१ शमूएल 13 - नेवाः बाइबलशाऊलं पलिश्तीतय्नापं लडाइँ याःगु 1 शाऊल जुजु जूबलय् स्विदँ दुम्ह खः। वं इस्राएलय् पिइनिदँ राज्य यात। 2 शाऊलं स्वद्वः मनूत ल्यल अले थःनापं मिकमाशय् व बेथेलया पहाडया देशय् निद्वः तल अले थःकाय् जोनाथननापं बेन्यामीन कुलया इलाका दुने गिबाय् द्वःछि छ्वत। अले ल्यंदुपिं मनूतय्त धाःसा वं छेँ तुं लित छ्वयाबिल। 3 जोनाथनं गेबाय् च्वंगु पलिश्तीतय्गु छाउनी हमला यात। थुकिया खबर पलिश्तीतय्गु दथुइ थ्यन। अले शाऊलं “फुक्क हिब्रूत न्यँ” धकाः देय्न्यंक तुरही पुइकल। 4 अले शाऊलं पलिश्तीतय्गु छाउनीइ हमला यात व पलिश्तीतय्सं इस्राएलीतय्त तसकं मय्कल धयागु खँ फुक्क इस्राएलीतय्सं न्यन। अथे जुयाः वयागु इनाप न्यनाः इपिं गिलगालय् शाऊलयाथाय् मुंवल। 5 अले पलिश्तीत इस्राएलीतनापं लडाइँ यायेत छथाय् मुन। इमिके स्वद्वः रथ व खुद्वः रथ चले याइपिं व समुद्रया सिथय्या फि ति हे अल्याख न्यासि वनीपिं सिपाइँत दु। इपिं थाहां वनाः बेथ-आवनया पुर्बय् मिकमाशय् छाउनी तल। 6 इस्राएलीत तसकं संकष्टय् लात, छाय्धाःसा इपिं शत्रुतपाखें आपतय् लाःगु खः। अथे जुयाः इपिं गुफाय्, झालय् व लःकुथिइ, ल्वहं कापिचाय् व तुंथिइ सुचुवन। 7 गुलिं गुलिं हिब्रूत यर्दन खुसि पुलाः गाद व गिलादया जिल्लाय् तक नं बिस्युं वन। शाऊल धाःसा गिलगालय् हे च्वनाच्वन व वया ल्यूल्यू वःपिं फुक्क मनूत ग्यानाः तसकं खात। शाऊलं आज्ञा मानय् मयाःगु व शमूएलं ब्वःब्यूगु 8 शमूएलं धाःकथं शाऊल न्हय्न्हु तक पियाच्वनाच्वन तर शमूएल गिलगालय् मवः। अले वया मनूतय्सं शाऊलयात त्वःताहल। 9 अथे जुयाः शाऊलं धाल, “होमबलि व मेलबलित जिथाय् हजि।” अले वं होमबलि छाल। 10 शाऊलं होमबलि नकतिनि छाये सिधय्कूबलय् शमूएल वल अले शाऊल वयात नाप लानाः लसकुस यायेत वन। 11 शमूएलं धाल, “थ्व छिसं छु यानादियागु?” शाऊलं लिसः बिल, “मनूत जितः त्वःताः बिस्युं वंगु जिं खना अले छिसं क्वछ्यूगु इलय् छि नं झाया मदी। पलिश्तीत धाःसा मिकमाशय् मुनेगु शुरु यात। 12 जिं थथे बिचाः याना की ‘पलिश्तीतय्सं जितः गिलगालय् हमला यायेत वइ अले जिं ग्वाहालिया निंतिं परमप्रभुयाके बिन्ति नं यानागु मदु।’ अथे जुयाः जिं होमबलि छाये हे माः धकाः मतिइ तयाः थथे यानागु खः।” 13 शमूएलं शाऊलयात धाल, “छिसं मूर्ख ज्या यानादिल। परमप्रभु छिकपिनि परमेश्वरं छितः बियादीगु आज्ञाकथं छिसं यानामदी। छिसं मानय् याःगु जूसा वय्कलं छिगु राज्य इस्राएलय् सदांया निंतिं ल्ययादी। 14 तर आः छिगु राज्य सदांया निंतिं जुइ मखु। परमप्रभुं थःगु मन नाप मिलय् जूम्ह छम्ह मनू मालादीगु दु। अले वयात हे इस्राएलीतय् नायः ल्ययादीगु दु, छाय्धाःसा छिसं परमप्रभुया आज्ञा मानय् मया।” 15 अनंलि शमूएल गिलगाल त्वःताः बेन्यामीनया गिबापाखे वन। अले शाऊलं थःनापं दुपिं मनूत ल्याः खात। इपिं खुसः ति जक दु। ल्वाभः मदुपिं इस्राएलीत 16 शाऊल, वया काय् जोनाथन व व नापं दुपिं मनूत बेन्यामीनया गिबाय् च्वन। पलिश्तीतय्सं धाःसा मिकमाशय् पाल ग्वल। 17 पलिश्तीतय्गु पालं लुतय् याइपिं स्वंगू पुचः वल। छगू पुचः शूआलया जिल्लाय् दुगु ओप्रापाखे वन। 18 मेगु पुचः बेथ-होरोनपाखे वन। अले स्वंगूगु पुचः मरुभूमिया लिक्क लाःगु सबोईमया ब्यासिया च्वय् सिमानापाखे वन। 19 उगु इलय् इस्राएल न्यंक गन नं नँकःमि मदु, छाय्धाःसा पलिश्तीतय्सं हिब्रूतय्गु तरवार व भाला मदय्केगु क्वःछिनातःगु खः। 20 इस्राएलीतय् थथःगु कु, त्वःकू, पा व ईंचा नं पलिश्तीतय्थाय् पाँय् तय्केत वनेमाः। 21 छपु कु व त्वःकू पाँय् तयेगु ज्याला निगू वहःया कुचा, अले द्वहं ख्यायेगु क्वाकेचा मिलय् यायेगु व पा पाँय् तयेगु ज्याला छगू शेकेल वहःया स्वब्वय् छब्व खः। 22 अथे जुयाः लडाइँ शुरु जूबलय् शाऊल व जोनाथनया ल्यूल्यू वःपिं मनूतय्के तरवार व भाला मदु। शाऊल व जोनाथनयाके जक दु। 23 उबलय् मिकमाशया भन्ज्याङ रक्षा यायेत पलिश्तीतय्सं छपुचः सिपाइँत छ्वयाहल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.