Yoshua 3 - ŊMALƐ KRƆŊKRƆŊ LƐ

Israelbii lɛ fo Yordan Faa lɛ

¹ Kɛkɛ ni Yoshua te shi leebi maŋkpa, ni lɛ kɛ Israelbii lɛ fɛ̃ɛ fã kɛjɛ Akasia shitoohe lɛ, ni amɛba Yordan Faa lɛ naa. Amɛwɔ yɛ jɛi dani amɛfo faa lɛ.

² Gbii etɛ̃ sɛɛ lɛ maŋnɔkwɛlɔi lɛ kpa shitoohe lɛ mli,

³ ni amɛwo maŋbii lɛ shi amɛkɛɛ, “Kɛji nyɛna osɔfoi lɛ, ni ji Levibii lɛ, tere Yehowa, nyɛNyɔŋmɔ lɛ, Kpãŋmɔ Adeka lɛ kɛho pɛ, nyɛ hu nyɛfãa kɛjɛa hei ni nyɛyɔɔ lɛ koni nyɛnyiɛa sɛɛ, bɔ ni afee ni nyɛna he ni gbɛ lɛ kã, ejaakɛ nyɛtsɔ̃ko gbɛ nɛɛ nɔ dã.

⁴ Kɛ̃lɛ gbɛ akã nyɛ kɛ Kpãŋmɔ Adeka lɛ teŋ, gbɛ ni kɛji asusu lɛ aaafee ninetalɔi akpei enyɔ; nyɛkabɛŋkɛa Kpãŋmɔ Adeka lɛ.”

⁵ Yoshua kɛɛ maŋbii lɛ akɛ, “Nyɛtsua nyɛhe ejaakɛ wɔ lɛ Yehowa baafee naakpɛɛ nii yɛ nyɛteŋ.”

⁶ Ni ekɛɛ osɔfoi lɛ akɛ, “Nyɛwoa Kpãŋmɔ Adeka lɛ koni nyɛkɛnyiɛa maŋ lɛ hiɛ.” Osɔfoi lɛ wo Kpãŋmɔ Adeka lɛ, ni amɛkɛnyiɛ maŋ lɛ hiɛ.

⁷ Yehowa kɛɛ Yoshua akɛ, “Mibabɔ̃i ohiɛ nyamwoo kɛjɛ ŋmɛnɛ gbi nɛɛ matsɔ̃ɔ Israelbii lɛ fɛɛ koni amɛkɛna amɛle akɛ bɔ ni mikɛ Mose hi shi lɛ, nakai nɔŋŋ mikɛ bo hu baahi shi.

⁸ Wo osɔfoi ni tere Kpãŋmɔ Adeka lɛ kitã akɛ, ‘Kɛji nyɛyanina Yordan Faa lɛ, nyɛwaa nyɛdamɔa faa lɛ mli.’ ”

⁹ Kɛkɛ ni Yoshua tsɛ maŋbii lɛ, ni ekɛɛ amɛ akɛ, “Nyɛtsia nyɛbaa biɛ koni nyɛbaboa Yehowa, nyɛNyɔŋmɔ lɛ, toi.”

¹⁰ Be ni maŋbii lɛ tsi ba lɛ, Yoshua kɛɛ amɛ akɛ, “Enɛ nyɛkɛaale akɛ Nyɔŋmɔ hiɛkãalɔ lɛ yɛ nyɛteŋ, ni akɛ shwiemɔ eeeshwie Kanaanbii lɛ kɛ Hitbii lɛ kɛ Hivbii lɛ kɛ Perizbii lɛ kɛ Girgashbii lɛ kɛ Amorbii lɛ kɛ Yebusbii lɛ kɛaaje nyɛhiɛ.

¹¹ Naa, shikpɔŋ tso muu lɛ fɛɛ Nuŋtsɔ lɛ Kpãŋmɔ Adeka lɛ miitsɔ̃ nyɛhiɛ kɛmiiho kɛmiiya Yordan mli.

¹² No hewɔ lɛ, nyɛhalaa hii nyɔŋma kɛ enyɔ kɛjɛa Israel akutsei lɛ amli, no ji akutso fɛɛ akutso ahã nuu kome.

¹³ Ni naa, amrɔ pɛ ni osɔfoi ni tere Yehowa, ni ji shikpɔŋ tso muu lɛ fɛɛ Nuŋtsɔ lɛ, Adeka lɛ anaji aaasa Yordan mli nu lɛ mli lɛ, nu lɛ aaakpa hoo, ni nu ni jɛɔ yiteŋgbɛ baa lɛ baawa, ni eeema shi tamɔ gbogbo.”

¹⁴ Lɛɛlɛŋ be ni maŋbii lɛ famɔ amɛbui lɛ koni amɛyafo Yordan lɛ, ni osɔfoi tere Kpãŋmɔ Adeka lɛ kɛnyiɛ amɛhiɛ,

¹⁵ ni mɛi ni tere Adeka lɛ bashɛ Yordan Faa lɛ naa, ni osɔfoi lɛ ni tere Kpãŋmɔ Adeka lɛ anaji na sa nu lɛ mli pɛ (ejaakɛ Yordan lɛ jeɔ ŋã nikpamɔ be mli fɛɛ),

¹⁶ kɛkɛ ni nu ni jɛ yiteŋgbɛ baa lɛ wa, ni ekwɔ kɛtee ŋwɛi shɔŋŋ, yɛ Adam ni ji maŋ ko ni bɛŋkɛ Zaretan lɛ he. Kɛkɛ ni nu ni kpelekeɔ shi kɛyaboteɔ Araba ŋshɔ, ni ji Ŋoo Ŋshɔ, lɛ mli lɛ tã, ni esɛɛ fo kwraa. Kɛkɛ ni Israelbii lɛ fo faa lɛ yɛ Yeriko ŋlɛnɔ tuuŋtu.

¹⁷ Be ni Israelbii lɛ fɛɛ nyiɛ shikpɔŋ gbiŋ nɔ kɛfoɔ faa lɛ, osɔfoi lɛ ni tere Yehowa Kpãŋmɔ Adeka lɛ wa damɔ shikpɔŋ gbiŋ nɔ yɛ Yordan teŋ tuuŋtu kɛyashi beyinɔ ni maŋ muu lɛ fɛɛ fo faa lɛ tã.