Zakaria 2 - ŊMALƐ KRƆŊKRƆŊ LƐ

Susumɔ kpãa lɛ he ninaa

¹ Misaa miwo mihiɛ nɔ, ni mina nuu ko ni hiɛ susumɔ kpãa yɛ edɛŋ.

² Mibi lɛ akɛ, “Nɛgbɛ oyaa?” Ehã mi hetoo ekɛɛ, “Miyasusu Yerusalɛm koni mana ekɛlɛ kɛ elɛɛmɔ.”

³ Ni naa, bɔfo lɛ ni kɛ mi wieɔ lɛ je kpo; ni bɔfo kroko hu je kpo tee kɛ lɛ yakpe.

⁴ Klɛŋklɛŋ bɔfo lɛ fã bɔfo kroko lɛ ekɛɛ, “Sha foi ni oyakɛɛ nɛkɛ oblanyo nɛɛ ni hiɛ susumɔ kpãa lɛ akɛ, Yerusalɛm he baakã efolo tamɔ akrowa ni atswako gbogbo awoko he yɛ emli gbɔmɛi kɛ kooloi ayifalɛ hewɔ.

⁵ Mi, Yehowa, matsɔ̃ la kɛbɔle maŋ lɛ he kɛkpe, tamɔ gbogbo, ni matsɔ̃ emli anunyam. Mi, Yehowa, mikɛɛ.”

Atsɛ Nomii lɛ akɛ amɛba shĩa

⁶ Yehowa kɛɛ, “Huui! Nyɛkua nyɛsɛɛ kɛjɛa kooyigbɛ shikpɔŋ lɛ nɔ kɛbaa Yerusalɛm; ejaakɛ mi, migbɛ nyɛ mishwã tamɔ ŋwɛi kɔɔyɔi ejwɛ lɛ.” Yehowa kɛɛ,

⁷ “Huui! Kuu osɛɛ oba Zion, bo mɔ ni okɛ Babilon biyoo lɛ yɔɔ lɛ.”

⁸ Bɔ ni Yehowa Taiatsɛ lɛ kɛɛ nɛ, “Enunyam lɛ sɛɛ lɛ etsu mi kɛtee maji ni hahaa nyɛnii lɛ aŋɔɔ; ejaakɛ kɛji mɔ ko ta nyɛhe lɛ eta mi diɛŋtsɛ mihiŋmɛiŋ ajaŋmalaatɛ he.

⁹ Naa, mawo minine nɔ yɛ amɛnɔ, ni amɛaatsɔ̃ haanii amɛhã amɛtsuji ni sɔ̃mɔ amɛ lɛ. No nyɛkɛaale akɛ Yehowa Taiatsɛ lɛ ni tsu mi nyɛŋɔɔ.”

¹⁰ “Nyɛlaa, ni nyɛmii ashɛa, nyɛ Yerusalɛmbii, shi naa, miba mibahi nyɛteŋ.”

¹¹ Nakai gbi lɛ nɔ lɛ, maji babaoo kɛ amɛhe aaahã Yehowa ni amɛaatsɔ̃ mimɛi, ni mahi amɛteŋ. No nyɛkɛaale akɛ Yehowa Taiatsɛ lɛ ni tsu mi nyɛŋɔɔ lɛ.

¹² Agbɛnɛ hu Yehowa aaaŋɔ Yuda akɛ egbɛfaŋnɔ yɛ shikpɔŋ krɔŋkrɔŋ lɛ nɔ; asaŋ eeeŋɔ Yerusalɛm hu akɛ emaŋ ekoŋŋ.

¹³ Gbɔmɛi fɛɛ afee dioo yɛ Yehowa hiɛ, ejaakɛ ete shi kɛjɛ eshihilɛhe krɔŋkrɔŋ lɛ.