१ इतिहास 12 - नेवाः बाइबलदाऊदनापं मिलय् जूवःपिं बहादुर सिपाइँत 1 कीशया काय् शाऊलपाखें दाऊद बिस्युं जूबलय् सिक्लग शहरय् वनापं मिलय् जूवःपिं बहादुर सिपाइँत थुपिं खः – इपिं दाऊदयात लडाइँलय् ग्वाहालि ब्यूपिं बहादुर सिपाइँत मध्येयापिं खः। 2 इमिसं जव व खव ल्हातं धनुष वाण कय्के फु। अथे हे थुमिसं जव व खव ल्हाः छ्यलाः कप्तांचां ल्वहँ कय्के फु। इपिं बेन्यामीन कुलयापिं शाऊलया थःथिति खः। 3 इमि नायः गिबियाती शेमाहया काय्पिं अहीएजेर व वया ल्यूयाम्ह योआश खः। अले अज्मावेतया काय्पिं यजीएल व पलेत, बराकाह व अनातोती येहू, 4 गिबोनी यिश्मायाह, (यिश्मायाह स्विम्ह बहादुर मध्ये छम्ह बहादुर व स्विम्हय्सिया नायः खः) 5 यर्मिया, यहासेल, योहानान, व गदेराती योजाबाद, एलूजै, यरीमोत, बाल्याह, शमरयाह, हारूपी शपत्याह, 6 एल्काना, यिश्याह, अज्रेल, कोरह वंशयाम्ह योएजेर व याशोबाम, 7 गदोरया यरोहामया काय्पिं योएलह व जबदियाह खः। 8 गाद कुलयापिं छुं मनूत नं मरुभूमिइ दुगु किल्लाय् दाऊदनापं मिलय् जूवल। इपिं लडाइँया लागि तालिम कयातःपिं सिपाइँत खः। इमिसं भाला व ढाल बांलाक चले याये सः। इमिगु ख्वाः सिंहयागु ख्वाः थें च्वं, अले पहाड पहाडय् चल्ला थें ब्वाँय् वने फु। 9 एसेर इमि नायः खः, निम्हम्ह ओबदिया, स्वम्हम्ह एलिआब, 10 प्यम्हम्ह मिश्मन्ना, न्याम्हम्ह यर्मिया, 11 खुम्हम्ह अत्तै, न्हय्म्हम्ह एजीएल, 12 च्याम्हम्ह योहानान, गुम्हम्ह एल्जाबाद, 13 झिम्हम्ह यर्मिया व झिंछम्हम्ह मकबन्ने खः। 14 थुपिं गादीत सेनाया कप्तानत खः। इपिं मध्ये दकले चिधंम्ह सिपाइँ सछिम्ह सिपाइँति ग्यं। इपिं मध्ये दकले तःधंम्ह सिपाइँ द्वःछिम्ह सिपाइँति ग्यं। 15 न्हापांगु दँया न्हापांगु लाय् यर्दन खुसिइ सिथ सिथ तक हे लः जाया वःबलय् इमिसं खुसि छिल। अले खुसिया पुर्ब व पच्छिमया ब्यासि-ब्यासिइ च्वंपिं मनूतय्त लिनाछ्वत। 16 छकः बेन्यामीन व यहूदा कुलयापिं छपुचः मनूत दाऊद दुगु किल्लाय् वल। 17 इमित नापलायेत दाऊद पिहां वल अले थथे धाल, “छिपिं जितः ग्वाहालि बीत पासा जुयाः वयागु खःसा थन छिमित लसकुस दु। तर जिं छिमिगु छुं स्यंकागु मदुसां छिमिसं ध्वंलानाः जितः जिम्ह शत्रुतय्गु ल्हातय् बीत वयागु खःसा जिमि पुर्खातय् परमेश्वरं थ्व स्वयाः न्याय यानादीमा।” 18 उबलय् हे स्विम्ह मध्येया नायः अमासैयात परमेश्वरया आत्मां हपाःबियादिल। अले वं थथे धाल, “हे यिशैया काय् दाऊद जिपिं छिपाखे दु। छि ताःलायेमा छितः ग्वाहालि ब्यूपिं नं ताःलायेमा, छाय्धाःसा छिमि परमेश्वरं हे छन्त ग्वाहालि यानादी।” उकिं दाऊदं इमित लसकुस यात। वं इमित सेनाया नायःत दय्कल। 19 दाऊद पलिश्तीतनापं मिलय् जुयाः शाऊलनापं लडाइँ याः वनाच्वंबलय् मनश्शे कुलयापिं छुं सिपाइँत दाऊदयाथाय् बिस्युं वल। वं पलिश्तीतय्त ग्वाहालि धाःसा मयाः, छाय्धाःसा पलिश्तीतय् शासकतय्सं थज्याःगु सल्लाह यानाः वयात लितछ्वल, “थ्वं थः मालिकनापं मिलय् जुयाः झीत त्वःताबिल धाःसा झीगु छ्यं ल्यं दइ मखु।” 20 दाऊद सिक्लगय् लिहां वनाच्वंबलय् वयाथाय् बिस्युं वःपिं मनश्शे कुलयापिं सिपाइँत थुपिं खः – अदनाह, योजाबाद, येदीएल, मिखाएल, योजाबाद, एलीहू व सिल्लतै। थुपिं मनश्शेया द्वःछिम्ह द्वःछिम्ह सेनाया नायः खः। 21 इमिसं हे हमला याःवइपिं शत्रुतलिसे ल्वायेत दाऊदयात ग्वाहालि बिल। छाय्धाःसा इपिं सकलें बहादुर सिपाइँत खः, अले सेनाया नायःत जुल। 22 दाऊदयात ग्वाहालि बीत न्हिं न्हिं यक्व मनूत वया हे च्वन। थुकथं दाऊदयाके परमेश्वरया सेना थें च्वंगु छगू तःधंगु व बल्लाःगु सेना दत। हेब्रोनय् मेपिं दाऊदलिसे मिलय् जू वःगु 23 परमप्रभुं धयादीगु थें शाऊलया राज्य दाऊदया ल्हातय् बीत हेब्रोनय् ल्वाभः घानाः दाऊदलिसे मिलय् जूवःपिं मनूतय्गु ल्याः थथे दु – 24 यहूदा कुलं – ढाल व भाला ज्वनातःपिं खुद्वः व च्यासः (६,८००) म्ह सिपाइँत लडाइँया लागि वल। 25 शिमियोन कुलं – न्हयेद्वः व सच्छि (७,१००) म्ह लडाइँ यायेफुपिं सिपाइँत लडाइँया लागिं वल। 26 लेवी कुलं – प्यद्वः व खुसः (४,६००) म्ह। 27 हारूनया घरानाया नायः यहोयादानापं स्वद्वः व न्हय्सः (३,७००) म्ह मिजंत वल, 28 अले छम्ह बहादुर सिपाइँ सादोकनापं वयागु हे परिवारयापिं निइनिम्ह नायःत वल। 29 बेन्यामीन कुलं – स्वद्वः (३,०००) म्ह वल। इपिं शाऊलया थःथितित खः। उबलय् तक बेन्यामीन कुलयापिं आपालं मनूत शाऊलया घराना प्रति वफादार जुयाच्वंगु खः। 30 एफ्राइम कुलं – तसकं बहादुर व थथःगु वंशय् नांजाःपिं निइद्वः व च्यासः (२०,८००) म्ह सिपाइँ वल। 31 दाऊदयात जुजु दय्केत मनश्शेया बच्छि कुलं – झिंच्याद्वः (१८,०००) म्ह मनू वल। 32 इस्साखार कुलं – इस्राएलं छु यायेमाः धकाः स्यूपिं अले ईयात थूपिं निइसः (२००) म्ह नायःत व इमिसं धाःथें च्वनिपिं इमि थःथितित वल। 33 हानं जबूलून कुलं – लडाइँया लागि तयार जूपिं, फुक्क कथंया ल्वाभः ज्वनातःपिं दाऊद प्रति वफादार नेय्द्वः (५०,०००) म्ह सिपाइँ वल। 34 नप्ताली कुलं – द्वःछि (१,०००) म्ह हाकिमत अले ढाल व भाला ज्वनिपिं स्विन्हय्द्वःम्ह सिपाइँ वल। 35 दान कुलं – लडाइँया लागि तयार जूपिं निइच्याद्वः व खुसः (२८,६००) म्ह सिपाइँ वल। 36 अले आशेर कुलं – लडाइँया लागि तयार जूपिं पिइद्वः (४०,०००) म्ह सिपाइँ वल। 37 रूबेन, गाद व यर्दनया पुर्बपाखेया मनश्शेया बच्छि कुलं – फुक्क कथंयागु ल्वाभः ज्वनातःपिं छगू लाख व निइद्वः (१,२०,०००) म्ह सिपाइँ वल। 38 थुपिं सकले सिपाइँत लडाइँया लागि तयार जुयाः दाऊदयात इस्राएल न्यंकयाम्ह जुजु दये हे दय्के धकाः हेब्रोन शहरय् वःगु खः। इस्राएलयापिं मेपिं मनूत नं व हे तातुनां छप्पँ जूगु खः। 39 इपिं दाऊदनापं हेब्रोनय् स्वन्हु तक च्वन। इमि थःथितितय्सं इमिगु लागि नयेगु व त्वनेगु तयार याःगु खः। 40 इस्साखार, जबूलून व नप्ताली कुलयापिं मनूतय्सं नं गधा, ऊँट, खच्चर, व द्वहंयात क्वबिकाः छुचुं, यःमरि ग्वारा, किसमिस ज्वाँय्, दाखमद्य, जैतूनया चिकं हल। इमिसं स्यानाः नयेत सा द्वहं व फैत नं ज्वनावल। इस्राएलयापिं मनूत तसकं लय्ताः। |
© 2024 Nepal Bible Society, Newa Christian
Literature Center and Wycliffe Bible Translators, Inc.
Wycliffe Bible Translators, Inc.