Zakaria 5 - ŊMALƐ KRƆŊKRƆŊ LƐ

Wolokpo ni filikiɔ lɛ he ninaa

¹ Miwo mihiɛ nɔ ekoŋŋ ni mina wolo kpo ko ni miifiliki.

² Ni bɔfo lɛ bi mi akɛ, “Mɛni onaa nɛɛ?” Mihã lɛ hetoo mikɛɛ akɛ, “Miina wolo kpo ko ni miifiliki; ekɛlɛ ji ninetalɔi nyɔŋmai enyɔ kɛ elɛɛmɔ ninetalɔi nyɔŋma.”

³ Kɛkɛ ni ekɛɛ mi akɛ, “Enɛ ji loomɔ ni gbɛɔ eshwãa shikpɔŋ muu lɛ fɛɛ nɔ lɛ. No ji akɛ mɔ fɛɛ mɔ ni juɔ lɛ aaakpãtã ehiɛ yɛ shikpɔŋ lɛ nɔ; ni mɔ fɛɛ mɔ ni aaakã kitã ni eyeŋ nɔ lɛ aaana nakai toigbalamɔ lɛ nɔŋŋ.”

⁴ Yehowa Taiatsɛ lɛ kɛɛ akɛ, “Miihã loomɔ nɛɛ asa julɔ fɛɛ julɔ we he, kɛ mɔ fɛɛ mɔ ni tsɛɔ migbɛi ekɛkãa kitã ni eyeee nɔ lɛ hu we he. Loomɔ nɛɛ aaahi mɔ lɛ we lɛ nɔ kɛyaashi eeekpatã shĩa lɛ kɛ emli tsei kɛ tɛi fɛɛ ahiɛ.”

Yoo ni yɔɔ kɛntɛŋ lɛ mli lɛ he ninaa

⁵ Agbɛnɛ bɔfo ni kɛ mi wieɔ lɛ ba ekoŋŋ, ni ekɛɛ mi akɛ, “Wo ohiɛ nɔ ni okwɛ nɔ ni baa lɛ.”

⁶ Mibi lɛ akɛ, “Mɛni ni?” Ni ehere nɔ akɛ, “Kɛntɛŋ ni, ni edamɔ shi hã je lɛ fɛɛ he esha lɛ.”

⁷ No sɛɛ lɛ, agbele kɛntɛŋ lɛ naa; enaanɔ lɛ sumui akɛfee; ni yoo ko ta shi yɛ kɛntɛŋ lɛ mli.

⁸ Kɛkɛ ni bɔfo lɛ tsɔ̃ɔ naa akɛ, “Mɔ nɛ damɔ shi hã yiwalɛ.” Kɛkɛ ni enyɛ yoo lɛ nɔ ewo kɛntɛŋ lɛ mli, ni ekɛ kɛntɛŋ lɛ naanɔ ni akɛ sumui fee lɛ bu kɛntɛŋ lɛ naa.

⁹ Miwo mihiɛ nɔ ekoŋŋ ni mina yei enyɔ ni miifiliki kɛmiiba kɛ fiji ni tamɔ faanaa oka nɔ. Amɛbawo kɛntɛŋ lɛ kɛnyiɛ ŋwɛi kɛ shikpɔŋ teŋ kɛtee.

¹⁰ Mibi bɔfo ni kɛ mi wieɔ lɛ akɛ, “Nɛgbɛ amɛkɛ kɛntɛŋ lɛ yaa nɛɛ?”

¹¹ Ehã mi hetoo ekɛɛ akɛ, “Amɛkɛmiiya Babilon shikpɔŋ lɛ nɔ; koni amɛyama tsu yɛ jɛi amɛha lɛ. Kɛji agbe tsu lɛ maa naa lɛ amɛkɛ kɛntɛŋ lɛ baayi shi kɛyama egbɛhe.”