Zakaria 9 - ŊMALƐ KRƆŊKRƆŊ LƐ

Yehowa kojo jeŋmaji lɛ

¹ Yehowa wie eshi Hadrak shikpɔŋ lɛ ni nakai wiemɔ lɛ saa Damasko hu he; ejaakɛ Siria maji wuji lɛ hu Yehowa nɔ ji fɛɛ, tamɔ bɔ ni enɔ ji Israel akutsei lɛ.

² Enɔ ji Hamat hu ni kɛ Hadrak shikpɔŋ lɛ je husu lɛ, kɛ Tiro kɛ Sidon fɛɛ, tsɛbelɛ amɛnilee naa wa naakpa.

³ Tiro etswa gbogbo ewo ehe ni ebua jwiɛtɛi naa tamɔ mlu kɛ shika tsuru hu naa tamɔ blohuŋ shia.

⁴ Shi naa, Nuŋtsɔ lɛ baashɔ̃ enii ni ena nɛɛ fɛɛ yɛ edɛŋ, ni aaashɛrɛ enii kpakpai lɛ fɛɛ ashwie ŋshɔ mli; ni lɛ diɛŋtsɛ hu lɛ akɛ la aakpãtã ehiɛ.

⁵ Ashkelon maŋ lɛ aaana ni eeeshe gbeyei; Gaza hu aaana ni ehe aaakpokpo naakpa. Ekron hu aaana ejaakɛ ehiɛnɔkãmɔ lɛ aaafee yakatswaa. Gaza maŋtsɛ lɛ hiɛ aaakpãtã, ni Ashkelon hu baatsɔ̃ amaŋfɔ̃.

⁶ Yoo ajwamãŋbii aaahi Ashdod; Filistibii lɛ ahewoo lɛ, mafo sɛɛ.

⁷ Mahã amɛkpa loo ni emli lá fɛɛ tsereko yeli kwraa, ni amɛnihiinii tekeŋ amɛtsɛ̃ŋ, ni emli mɛi komɛi kɛ̃ aaashwɛ ahã wɔNyɔŋmɔ lɛ, amɛaatsɔ̃ tamɔ Yuda akutsei lɛ eko; ni Ekronbii hu aaatsɔ̃ tamɔ Yebusbii.

⁸ No sɛɛ lɛ, mabu miwebii lɛ ahe tamɔ bulɔ, koni asraafoi akuu ko kuu ko akatsɔ̃ shikpɔŋ lɛ nɔ kɛtee kɛba. Miŋmɛŋ gbɛ ni haolɔ ko agba miwebii lɛ anaa dɔŋŋ, ejaakɛ agbɛnɛ mi diɛŋtsɛ mihiŋmɛi kã amɛhe.

Wɔsɛɛ ko Maŋtsɛ

⁹ Omli afili bo, bo Zion biyoo; Bɔɔ oshe waa, bo Yerusalɛm biyoo! Naa, omaŋtsɛ lɛ miiba oŋɔɔ; Eeba kɛ agbojee kɛ kunimyeli. Eta teji oblanyo ni ji teji yoo bi ko nɔ.

¹⁰ Makpãtã ta shwiilii fɛɛ ni aaajɛ Efraim aba lɛ ahiɛ; ni majie ta okpɔŋɔ lɛ hu kɛje Yerusalɛm. Makumɔ tawuu gãii lɛ amli dukuduku. Eeeshi maji lɛ toiŋjɔlɛ ni elumɔyeli aaajɛ ŋshɔnaa kɛyagbee ŋshɔnaa. Ni eeejɛ Eufrate Faa lɛ naa kɛyashi je lɛ naagbee hei tɔ̃ɔ.

Nyɔŋmɔ webii lɛ akpɔ̃mɔ

¹¹ Nuŋtsɔ lɛ saa kɛɛ, “Bo Zion biyoo hu, Milá ni mikɛsɔo mikɛo teŋ kpãŋmɔ lɛ naa hewɔ lɛ, majie obii ni etsɔ̃mɔ gboklɛfoi lɛ yɛ bu ni nu bɛ mli lɛ mli.

¹² Nyɛ gboklɛfoi ni nyɛyɔɔ hiɛnɔkãmɔ, nyɛkua nyɛsɛɛ nyɛbaa mɔɔ ni wa lɛ mli. Ŋmɛnɛ gbi nɛɛ, miikɛɛ nyɛ akɛ mibato nyɛ najiaŋ toi enyɔ.

¹³ Ejaakɛ midɔ Yuda mli tamɔ gãitso, ni mikɛ Efraim efee egãimlibi. Bo Zion, matee obihii lɛ ashi, ni amɛaatsɔ̃ tamɔ tatsɛ klante yɛ midɛŋ, yɛ bo, Hela, obihii lɛ anɔ.”

¹⁴ Agbɛnɛ Yehowa aaapue yɛ ewebii lɛ anɔ ni egãimlibii lɛ aafliki tamɔ srawa gbalaa lɛ. Nuŋtsɔ Nyɔŋmɔ lɛ diɛŋtsɛ ni aaakpã eta tɛtɛrɛmantɛrɛ lɛ, ni eeefã tamɔ wuoyigbɛ lasuogbele.

¹⁵ Yehowa, Taiatsɛ lɛ, aaabu emɛi ahe; Amɛaatserɛ amɛhenyɛlɔi amli, ni amɛaanaanaa amɛ nɔ. Amɛaashwie amɛhenyɛlɔi alá shi ni lá lɛ aaaho tamɔ afɔleshãa kooloo lá ni afɔse kɛmiijɛ okpolu mli aashwie afɔleshãa latɛ nɔ.

¹⁶ Nakai gbi lɛ nɔ lɛ, Yehowa, amɛNyɔŋmɔ lɛ aaahere amɛyiwala; ejaakɛ etooku ji amɛ; Amɛaakpɛlɛ yɛ eshikpɔŋ lɛ nɔ tamɔ akekre he ojarawatɛi.

¹⁷ Shikpɔŋ lɛ nɔ aaaŋɔɔ, eeefee fɛo; abele aaahã oblahii afrɔke ni wain hee hu aaahã oblayei afrɔke.