Yoshua 22 - ŊMALƐ KRƆŊKRƆŊ LƐ

Yoshua wo Akutsei ni yaahi Yordan lɛ Bokãgbɛ lɛ gbɛ

¹ Agbɛnɛ Yoshua tsɛ Rubenbii lɛ kɛ Gadbii lɛ kɛ Manasebii lɛ akutso lɛ fã kome lɛ kɛbakpe,

² ni ekɛɛ amɛ akɛ, “Nyɛye kitãi fɛɛ ni Yehowa tsulɔ Mose wo nyɛ lɛ anɔ, ni nyɛbo mi toi yɛ nɔ fɛɛ nɔ ni mifã nyɛ akɛ nyɛfee gbɛfaŋ.

³ Nyɛshiko nyɛnyɛmimɛi lɛ gbii abɔ nɛɛ fɛɛ kɛbashi ŋmɛnɛ; ni nyɛkwɛ ni nyɛye Yehowa, nyɛNyɔŋmɔ lɛ, wiemɔ lɛ nɔ pɛpɛɛpɛ.

⁴ Agbɛnɛ Yehowa, nyɛNyɔŋmɔ lɛ, ehã nyɛnyɛmimɛi lɛ ahe ejɔ amɛ tamɔ bɔ ni ewo amɛ shi lɛ. No hewɔ lɛ, agbɛnɛ nyɛkua nyɛsɛɛ ni nyɛyaa nyɛshikpɔŋ ni Yehowa tsulɔ Mose kɛhã nyɛ momo, yɛ Yordan lɛ bokãgbɛ, akɛ nyɛgbɛfaŋnɔ lɛ nɔ.

⁵ Shi moŋ nyɛkwɛa nyɛhe nɔ jogbaŋŋ ni ahia koni nyɛye kitãi kɛ mlai lɛ ni Yehowa tsulɔ Mose wo nyɛ lɛ anɔ. No ji akɛ nyɛsumɔ nyɛNyɔŋmɔ lɛ, ni nyɛfee esuɔmɔnaanii, ni nyɛye ekitãi lɛ anɔ, ni nyɛye lɛ anɔkwa, ni nyɛsɔ̃mɔ lɛ kɛ nyɛtsui kɛ nyɛnyɛmɔ fɛɛ.”

⁶ Kɛkɛ ni Yoshua jɔɔ amɛ, ni ewo amɛ gbɛ amɛtee amɛshĩai amli.

⁷ Mose hã Manasebii lɛ akutso lɛ fã kome lɛ amɛgbɛfaŋ shikpɔŋ yɛ Bashan yɛ Yordan lɛ bokãgbɛ; shi Manasebii akutso lɛ fã kome ni shwɛ lɛ Yoshua hã amɛ amɛgbɛfaŋ shikpɔŋ yɛ amɛnyɛmimɛi akutsei lɛ ateŋ yɛ Yordan Faa lɛ anaigbɛ. Be ni Yoshua woɔ gbɔmɛi nɛɛ gbɛ koni amɛya amɛshikpɔŋ lɛ nɔ, ni ejɔɔ amɛ sɛɛ lɛ,

⁸ ekɛɛ amɛ akɛ: “Nyɛmiiku nyɛsɛɛ kɛya shĩa kɛ nyɛdɛŋnii babaoo ni nyɛna: tsinai babaoo diɛŋtsɛ, kɛ jwiɛtɛi kɛ shika kɛ akɔɔble kɛ dade kɛ mamai pii. Nyɛkɛ nyɛmimɛi lɛ ayajaa nyɛhenyɛlɔi lɛ anibii ni nyɛna lɛ.”

⁹ Kɛkɛ ni Rubenbii lɛ kɛ Gadbii lɛ kɛ Bokãgbɛ Manasebii lɛ akutsei lɛ ku amɛsɛɛ kɛtee amɛgbɛfaŋ shikpɔŋ ni ahã amɛ lɛ nɔ. Amɛkɛ amɛnyɛmimɛi Israelbii krokomɛi lɛ gbala mli yɛ Shilo, yɛ Kanaan shikpɔŋ lɛ nɔ, koni amɛya Gilead shikpɔŋ lɛ ni ji amɛgbɛfaŋ shikpɔŋ ni ahã amɛ yɛ Yehowa fãmɔ ni efã kɛtsɔ̃ Mose nɔ lɛ naa lɛ nɔ.

Yordan lɛ naa Afɔleshãa latɛ lɛ

¹⁰ Be ni amɛbashɛ Yordan niiaŋ yɛ Kanaan shikpɔŋ lɛ nɔ gbɛ lɛ. Rubenbii lɛ kɛ Gadbii lɛ kɛ Bokãgbɛ Manasebii lɛ ma afɔleshãa latɛ yɛ jɛi Yordan naa. Afɔleshãa latɛ kpeteŋkple ni sa kwɛmɔ.

¹¹ Ayagba Israelbii krokomɛi lɛ akɛ, “Shi nyɛtara lo? Rubenbii lɛ kɛ Gadbii lɛ kɛ Manasebii lɛ akutso lɛ fã lɛ ema afɔleshãa latɛ yɛ Gelilot yɛ Yordan lɛ naa yɛ wɔgbɛfaŋ shikpɔŋ lɛ nɔ.”

¹² Be ni Israelbii krokomɛi lɛ nu sane nɛɛ lɛ, amɛsafo muu lɛ fɛɛ bakpe yɛ Shilo, ni amɛto amɛyiŋ akɛ amɛkɛ Rubenbii lɛ kɛ Gadbii lɛ kɛ Manasebii lɛ akutso lɛ fã kome lɛ yaawu.

¹³ No hewɔ lɛ, Israelbii lɛ tsu Osɔfo Eleazar bi Finehas kɛtee Rubenbii lɛ kɛ Gadbii lɛ kɛ Manasebii lɛ aŋɔɔ yɛ Gilead shikpɔŋ lɛ nɔ.

¹⁴ Ahã lumɛi nyɔŋma komɛi fata Finehas he kɛtee tsumɔ nɛɛ. No ji akɛ Israelbii lɛ akutso fɛɛ akutso hã lumɔ kome, ni lumɛi nɛɛ ateŋ mɔ fɛɛ mɔ yafee wekunukpa hu yɛ Israelbii lɛ ateŋ.

¹⁵ Amɛtee Rubenbii lɛ kɛ Gadbii kɛ Manasebii lɛ aŋɔ̃ɔ yɛ Gilead shikpɔŋ lɛ nɔ,

¹⁶ ni amɛyawie Yehowa webii lɛ anaa, ni amɛkɛɛ akɛ, “Mɛɛ tɔ̃mɔ ni nyɛtɔ̃ Nyɔŋmɔ nɔ nɛɛ? Nyɛ diɛŋtsɛ nyɛfɔleshãa latɛ ni nyɛma agbɛnɛ nɛɛ tsɔ̃ɔ akɛ nyɛkwa Yehowa, ni nyɛtse ehiɛ atua.

¹⁷ Aso amanehulu ni wɔna yɛ esha ni afee yɛ Peor lɛ hewɔ ni kɛbashi ŋmɛnɛ gbi nɛɛ tete wɔhe ejeko nakai esha lɛ mli, tsɛbelɛ wɔna esɛɛ amanehulu lɛ, no kɛkɛ faaa hãaa wɔ,

¹⁸ hewɔ ni nyɛkpaleɔ ŋmɛnɛ gbi nɛɛ yɛ Yehowa sɛɛ nɛɛ? Kɛji nyɛtse Yehowa hiɛ atua ŋmɛnɛ lɛ, wɔ lɛ, lɛ hu emli aaafu Israel asafo muu lɛ fɛɛ.

¹⁹ Kɛji nyɛsusuɔ akɛ nyɛgbɛfaŋ shikpɔŋ ni akɛhã nyɛ lɛ nɔ tseee lɛ, no lɛ nyɛfoa mli kɛbaa Yehowa shikpɔŋ lɛ nɔ, he ni Yehowa Kpee Buu Krɔŋkrɔŋ lɛ yɔɔ lɛ, koni nyɛbaŋɔa shikpɔŋ lɛ eko yɛ wɔteŋ akɛ nyɛgbɛfaŋnɔ. Nyɛkwɛa kɛkɛ ni nyɛkatsea Yehowa hiɛ atua, ni nyɛkatsea wɔ hu wɔhiɛ atua koni kɛjɛ Yehowa afɔleshãa latɛ lɛ sɛɛ lɛ, nyɛma nyɛ diɛŋtsɛ nyɛfɔleshãa latɛ kroko nyɛhã nyɛhe.

²⁰ Be ni Zera bi Akan yata musunii he lɛ, ani jeee Israel asafo muu lɛ fɛɛ Yehowa mli fu lo? Bɛjeee lɛ ekome kɛkɛ ehiɛ kpãtã yɛ etɔ̃mɔ lɛ hewɔ?”

²¹ Kɛkɛ ni Rubenbii lɛ kɛ Gadbii lɛ kɛ Manasebii akutso lɛ fã lɛ hã Israelbii aweku nukpai lɛ hetoo amɛkɛɛ akɛ,

²² “Ofe Koome, Nyɔŋmɔ Yehowa lɛ, lɛ ele wɔyitsoŋ eto, nɔ̃ hewɔ ni wɔfee nakai; no hewɔ lɛ, Israel hu ana ale. Kɛji Yehowa hiɛ atua ni wɔtse, aloo ŋmɛɛmɔ ni wɔŋmɛɛ hemɔkɛyeli ni wɔyɔɔ yɛ emli lɛ he, hewɔ ni wɔfee nɔ ni wɔfee nɛɛ lɛ, nyɛkɛ wɔhe akakea wɔ ŋmɛnɛ gbi nɛɛ,

²³ akɛ wɔma afɔleshãa latɛ bɔ ni afee ni wɔkpa Yehowa jamɔ. Aloo kɛji wɔma afɔleshãa latɛ lɛ koni wɔkɛshã shãa afɔle loo niyenii afɔle loo shidaa afɔle lɛ, no lɛ Yehowa diɛŋtsɛ atɔ he owele.

²⁴ Jeee nakai kwraa ji sane lɛ. Nɔ moŋ ni hã wɔfee nɛkɛ nii nɛɛ ji akɛ wɔshe gbeyei akɛ wɔsɛɛ ko lɛ, nyɛbii aaanyɛ amɛkɛɛ wɔbii akɛ, ‘Mɛni nyɛ hu nyɛkɔɔ yɛ Yehowa, Israel Nyɔŋmɔ lɛ, he?

²⁵ Nyɛle akɛ mɛni hewɔ ni Yehowa kɛ Yordan fo wɔ kɛ nyɛ, Rubenbii kɛ Gadbii, teŋ husu lɛ? Nyɛkɔɔɔ Yehowa he nɔ ko.’ Kɛkɛ lɛ nyɛbii baahã wɔbii akpa Yehowa jamɔ.

²⁶ Enɛ hewɔ jɛ ni wɔkɛɛ wɔhe akɛ, ‘Nyɛhãa wɔmãa afɔleshãa latɛ ko, jeee koni wɔkɛshã shãa afɔle loo gbee afɔle,

²⁷ shi moŋ koni eye he odase yɛ wɔ kɛ nyɛ teŋ, asaŋ kɛ wɔshwiei kɛ nyɛ hu nyɛshwiei ateŋ akɛ wɔshãa shãa afɔlei kɛ gbee afɔlei kɛ shidaa afɔlei wɔkɛsɔ̃mɔɔ Yehowa kɛji wɔmiija lɛ yɛ Shihilɛhe Krɔŋkrɔŋ lɛ hiɛ.’ No baahã wɔsɛɛ ko lɛ nyɛbii ebakɛŋ wɔbii akɛ, ‘Nyɛkɔɔɔ Yehowa he nɔ ko.’

²⁸ Wɔyiŋtoo ji akɛ kɛji aleee nɔ ni wɔsɛɛ ko aaakɛɛ wɔ diɛŋtsɛ loo wɔshwiei nakai lɛ, wɔnaa ni wɔbaajie ji, ‘Nyɛkwɛa afɔleshãa latɛ lɛ henɔ ni wɔtsɛmɛi lɛ ma, jeee yɛ shãa afɔle hewɔ, ni asaŋ jeee yɛ gbee afɔle hu hewɔ, shi moŋ bɔ ni afee ni eye wɔ kɛ nyɛ teŋ odase.’

²⁹ Enɛ akagbale wɔ fɔ̃ŋfɔ akɛ wɔɔtse Yehowa hiɛ atua, ni wɔkpale yɛ Yehowa sɛɛ ŋmɛnɛ, ni wɔshi Yehowa, wɔNyɔŋmɔ lɛ, afɔleshãa latɛ lɛ ni ma eKpee Buu Krɔŋkrɔŋ lɛ hiɛ lɛ sɛɛ; ni wɔma afɔleshãa latɛ kroko, ni wɔshã shãa afɔle loo niyenii afɔle loo gbee afɔle yɛ nɔ.”

³⁰ Rubenbii lɛ kɛ Gadbii lɛ kɛ Manasebii akutso lɛ fã kome lɛ naajiemɔ lɛ sa Finehas kɛ Israel asafo lɛ mli lumɛi nyɔŋma lɛ, ni ji Israelbii aweku nukpai ni fata Finehas he kɛba lɛ, ahiɛ jogbaŋŋ.

³¹ Kɛkɛ ni Finehas, Osɔfo Eleazar bi lɛ, kɛɛ Rubenbii lɛ kɛ Gadbii lɛ kɛ Manasebii lɛ akɛ, “Wɔna wɔle ŋmɛnɛ akɛ nyɛ kɛ wɔ fɛɛ hiɛ Yehowa jamɔ lɛ mli, ejaakɛ nyɛtɔ̃ko Yehowa nɔ kɛ nɔ ni nyɛfee lɛ. No hewɔ lɛ, nyɛhere Israel yɛ etoi ni kulɛ Yehowa baagbala lɛ mli.”

³² Enɛ sɛɛ lɛ Osɔfo Eleazar bi Finehas kɛ lumɛi lɛ kɛ Rubenbii lɛ kɛ Gadbii lɛ kɛ Manasebii lɛ gbala mli yɛ Gilead shikpɔŋ lɛ nɔ, ni amɛku amɛsɛɛ kɛba Israelbii lɛ aŋɔ̃ɔ yɛ Kanaan shikpɔŋ lɛ nɔ, ni amɛbabɔ amɛ amaniɛ.

³³ Israelbii lɛ nya amaniɛ lɛ he, ni amɛ jie Nyɔŋmɔ yi. No sɛɛ lɛ, amɛwieee he dɔŋŋ akɛ amɛmiifã ta koni amɛkɛ Rubenbii lɛ kɛ Gadbii lɛ ayawu koni amɛkpãtã shikpɔŋ ni amɛyɔɔ nɔ lɛ hiɛ.

³⁴ Rubenbii lɛ kɛ Gadbii lɛ kɛɛ akɛ, “Afɔleshãa latɛ nɛɛ ji odaseyeli nɔ hã wɔ akɛ Yehowa lɛ, lɛ ji Nyɔŋmɔ.” No hewɔ lɛ, amɛwo afɔleshãa latɛ nɛɛ gbɛi akɛ, “Odasefonyo.”