१ इतिहास 15 - नेवाः बाइबलसनू यरूशलेमय् हःगु 1 दाऊदं दाऊदया शहरय् थःगु लागि लाय्कू दय्कल। वं परमेश्वरया बाचाया सनू तयेत छगूथाय् नं दय्कल। अले उकिया लागि छगू पाल ग्वल। 2 अले लेवीतय्सं जक परमेश्वरया सनू क्वबीमा धकाः वं आज्ञा बिल। छाय्धाःसा परमप्रभुं इमित हे सनू क्वबीत व न्ह्याबलेंया सेवा यायेत ल्यःगु खः। 3 थुकथं दाऊदं इस्राएलीयापिं सकल मनूतय्त बाचाया सनू उकिया लागि वं दय्कूगु थासय् हयेत यरूशलेमय् सःतल। 4 अनंलि वं हारूनया सन्तान व लेवीतय्त सःतके छ्वल। 5 कहातया सन्तानपाखें नायः उरीएल व वया १२० म्ह थःथिति वल। 6 मरारीया सन्तानपाखें नायः असायाह व वया २२० म्ह थःथिति वल। 7 गेर्शोनया सन्तानपाखें नायः योएल व वया १३० म्ह थःथिति वल। 8 एलीजापानया सन्तानपाखें नायः शमायाह व वया २०० म्ह थःथिति वल। 9 हेब्रोनया सन्तानपाखें नायः एलीएल व वया ८० म्ह थःथिति वल। 10 उज्जीएलया सन्तानपाखें नायः अम्मीनादाब व वया ११२ म्ह थःथिति वल। 11 दाऊदं सादोक व अबियाथार पुजाहारीत व खुम्ह लेवीत उरीएल, असायाह, योएल, शमायाह, एलीएल व अम्मीनादाबयात सःतल। 12 अले इमित थथे धाल, “छिपिं हे लेवीतय् परिवार परिवारयापिं नायःत खः। छिमिसं थःपिन्त व छिमि थःथितितय्त पवित्र या। अले परमप्रभु इस्राएलया परमेश्वरया बाचाया सनू जिं व तयेत दय्कागु थासय् हजि। 13 थ्व सिबें न्हापा अन छिपिं मदुगुलिं परमप्रभु परमेश्वर जिपिं खनाः तंचायादिल। छाय्धाःसा जिमिसं बाचाया सनू गथे यानाः हयेमाः धकाः वय्कःयाके मन्यन।” 14 उकिं परमप्रभु इस्राएलया परमेश्वरयागु सनू हयेत पुजाहारीत व लेवीतय्सं थःपिन्त पवित्र यात। 15 मोशां परमेश्वरया वचनकथं आज्ञा ब्यू थें लेवीतय्सं परमेश्वरया सनू न्वःनापं थथःगु ब्वहलय् क्वबिया हल। 16 अनंलि दाऊदं लेवीतय् नायःतय्त इमि थःथितिपिन्त लसताया म्ये हालेत व सारंगी, वीणा व भुस्यालं संगीत थायेत म्ये हालीपिं व बाजं थाइपिंकथं ल्यः धकाः आज्ञा बिल। 17 अले लेवीतय्सं योएलया काय् हेमान व वया दाजुकिजापिंपाखें बेरेक्याहया काय् आसाप व इमि दाजुकिजापिंपाखें मरारीतपाखें कूशायाहया काय् एतानयात ल्यल। 18 इपिंनापं इमिसं निगूगु थासय् च्वंपिं थःथितित जकरिया, याजीएल, शमीरामोत, यहीएल, उन्नी, एलीआब, बनायाह, मासेयाह, मत्तित्याह, एलीपलेहू, मिक्नेयाह व लुखा पिवाःत ओबेद-एदोम व यीएलयात ल्यल। 19 म्ये हालामि हेमान, आसाप व एतानयात कँय्यागु भुस्याः थायेत ल्यल। 20 सारंगीइ अलामोत धाःगु राग थायेत जकरिया, अजीएल, शमीरामोत, यहीएल, उन्नी, एलीआब, मासेयाह व बनायाहयात ल्यल। 21 अले वीणाय् शिमिनिथ धाःगु राग थायेत मत्तित्याह, एलीपलेहू, मिक्नेयाह, ओबेद-एदोम, यीएल व अजज्याहयात ल्यल। 22 संगीत ज्ञान दुम्ह जुयाः इमिसं कनन्याहयात म्ये हालीपिं लेवीतय्त जिम्मा बिल। 23 बाचाया सनूया पिवाः च्वनीपिं बेरेक्याह व एल्काना खः। 24 परमेश्वरया सनूया न्ह्यःने तुरही पुइपिं पुजाहारीत शबन्याह, योशापात, नतनेल, अमासै, जकरिया, बनायाह व एलीएजर खः। ओबेद-एदोम व येहियाह उकिया लुखा पिवाःत खः। 25 अले दाऊद व इस्राएलयापिं थकालित व द्वःछि-द्वःछिम्ह सिपाइँतय् नायःत ओबेद-एदोमया छेँनं लय्लय्तातां बाचाया सनू हयेत वन। 26 परमप्रभुया बाचाया सनू क्वबिपिं लेवीतय्त परमेश्वरं ग्वाहालि बियादीगुलिं इमिसं न्हय्म्ह द्वहं व न्हय्म्ह भ्याःचायात बां बिल। 27 दाऊद व सनू क्वबिपिं सकल लेवीत म्ये हालीपिं व म्ये हालिपिनि नायः कनन्याहं मलमलयागु वसः फिनातःगु दु। दाऊदं मलमलया एपोद नं फिनातःगु दु। 28 थथे सकल इस्राएलीतय्सं जयजय धकाः हा हां फैया नेकू व तुरही पुपुं अले भुस्याः, सारंगी व वीणा थाथां परमप्रभुया बाचाया सनू ज्वनाः वल। 29 परमप्रभुया बाचाया सनू दाऊदया शहर दुने यंकाच्वंबलय् शाऊलया म्ह्याय् मीकलं झ्यालं स्वल, वं दाऊद जुजुयात प्याखं हुलाच्वंगु व लय्लय्तातां तिन्हुंयाच्वंगु खनाः वं दाऊदयात घच्चाये कथं स्वल। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.