Yoshua 6 - ŊMALƐ KRƆŊKRƆŊ LƐ

Aye Yeriko nɔ kunim

¹ Be nɛɛ mli lɛ aŋã Yeriko maŋ lɛ agbo lɛ naa kpɛŋŋ yɛ Israelbii lɛ ahewɔ: mɔ ko mɔ ko ejɛɛɛ mli ejeee kpo lɛ, mɔ ko mɔ ko hu eyaaa mli.

² Kɛkɛ ni Yehowa kɛɛ Yoshua akɛ, “Naa, mibahã oye Yeriko kɛ emaŋtsɛ lɛ kɛ ehii kãkãlɔi lɛ anɔ kunim.

³ Bo kɛ hii tabilɔi lɛ fɛɛ, nyɛbɔlea Yeriko maŋ lɛ kɛkpea, shi kome daa gbi. Nyɛfea nakai kɛyashia gbii ekpaa.

⁴ Osɔfoi kpawo ahiɛ bɛji kpawo ni akɛ ojwɛni akloŋto fee kɛnyiɛ Kpãŋmɔ Adeka lɛ hiɛ. Gbi ni ji kpawo lɛ nɔ lɛ, nyɛbɔlea maŋ lɛ shii kpawo be mli ni osɔfoi lɛ miikpã bɛji lɛ.

⁵ Kɛji amɛkpã ojwɛni akloŋto bɛji lɛ, ni nyɛnu gbɛɛmɔ lɛ ni esɛɛ tsɛ kakadaŋŋ lɛ, maŋ muu lɛ fɛɛ abɔ oshe waa, ni maŋ lɛ he gbogbo lɛ baagbee shi shwɛtɛɛ, koni Israel tabilɔi lɛ ateŋ mɔ fɛɛ mɔ aya ehiɛ tɛ̃ɛ kɛbote maŋ lɛ mli.”

⁶ Yoshua, Nun bi lɛ, tsɛ osɔfoi lɛ, ni ekɛɛ amɛ akɛ, “Nyɛwoa Kpãŋmɔ Adeka lɛ, ni nyɛhãa osɔfoi kpawo ahiɛa ojwɛni akloŋto bɛji kɛnyiɛa Yehowa Kpãŋmɔ Adeka lɛ hiɛ.”

⁷ Ni Yoshua kɛɛ maŋ lɛ hu akɛ, “Nyɛfãa kɛhoa, ni nyɛbɔlea maŋ lɛ kɛkpea, ni nyɛhãa tabilɔi lɛ anyiɛa Yehowa Adeka lɛ hiɛ.”

⁸ Be ni Yoshua kɛ maŋ lɛ wie lɛ, osɔfoi kpawo lɛ ni hiɛ ojwɛni akloŋto bɛji kpawo lɛ fo mli kɛho yɛ Yehowa hiɛ, ni amɛyi hiɛ, ni amɛmiikpã bɛji lɛ, ni Yehowa Kpãŋmɔ Adeka lɛ nyiɛ amɛsɛɛ.

⁹ Tabilɔi lɛ nyiɛ osɔfoi ni kpãa tɛtɛrɛmantɛrɛi lɛ ahiɛ, ni tabilɔi lɛ ekomɛi hu nyiɛ Kpãŋmɔ Adeka lɛ sɛɛ. Be ni anyiɛ kɛyaa nɛɛ fɛɛ lɛ belɛ aakpã tɛtɛrɛmantɛrɛi lɛ.

¹⁰ Shi Yoshua wo maŋ lɛ shi ni ekɛɛ akɛ, “Nyɛkabɔa oshe, ni nyɛkahãa anua nyɛhe ni nyɛmiiwie kɛyashi gbi nɔ ni makɛɛ nyɛ akɛ nyɛbɔ oshe lɛ; no dani nyɛbɔ oshe.”

¹¹ Yoshua hã akɛ Yehowa Kpãŋmɔ Adeka lɛ bɔle Yeriko maŋ lɛ shi kome, ni asafo lɛ ba amɛshitoohe lɛ mli, ni amɛbawɔ jɛi.

¹² Enɔ jetsɛremɔ lɛ, Yoshua te shi leebi maŋkpa, kɛkɛ ni osɔfoi lɛ wo Yehowa Kpãŋmɔ Adeka lɛ,

¹³ ni osɔfoi kpawo lɛ ni hiɛɔ ojwɛni akloŋto bɛji lɛ kɛnyiɛɔ Yehowa Kpãŋmɔ Adeka lɛ hiɛ lɛ, yi mli ni amɛmiikpã bɛji lɛ; hii tabilɔi lɛ nyiɛ osɔfoi ni kpãa bɛji lɛ ahiɛ, ni ta ni nyiɛɔ sɛɛ lɛ nyiɛ Kpãŋmɔ Adeka lɛ sɛɛ. Be mli ni anyiɛ kɛyaa lɛ belɛ aakpã bɛji lɛ.

¹⁴ Gbi ni ji enyɔ lɛ nɔ hu Israelbii lɛ bɔle maŋ lɛ shi kome kɛkɛ, ni amɛku amɛsɛɛ kɛba amɛshitoohe lɛ mli. Nɛkɛ sɔŋŋ amɛfee kɛyashi gbii ekpaa.

¹⁵ Gbi ni ji kpawo lɛ nɔ lɛ, asafo lɛ te shi mra hiɛ futɛfutɛ mli be ni je bɔ̃i tsɛremɔ, ni amɛbɔle maŋ lɛ bɔ ni amɛfeɔ daa lɛ shii kpawo. Nakai gbi lɛ kɛkɛ nɔ lɛ amɛbɔle maŋ lɛ shii kpawo.

¹⁶ Shibɔlemɔ nɔ ni ji kpawo lɛ nɔ be ni osɔfoi lɛ ekpã bɛji lɛ, Yoshua kɛɛ Israelbii lɛ akɛ, “Nyɛbɔa oshe! Shi Yehowa kɛ maŋ lɛ eke nyɛ tswaa.

¹⁷ Maŋ lɛ kɛ nɔ fɛɛ nɔ ni yɔɔ mli lɛ, akpãtã hiɛ ahã Yehowa, ja Rahab, yoo ajwamãŋ lɛ, kɛ mɔ fɛɛ mɔ ni yɔɔ eŋɔ̃ɔ yɛ ewe lɛ; amɛ kɛkɛ yi abaa, ejaakɛ Rahab ji mɔ ni kɛ bɔfoi lɛ ni wɔtsu lɛ tee.

¹⁸ Nyɛkwɛa nyɛhe ni ahia kɛkɛ yɛ musunii lɛ ahewɔ, koni nyɛkakɔa eko ni nyɛkɛloo musu koni kɛtsɔ̃ no nɔ lɛ nyɛhã Israel asafo muu lɛ hu loo musu, ni ehã amane ba Israel nɔ.

¹⁹ Shi moŋ jwiɛtɛi fɛɛ kɛ shika fɛɛ kɛ agbɛnɛ nɔ fɛɛ nɔ ni akɛ akɔɔble loo dade fee lɛ, ajɔɔ nɔ ahã Yehowa, ni no hewɔ lɛ, aloo ni akɛba Yehowa nitoohe lɛ.”

²⁰ Kɛkɛ ni Israelbii lɛ bɔ oshe, ni akpã bɛji lɛ. Be ni asafoi lɛ nu bɛji lɛ agbɛɛmɔ lɛ, amɛbɔ oshe kpeteŋkple. Kɛkɛ ni Yeriko maŋ lɛ he gbogbo lɛ gbee shi shwɛtɛɛ, ni Israelbii lɛ bote maŋ lɛ mli, mɔ fɛɛ mɔ tee ehiɛ tɛ̃ɛ, ni amɛŋɔ̃ maŋ lɛ.

²¹ Amɛkpãtã maŋ lɛŋ nɔ fɛɛ nɔ hiɛ yɛ klante naa, hii kɛ yei kɛ gbekɛbii kɛ onukpai, kɛ toi kɛ tsinai kɛ tejii fɛɛ.

²² Yoshua kɛɛ hii enyɔ lɛ ni etsu kɛtee amɛyasara shikpɔŋ lɛ nɔ lɛ akɛ, “Nyɛyaa yoo ajwamãŋ lɛ shĩa lɛ koni nyɛyaŋɔa lɛ kɛ ehe gbɔmɛi fɛɛ ni yɔɔ eŋɔ̃ɔ kɛjea kpo tamɔ bɔ ni nyɛkã lɛ kitã lɛ.”

²³ No hewɔ lɛ, oblahii lɛ ni tee nigii amɛyasara shikpɔŋ lɛ bote maŋ lɛŋ, ni amɛyaŋɔ Rahab kɛ etsɛ kɛ enyɛ kɛ enyɛmimɛi hii kɛ nɔ fɛɛ nɔ ni eyɔɔ kɛ ewekumɛi fɛɛ kɛje kpo kɛba, ni ahã amɛ he ko ni amɛhi yɛ Israelbii lɛ ashitoohe lɛ sɛɛ.

²⁴ Israelbii lɛ shã Yeriko maŋ lɛ kɛ emli nɔ fɛɛ nɔ ja jwiɛtɛi kɛ shika kɛ nibii ni akɛ akɔɔble kɛ dade fee kɛkɛ. Nomɛi lɛ amɛtee amɛkɛyawo Yehowa we lɛ nitoohe lɛ.

²⁵ Yoshua here Rahab, yoo ajwamãŋ lɛ, kɛ etsɛ we lɛ kɛ emɛi fɛɛ ayiwala, ni Rahab yahi Israelbii ateŋ kɛbashi ŋmɛnɛ; ejaakɛ lɛ ji mɔ ni kɛ bɔfoi ni Yoshua tsu, ni amɛyasara Yeriko lɛ tee.

²⁶ Ni Yoshua kã amɛ kitã yɛ nakai be lɛ mli akɛ, “Mɔ ni aaate shi akɛ ebaasaa Yeriko maŋ nɛɛ ema lɛ, alomɔ lɛ yɛ Yehowa hiɛ. Ekɛ ekromɔbi wala baatse nitsumɔ lɛ shishitoo, ni ekɛ ebi sɛɛkpelɔ wala baatse maŋ lɛ agboi lɛ taramɔ.”

²⁷ Yehowa bu Yoshua he, ni no hewɔ lɛ, egbɛi hehe yɛ shikpɔŋ lɛ nɔ fɛɛ.