 नाबाल सित धकाः दाऊदं न्यन अले धाल, “परमप्रभुया प्रशंसा जुइमा! जितः मभिंकाः हेस्याःगुलिं वय्कलं वयात ब्वलासायादिल अले जितः मभिं यायेगुपाखें बचय् यानादिल। नाबालं याःगु मभिंगु ज्या परमप्रभुं वयागु हे छेनय् प्वंकादिल।” अनंलि दाऊदं थः च्यःतपाखें अबीगेलयात थःनापं ब्याहा यायेगु निंतिं खबर छ्वल। 40 वया च्यःत कर्मेलय् अबीगेलयाथाय् वनाः थथे धाल, “छिं हाकनं ब्याहा यायेत दाऊदं जिमित छितः काय्के छ्वयाहःगु खः।” 41 व जुरुक्क दन अले बँय् भ्वपुयाः थथे धाल, “जि वय्कःया दासी खः अले वय्कःया च्यःतय्गु तुति तकं सिलेमासां नं सिले।” 42 अले व काचाकाचां तयार जुयाः थः न्याम्ह दासीतनापं गधा गयाः खबर हःपिं दाऊदया मनूतनापं वन, अले व दाऊदया कलाः जुल। 43 दाऊदं यिजरेल पाखेंयाम्ह अहीनोमनापं नं ब्याहा यात। थुपिं निम्हं वया कलाः जुल। 44 उबलय् शाऊलं थः म्ह्याय् दाऊदया कलाः मीकलयात धाःसा गल्लीमया लेशया काय् पल्तिएलयात बी धुंकूगु खः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.