Zakaria 1 - ŊMALƐ KRƆŊKRƆŊ LƐ

Yehowa tsɛ ewebii akɛ amɛku amɛsɛɛ kɛba

¹ Persia Maŋtsɛ Dario yinɔ afi ni ji enyɔ lɛ nɔ nyɔŋ ni ji kpaanyɔ lɛ nɔ lɛ, Yehowa kɛ gbalɔ Zakaria ni ji Berekia bi ni eji Ido nabi lɛ wie ni ekɛɛ mɛi lɛ akɛ,

² “Mi Yehowa, mimli efu nyɛtsɛmɛi lɛ waa naakpa.

³ No hewɔ lɛ, kɛɛmɔ amɛ akɛ bɔ ni mi Yehowa, Taiatsɛ lɛ, mikɛɔ amɛ nɛ, ‘Nyɛkpalea kɛbaa miŋɔɔ ni mi hu makpale kɛba nyɛŋɔɔ, mi Yehowa, Taiatsɛ lɛ, mikɛɛ.

⁴ Nyɛkafea nyɛnii tamɔ bɔ ni nyɛtsɛmɛi lɛ fee lɛ; mɛi ni tsutsu gbalɔi lɛ shiɛ tsɔ̃ɔ akɛ amɛje amɛgbɛi fɔ̃ji lɛ anɔ kɛ amɛnifeemɔ nii gbohii lɛ ahe lɛ. Ni amɛbooo toi, shi moŋ amɛkwa mi.

⁵ Nɛgbɛ nyɛtsɛmɛi lɛ yɔɔ? Ni gbalɔi lɛ hu ani amɛhiɔ shi kɛyaa naanɔ lo?

⁶ Shi miwiemɔi kɛ mikpɔi lɛ ni mikɛhã nyɛtsɛmɛi lɛ kɛtsɔ̃ mitsuji gbalɔi lɛ anɔ lɛ shɛ amɛdɛŋ, shi amɛyabuuu, ni amɛna he toigbalamɔ hu. No hewɔ lɛ, amɛshwa amɛhe ni amɛkɛɛ akɛ, Mi Yehowa, Taiatsɛ, bɔ ni mito akɛ mikɛ amɛ baaye yɛ amɛjeŋba kɛ nifeemɔnii hewɔ lɛ, nakai pɛpɛɛpɛ mikɛ amɛ eye nɛɛ.’ ”

Gbalɔ lɛ ninaa yɛ okpɔŋɔi ahe

⁷ Maŋtsɛ Dario yinɔ afi ni ji enyɔ lɛ nɔ nyɔŋ ni ji nyɔŋma kɛ ekome lɛ, ni ji Shebat nyɔŋ lɛ nɔ gbi nyɔŋmai enyɔ kɛ ejwɛ lɛ nɔ lɛ, Yehowa kɛ Gbalɔ Zakaria, Berekia bi lɛ, ni eji Ido nabi lɛ wie ekoŋŋ. No hewɔ lɛ, Zakaria gba ni ekɛɛ akɛ,

⁸ “Mina ninaa ko nyɔɔŋ ni nuu ko ta okpɔŋɔ tsuru nɔ, ni edamɔ shi yɛ mirto tsei ateŋ yɛ jɔɔ ko mli. Ni okpɔŋɔi tsuji kɛ okpɔŋɔi okɔbɛŋi kɛ okpɔŋɔi yɛji hu damɔ shi yɛ esɛɛ.”

⁹ Kɛkɛ ni, mi Zakaria, mibi nuu lɛ akɛ, “MiNuŋtsɔ, mɛni ji enɛɛmɛi nɛɛ?” Bɔfo lɛ hã mi hetoo akɛ, “Mibatsɔ̃ɔ bo amɛshishi.”

¹⁰ No hewɔ lɛ, bɔfo lɛ ni damɔ mirto tsei lɛ ateŋ lɛ hã hetoo akɛ, “Mɛnɛɛmɛi ji mɛi ni Yehowa tsu koni amɛyasara shikpɔŋ lɛ nɔ lɛ.”

¹¹ Kɛkɛ ni amɛ hu amɛ jie Yehowa bɔfo lɛ ni damɔ shi yɛ mirto tsei lɛ ateŋ ni wie lɛ naa amɛkɛɛ, “Wɔtee wɔyasara shikpɔŋ lɛ ni nɔ ni wɔna ji akɛ shikpɔŋ muu lɛ fɛɛ kã shi butuu ni hewalɛ ko bɛ lɛ.”

¹² Kɛkɛ ni Yehowa bɔfo lɛ wo egbee nɔ ekɛɛ, “Ao, Yehowa, afii nyɔŋmai kpawo sɔŋŋ nɛ ni omli fu Yerusalɛm kɛ Yuda maji lɛ. Mɛɛbe omusuŋ aaatsɔ̃ bo yɛ amɛhe?”

¹³ Yehowa kɛ bɔfo ni kɛ mi wieɔ lɛ wie miishɛjemɔ wiemɔ.

¹⁴ No hewɔ lɛ, bɔfo ni kɛ mi wieɔ lɛ kɛɛ mi akɛ, “Gbaa akɛ bɔ ni Taiatsɛ lɛ kɛɛ nɛ, Yerusalɛm kɛ Zion maji lɛ fɛɛ asane kã mitsui nɔ jogbaŋŋ diɛŋtsɛ.

¹⁵ Shi mimli efu maji ni he ejɔ amɛ lɛ naakpa, ejaakɛ be ni mimli fu mimaŋ lɛ fioo lɛ, jeŋmaji lɛ kã amɛnɔnaa lɛ mli.

¹⁶ No hewɔ lɛ, mikɛ musuŋtsɔlɛ eku misɛɛ kɛba Yerusalɛm; aaama miwe lɛ yɛ emli, ni aaatswa Yerusalɛm ama shi ekoŋŋ.”

¹⁷ “Shiɛmɔ ekoŋŋ akɛ bɔ ni Yehowa, Taiatsɛ lɛ, kɛɛ nɛ, ‘Mimaji lɛ aaashwere ekoŋŋ kɛ nii kpakpai, ni aaashɛje Zion mii, ni eeeŋɔ Yerusalɛm ekoŋŋ efee emaŋ.’ ”

Akloŋtoi lɛ ahe ninaa

¹⁸ Ni miwo mihiɛ nɔ, ni mina akloŋtoi ejwɛ yɛ ninaa kroko mli,

¹⁹ ni mibi bɔfo ni kɛ mi wieɔ lɛ akɛ, “Mɛni ji enɛɛmɛi?” Ehã mi hetoo ekɛɛ, “Enɛɛmɛi ji akloŋtoi ni ji nɔyelɔi ahewalɛi ni gbɛ Yuda kɛ Israel kɛ Yerusalɛm shwã lɛ.”

²⁰ Agbɛnɛ Yehowa jie sɔ̃lɔi ejwɛ etsɔ̃ɔ mi.

²¹ Ni mibi akɛ, “Mɛni mɛnɛɛmɛi hu baa amɛbafee?” Bɔfo lɛ hã mi hetoo akɛ, “Amɛba koni amɛbawo akloŋtoi ejwɛ ni gbɛ Yuda shwã bɔ ni mɔ ko mɔ ko wooo eyitso nɔ lɛ ahe gbeyei; amɛbakpɔlɔ maji lɛ akloŋtoi ni amɛkɛshilɛ Yuda shikpɔŋ lɛ, ni amɛkɛgbɛ Yuda amɛshwã lɛ.”