Yoshua 24 - ŊMALƐ KRƆŊKRƆŊ LƐ

Yoshua tsa eshɛɛyeli lɛ nɔ yɛ Shekem

¹ Yoshua bua Israel akutsei lɛ fɛɛ anaa kɛba Shekem. Kɛkɛ ni etsɛ maŋ onukpai lɛ kɛ weku nukpai lɛ kɛ kojolɔi lɛ kɛ maŋ nitsulɔi lɛ fɛɛ, ni amɛbadamɔ Nyɔŋmɔ hiɛ.

² Kɛkɛ ni Yoshua kɛɛ amɛ akɛ, “Naa nɔ ni Yehowa, Israel Nyɔŋmɔ lɛ, kɛɔ, ‘Teteete lɛ Eufrate Faa lɛ sɛɛ nyɛtsɛmɛi lɛ hi. Jɛi ji he ni Tera, ni ji Abraham kɛ Nahor tsɛ, hi ni amɛja nyɔŋmɔi krokomɛi.

³ Miyaŋɔ̃ nyɛtsɛ Abraham kɛjɛ Eufrate Faa lɛ sɛɛ, ni mihã ekpa Kanaan shikpɔŋ tso muu lɛ fɛɛ nɔ, ni mihã ewo shwiei babaoo. Miduro lɛ Isak,

⁴ ni miduro Isak hu Yakob kɛ Esau. Mikɛ Seir Gɔŋ lɛ nɔ shikpɔŋ lɛ hã Esau akɛ egbɛfaŋnɔ; shi Yakob kɛ ebii lɛ amɛ lɛ amɛyaje Ijipt.

⁵ Fee sɛɛ lɛ mitsu Mose kɛ Aaron, ni mikɛ nibii ni mifee yɛ Ijiptbii ashikpɔŋ lɛ nɔ lɛ hao Ijiptbii lɛ. No sɛɛ lɛ, mijie nyɛ kɛje Ijipt.

⁶ Be ni mijie nyɛtsɛmɛi lɛ yɛ Ijipt lɛ, Ijiptbii lɛ tiu amɛ kɛ ta shwiilii kɛ okpɔŋɔnɔtaralɔi kɛba Ŋshɔ Tsuru lɛ naa.

⁷ Nyɛtsɛmɛi lɛ bolɔ amɛtsɛ Yehowa, ni ekɛ duŋ kpii fo nyɛ kɛ Ijiptbii lɛ ateŋ; asaŋ ehã ŋshɔ lɛ yi, ni eha Ijiptbii lɛ anɔ. Nyɛna nɔ ni mifee Ijiptbii lɛ kɛ nyɛhiŋmɛi. Nyɛhi ŋã lɛ nɔ be babaoo.

⁸ “‘Kɛkɛ ni mikɛ nyɛ bashɛ Amorbii ni yɔɔ Yordan lɛ bokãgbɛ lɛ ashikpɔŋ lɛ nɔ. Amɛkɛ nyɛ wu, ni mijɔɔ amɛnɔ mihã nyɛ, ni nyɛye amɛnɔ kunim, ni nyɛŋɔ̃ amɛshikpɔŋ lɛ, ni mikpãtã amɛhiɛ beiaŋ ni nyɛnyiɛ gbɛ kɛbaa lɛ.

⁹ Kɛkɛ ni Moab maŋtsɛ Balak, Zipor bi lɛ, fã ta koni ekɛ Israel abawu. Etsu ayakpee Balaam, Beor bi lɛ, kɛba akɛ ebalomɔ nyɛ.

¹⁰ Shi mibooo lɛ toi; ni no hewɔ lɛ, jɔɔmɔ moŋ ejɔɔ nyɛ; ni mikɛjie nyɛ yɛ Balak dɛŋ.

¹¹ No sɛɛ ni nyɛfo Yordan lɛ, ni nyɛba Yeriko. Yeriko lumɛi lɛ kɛ nyɛ wu, ni nakai nɔŋŋ Amorbii lɛ kɛ Perizbii lɛ kɛ Kanaanbii lɛ kɛ Hitbii lɛ kɛ Girgashbii lɛ kɛ Hivbii lɛ kɛ Yebusbii lɛ hu kɛ nyɛ wu; shi mihã nyɛye amɛ fɛɛ amɛnɔ kunim.

¹² Mitsu sosomootii kɛtsɔ̃ nyɛhiɛ, ni amɛshwie Amorbii amaŋtsɛmɛi enyɔ lɛ yɛ nyɛhiɛ; shi jeee nyɛklante loo gãi naa foi amɛjo lɛ.

¹³ Mikɛ shikpɔŋ ni nyɛtsuko enɔ nii hã nyɛ, nyɛmiiye emli ŋɔɔmɔ; mikɛ maji hu ni jeee nyɛ ni nyɛto hã nyɛ, ni nyɛyɛ amɛmli. Nyɛmiiye wain tromi kɛ mutso ŋmɔji ni jeee nyɛ ni nyɛhu amli nii.’

¹⁴ “No hewɔ lɛ, nyɛshea Yehowa gbeyei, ni nyɛjiea nyɛyitsoŋ nyɛsɔ̃mɔa lɛ kɛ anɔkwayeli; nyɛkwaa nyɔŋmɔi ni nyɛtsɛmɛi atsɛmɛi lɛ sɔ̃mɔ yɛ Mesopotamia kɛ Ijipt hu lɛ koni nyɛsɔ̃mɔ Yehowa.

¹⁵ Kɛji esaaa nyɛhiɛ akɛ nyɛaasɔ̃mɔ Yehowa lɛ, no lɛ ŋmɛnɛ gbi nɛɛ lɛ nyɛkɔa mɔ ni nyɛaasɔ̃mɔ, nyɔŋmɔi ni nyɛtsɛmɛi atsɛmɛi lɛ sɔ̃mɔ yɛ Mesopotamia shikpɔŋ lɛ nɔ lɛ ni jio, Amorbii ni nyɛyɔɔ amɛshikpɔŋ nɔ nɛɛ anyɔŋmɔi lɛ ni jio, nyɛkɔa; shi mi lɛ, mi kɛ miwe lɛ wɔbaasɔmɔ Yehowa.”

¹⁶ Maŋbii lɛ to he, ni amɛkɛɛ akɛ, “Enɛ akagbale wɔ fɔ̃ŋfɔ akɛ wɔɔshi Yehowa sɛɛ koni wɔyasɔ̃mɔ nyɔŋmɔi krokomɛi,

¹⁷ ejaakɛ Yehowa, wɔNyɔŋmɔ lɛ, lɛ ji mɔ ni jie wɔ kɛ wɔtsɛmɛi lɛ kɛje Ijipt shikpɔŋ lɛ nɔ, he ni aye wɔ nyɔŋ yɛ lɛ. Efee okadii wuji etsɔ̃ɔ wɔ, asaŋ ebaa wɔyi yɛ gbɛi ni wɔfãfãa fɛɛ mli kɛtsɔ̃ majimaji ateŋ kɛho.

¹⁸ Yehowa shwie Amorbii lɛ ni yɔɔ shikpɔŋ lɛ nɔ lɛ bluublu yɛ wɔhiɛ. No hewɔ lɛ, wɔ hu wɔɔsɔ̃mɔ Yehowa, ejaakɛ lɛ ji wɔNyɔŋmɔ.”

¹⁹ Shi Yoshua kɛɛ maŋbii lɛ akɛ, “Nyɛnyɛŋ Yehowa nyɛsɔ̃mɔ ejaakɛ Nyɔŋmɔ ni yɔɔ krɔŋkrɔŋ ni; ni Nyɔŋmɔ ni yeɔ awuŋã ji lɛ, ni ekɛ nyɛtɔ̃mɔi lɛ kɛ nyɛhe eshai ekeŋ nyɛ.

²⁰ Yɛ mli akɛ Yehowa efee nyɛ ejurɔ kɛho; shi kɛji nyɛshi lɛ esɛɛ, ni nyɛyasɔ̃mɔ maŋsɛɛ nyɔŋmɔi krokomɛi lɛ, no lɛ eeete shi ewo nyɛ, ni eeekpãtã nyɛhiɛ kɛmɔ shi.”

²¹ Maŋbii lɛ here Yoshua nɔ akɛ, “Dabi! Yehowa nɔŋŋ wɔbaasɔmɔ.”

²² Yoshua kɛɛ maŋbii lɛ akɛ, “Nyɛ diɛŋtsɛ nɔŋŋ ji midasefoi mɔ akɛ nyɛkɔ Yehowa akɛ mɔ ni nyɛbaasɔ̃mɔ.” Maŋbii lɛ to he akɛ, “Wɔmiiye he odase.”

²³ Kɛkɛ ni Yoshua kɛɛ amɛ agbɛnɛ akɛ, “Nyɛŋmɛa maŋsɛɛ nyɔŋmɔi krokomɛi ni nyɛhiɛhiɛ lɛ ahe mɔ koni nyɛjie nyɛyitsoŋ fɛɛ nyɛsɔ̃mɔ Yehowa, Israel Nyɔŋmɔ lɛ.”

²⁴ Maŋbii lɛ here Yoshua nɔ akɛ, “Yehowa, wɔNyɔŋmɔ lɛ, lɛ wɔɔsɔ̃mɔ, ni lɛ toi wɔɔbo!”

²⁵ No hewɔ lɛ, Yoshua kɛ maŋbii lɛ kpãŋ nakai gbi lɛ, ni ewo maŋ lɛ akpɔ kɛ mla fɛɛ yɛ Shekem.

²⁶ Yoshua ŋmã saji nɛɛ fɛɛ ewo Nyɔŋmɔ Mla Wolo lɛ mli. Kɛkɛ ni ewo tɛ kpeteŋkple ko ema tso wulu ni ma Yehowa Kpeehe Krɔŋkrɔŋ lɛŋ lɛ shishi.

²⁷ Enɛ sɛɛ lɛ Yoshua kɛɛ maŋbii lɛ fɛɛ akɛ, “Nɛkɛ tɛ nɛɛ aye wɔhe odase ejaakɛ enu wiemɔi ni Yehowa kɛ wɔ wie lɛ fɛɛ. No hewɔ lɛ, eeeye odase eshi nyɛ koni nyɛkakpa yɛ nyɛNyɔŋmɔ lɛ sɛɛ.”

²⁸ Kɛkɛ ni Yoshua wo maŋbii lɛ gbɛ, ni mɔ fɛɛ mɔ tee egbɛfaŋ shikpɔŋ nɔ.

Yoshua kɛ Eleazar gbele

²⁹ Saji nɛɛ asɛɛ lɛ Yehowa tsulɔ Yoshua, Nun bi lɛ, gbo be ni eye afii oha kɛ nyɔŋma.

³⁰ Afu lɛ yɛ lɛ diɛŋtsɛ egbɛfaŋ shikpɔŋ lɛ nɔ yɛ Timnat-Sera ni yɔɔ Efraim gɔji lɛ anɔ yɛ Gaash Gɔŋ lɛ kooyigbɛ lɛ.

³¹ Israelbii lɛ sɔ̃mɔ Yehowa yɛ Yoshua wala be mli fɛɛ, kɛ Yoshua gbele sɛɛ be mli fɛɛ, be ni onukpai hu ni le nibii ni Yehowa efee ehã Israel lɛ yɔɔ walaŋ lɛ.

³² Yosef gbonyo wui lɛ ni Israelbii lɛ wo kɛje Ijipt lɛ, amɛbafu yɛ Shekem yɛ shikpɔŋ kuku ko ni Yakob he lɛ jwiɛtɛi kukuji oha yɛ Shekemtsɛ Hamor bii lɛ adɛŋ lɛ nɔ. Shikpɔŋ nɛɛ tsɔ̃ Yosef shwiei lɛ agbɛfaŋnɔ.

³³ Fee sɛɛ lɛ Aaron bi Eleazar hu gbo, ni afu lɛ yɛ Gibea, ni ji maŋ ni akɛhã ebi Finehas yɛ Efraim gɔji lɛ anɔ lɛ mli.