Zefania 3 - ŊMALƐ KRƆŊKRƆŊ LƐ

Yerusalɛm he esha kɛ eheremɔ

¹ Kpoo ha Yerusalɛm, maŋ ni yi wa, maŋ ni lɛ diɛŋtsɛ ebule ehe!

² Ebooo mɔ ko mɔ ko wiemɔ toi lɛ, ekpɛlɛ̃ɛɛ tsɔsemɔ hu; ekɛ ehiɛ efɔ̃ɔɔ Yehowa nɔ lɛ, etsiii ebɛŋkɛɛɛ eNyɔŋmɔ lɛ.

³ Emli lumɛi lɛ jatai ni huuɔ ni, emli kojolɔi lɛ hu klãji hɔmɔwɔlɔi ni shiii niyenii ko niyenii ko ni je atsɛre nɔ.

⁴ Emli gbalɔi lɛ yiŋflɛflɛtsɛmɛi kɛ kutumpɔfoi sɔŋŋ ni; ni emli osɔfoi lɛ ebule nii ni yɔɔ krɔŋkrɔŋ, ni amɛtsɔ Nyɔŋmɔ mla lɛ hiɛ amɛbu shi.

⁵ Yehowa mɔ ni yɔɔ amɛteŋ yɛ maŋ lɛ mli lɛ, nɔ ni ja pɛ efeɔ; efeee nɔ ko ni ejaaa. Daa leebi lɛ efeɔ nɔ ni ja yɛ maŋ lɛ hiɛ, leebi ko kwraa bɛ ni efɔ̃ɔ jalɛ nii feemɔ. Shi nɔshafeelɔi lɛ ahiɛgble tɔ ejwa.

⁶ Yehowa kɛɛ akɛ, “Mikpãtã maji ahiɛ dã. Mikumɔ amɛtabilɔi atasui lɛ mishwie shi; ni amɛblohui amli kamɔ shi efoji, ni mɔ ko mɔ ko hooo yɛ mli; afite amɛmaji lɛ bɔ ni mɔ ko mɔ ko bɛ mli, ni mɔ ko mɔ ko ehiŋ amɛmli dɔŋŋ.

⁷ Mikɛɛ akɛ, ‘Anɔkwa, eeeshe mi gbeyei, ni eeekpɛlɛ̃ mitsɔsemɔ lɛ, ni ekuŋ ehiɛ efɔŋ mimlai ni miwo lɛ lɛ eko eko nɔ.’ Shi fɛɛ sɛɛ lɛ babaoo moŋ ni amɛfee nibii gbohiigbohii ji no.”

⁸ Yehowa kɛɛ akɛ, “No hewɔ lɛ, nyɛkwɛa mi gbɛ kɛyashi gbi nɔ ni mate shi maye odase mashi jeŋ maji lɛ; ejaakɛ mito miyiŋ akɛ mabua majimaji lɛ anaa, ni mabua maŋtsɛmɛi hu anaa kɛkpe, koni amɛsa mimlifu kɛ mimlila ni naa wa lɛ naa amɛkwɛ, ejaakɛ mikɛ miwuŋayeli lɛ mli mlifu la lɛ baakpãtã jeŋ muu lɛ fɛɛ hiɛ.

⁹ “Nakai be lɛ mibatsake majimaji lɛ adaaŋ wiemɔ koni amɛwiemɔ he atse; ni amɛ fɛɛ kwa amɛbaaja mi, Yehowa, kɛ wiemɔ ni he tse.

¹⁰ Mijalɔi ni ji mimɛi ni agbɛ ashwã lɛ ashwiei baajɛ Kush fai lɛ asɛɛ niiaŋ tɔ̃ɔ amɛkɛ afɔlei abahã mi.

¹¹ Nakai gbi lɛ nɔ lɛ, nyɛhiɛ gboŋ dɔŋŋ yɛ nibii ni nyɛfeefee nyɛkɛtse mihiɛ atua lɛ ahewɔ, ejaakɛ majie ntɛŋfeelɔi ni woɔ amɛhe nɔ fɛɛ yɛ nyɛteŋ, ni nyɛwoŋ nyɛhe nɔ dɔŋŋ yɛ migɔŋ krɔŋkrɔŋ lɛ nɔ,

¹² ejaakɛ mibashi gbɔmɛi omlɛfoi kɛ humii pɛ yɛ nyɛteŋ. Amɛbaatao abobaahe yɛ Yehowa gbɛi mli,

¹³ amɛ mɛi ni baashwɛ yɛ Israel lɛ. Amɛfeŋ nɔfɔŋ lɛ, amɛmaleŋ lɛ, mɔshishiumɔ wiemɔ ko ejeŋ amɛnaa. Amɛbaahi shi, ni amɛbaashwere, ni mɔ ko woŋ amɛhe gbeyei.”

Nyamɔ lala

¹⁴ Zion biyoo, la nyamɔ lala waa! Israel, bɔɔ oshe! Yerusalɛm biyoo, nya; omli afili bo kɛ otsui fɛɛ!

¹⁵ Yehowa efo otoigbalamɔ lɛ sɛɛ; eshwie ohenyɛlɔi lɛ fɛɛ kɛtee. Yehowa, Israel Maŋtsɛ lɛ, yɛ nyɛteŋ; nyɛsheŋ efɔŋ ko gbeyei dɔŋŋ!

¹⁶ Be miiba, be ni abaakɛɛ Yerusalɛm akɛ, “Kwɛ, Zion, kaashe gbeyei! Kaahã onijiaŋ miije wui!

¹⁷ Yehowa, oNyɔŋmɔ lɛ, kɛ bo yɛ, Taiatsɛ ni hãa ayeɔ kunim lɛ. Eeenya ohe kɛ miishɛɛ, eeeku sɛɛ esumɔ bo ekoŋŋ. Ebaala kɛ mliflimɔ yɛ ohewɔ,

¹⁸ tamɔ alaa yɛ gbijurɔ nɔ lɛ.” Yehowa kɛɛ akɛ, “Mibawo amanehulu kɛje onɔ koni ohiɛ akashwie shi yɛ no hewɔ!

¹⁹ Be lɛ miiba! Mikɛ mɛi ni haoɔ bo lɛ fɛɛ aaaye; Mahere mɛi fɛɛ ni tsɔɔ oshii ayiwala, ni makpala mɛi ni ashwie lɛ kɛba shĩa ekoŋŋ. Mahã amɛhiɛgbele lɛ atsɔ̃ hiɛsɔlɛ, ni amɛaana gbɛi yɛ shikpɔji fɛɛ anɔ.

²⁰ Nakai be lɛ mikɛ nyɛ baaba shĩa, be mli ni mibabua nyɛnaa lɛ. Mahã nyɛgbɛi ahehe, ni abaakafo nyɛ yɛ shikpɔŋ lɛ nɔ majimaji fɛɛ anɔ, ni mahã nyɛshwere ekoŋŋ yɛ nyɛ diɛŋtsɛ nyɛhiŋmɛiŋ.” Yehowa wiemɔ nɛ.