Yoshua 21 - ŊMALƐ KRƆŊKRƆŊ LƐ

Maji ni akɛhã Levibii lɛ

¹ Kɛkɛ ni Levibii lɛ atsɛmɛi awei lɛ amli onukpai lɛ tee ni amɛyana Eleazar, osɔfo lɛ, kɛ Yoshua, Nun bi lɛ, kɛ Israel akutsei lɛ amli onukpai lɛ hu.

² Ni Levibii lɛ kɛɛ amɛ yɛ Shilo yɛ Kanaan shikpɔŋ lɛ nɔ akɛ, “Yehowa tsɔ̃ Mose nɔ, ni efã akɛ ahã wɔ maji kɛ amɛhe shikpɔji ni wɔkooloi aaaye nii yɛ nɔ koni wɔhi amɛmli.”

³ No hewɔ lɛ, Israelbii lɛ kɔlɔ maji kɛ amɛhe shikpɔji yɛ shikpɔji ni ajara ahã akutsei lɛ akɛ amɛnɔ lɛ amli, ni amɛkɛhã Levibii lɛ tamɔ bɔ ni Yehowa efã lɛ.

⁴ Oshiki ni afɔ̃ klɛŋklɛŋ lɛ gbee Levibii lɛ ateŋ mɛi ni ji Kohat shwiei lɛ awekui lɛ anɔ. Osɔfo Aaron diɛŋtsɛ shwiei lɛ ahã amɛ maji nyɔŋma kɛ etɛ̃ yɛ Yudabii lɛ kɛ Simeonbii lɛ kɛ Benyaminbii lɛ agbɛfaŋ shikpɔji lɛ amli.

⁵ Kohatbii awekui ni shwɛ lɛ amɛna maji yɛ Efraimbii lɛ kɛ Danbii lɛ kɛ Manasebii akutso lɛ fã kome lɛ agbɛfaŋ shikpɔji lɛ amli.

⁶ Gershonbii lɛ na maji nyɔŋma kɛ etɛ̃ yɛ Isakarbii akutso lɛ kɛ Naftalibii akutso lɛ kɛ Bokãgbɛ Manasebii akutso lɛ ni yɔɔ Bashan lɛ agbɛfaŋ shikpɔji lɛ amli yɛ oshiki ni afɔ̃ naa.

⁷ Meraribii awekui lɛ na maji nyɔŋma kɛ enyɔ yɛ Rubenbii akutso lɛ kɛ Gadbii akutso lɛ kɛ Zebulonbii akutso lɛ agbɛfaŋ shikpɔji lɛ amli.

⁸ Israelbii lɛ kɛ nɛkɛ maji nɛɛ kɛ amɛhe shikpɔji lɛ hã Levibii lɛ yɛ oshiki ni afɔ̃ lɛ naa tamɔ bɔ ni Yehowa etsɔ̃ Mose nɔ efã akɛ afee lɛ.

⁹ Maji ni aŋɔ yɛ Yudabii lɛ akutso lɛ kɛ Simeonbii lɛ akutso lɛ hu shikpɔji lɛ amli lɛ,

¹⁰ akɛhã Levibii lɛ ateŋ Kohatbii lɛ ateŋ mɛi ni ji Aaron tuuŋtu shwiei lɛ, ejaakɛ amɛ amɛnɔ oshiki ni afɔ̃ klɛŋklɛŋ lɛ gbee.

¹¹ Akɛ Kiriat-Arba, ni ji Anaktsɛ Arba maŋ lɛ, hã amɛ kɛ ehe shikpɔji ni bɔle lɛ lɛ. Maŋ nɛɛ nɔŋŋ ji Hebron ni yɔɔ Yuda gɔji lɛ anɔ lɛ.

¹² Nakai be mli lɛ akɛ maŋ wulu lɛ diɛŋtsɛ he ŋmɔji kɛ akrowai lɛ ehã Yefune bi Kaleb momo akɛ egbɛfaŋnɔ.

¹³ Akɛ maji nɛɛhu kɛ amɛhe shikpɔji fata Hebron ni ji gbɔmɔgbelɔ abobaa maŋ lɛ he, ni akɛhã Aaron, osɔfo lɛ, shwiei lɛ. Maji lɛ ji Libna

¹⁴ kɛ Yatir kɛ Eshtemoa,

¹⁵ kɛ Holon kɛ Debir,

¹⁶ kɛ Ain kɛ Yuta kɛ Bet-Shemesh. Aŋɔ̃ maji nɛɛhu nɛɛ yɛ Yudabii lɛ kɛ Simeonbii lɛ akutsei enyɔ lɛ agbɛfaŋ shikpɔji lɛ amli.

¹⁷ Aŋɔ̃ maji ni agbɛii baa nɛɛ kɛ amɛhe shikpɔji yɛ Benyaminbii lɛ ashikpɔŋ lɛ mli, ni akɛhã Levibii lɛ: Gibeon kɛ Geba,

¹⁸ kɛ Anatot kɛ Almon.

¹⁹ Maji fɛɛ ni Osɔfo Aaron shwiei ni ji osɔfoi lɛ na lɛ fee nyɔŋma kɛ etɛ̃ kɛ amɛhe shikpɔji.

²⁰ Kohatbii lɛ awekui ni shwɛ yɛ Levibii lɛ ateŋ lɛ, aŋɔ̃ Efraimbii lɛ ashikpɔŋ lɛ mli maji komɛi, ni akɛhã amɛ.

²¹ Ahã amɛ maji nɛɛ: Shekem, ni ji abobaa maŋ lɛ ni yɔɔ Efraim gɔji lɛ anɔ lɛ, kɛ Gezer,

²² kɛ Kibzaim kɛ Bet-Horon.

²³ Amɛ nɔŋŋ lɛ akɔlɔ maji ejwɛ kɛ amɛhe shikpɔji yɛ Danbii lɛ ashikpɔŋ lɛ mli ni akɛhã amɛ. Maji lɛ ji Elteke kɛ Gibeton,

²⁴ kɛ Ayalon kɛ Gat-Rimon.

²⁵ Agbɛnɛ akɔlɔ Anaigbɛ Manasebii lɛ ashikpɔŋ lɛ nɔ maji enyɔ, ni ji Taanak kɛ Gat-Rimon, kɛ amɛhe shikpɔji, ni akɛhã Kohatbii lɛ.

²⁶ No hewɔ lɛ, maji fɛɛ ni akɛhã Kohatbii lɛ awekui ni shwɛ lɛ fee nyɔŋma kɛ amɛhe shikpɔji.

²⁷ Levibii lɛ ateŋ mɛi ni ji Gershon shwiei awekui lɛ aŋɔ̃ maji enyɔ kɛ amɛhe shikpɔji yɛ Bokãgbɛ Manasebii lɛ ashikpɔŋ lɛ mli, ni akɛhã amɛ. Maji nɛɛ ji Golan, gbɔmɔgbelɔ abobaa maŋ lɛ, ni yɔɔ Bashan lɛ, kɛ Beeshtera.

²⁸ Aŋɔ̃ maji ejwɛ hu kɛ amɛhe shikpɔji yɛ Isakarbii lɛ ashikpɔŋ lɛ mli, ni akɛhã Gershonbii lɛ. Maji nɛɛ ji Kishon kɛ Daberat,

²⁹ kɛ Yarmut kɛ En-Ganim.

³⁰ No sɛɛ lɛ, akɔlɔ maji ejwɛ hu kɛ amɛhe shikpɔji yɛ Asherbii ashikpɔŋ lɛ mli ni akɛhã Gershonbii lɛ. Maji lɛ ji Mishal kɛ Abdon,

³¹ kɛ Helkat kɛ Rehob.

³² Aŋɔ̃ Naftalibii lɛ ashikpɔŋ lɛ nɔ maji etɛ̃ hu kɛ amɛhe shikpɔji, ni akɛhã Gershonbii lɛ. Maji lɛ ji Kedesh, ni ji gbɔmɔgbelɔ abobaa maŋ ni yɔɔ Galilea lɛ, kɛ Hamot-Dor kɛ Kartan.

³³ No hewɔ lɛ, maji fɛɛ ni Gershonbii lɛ awekui srɔtoi lɛ fɛɛ na fee nyɔŋma kɛ etɛ̃ kɛ amɛhe shikpɔji.

³⁴ Levibii lɛ ateŋ mɛi ni eshwɛ ni ji Merari shwiei lɛ, ahã amɛ Zebulonbii akutso lɛ gbɛfaŋ shikpɔŋ lɛ nɔ maji ejwɛ kɛ amɛhe shikpɔji. Maji nɛɛ ji Yokneam kɛ Karta,

³⁵ kɛ Dimna kɛ Nahalal.

³⁶ Aŋɔ̃ Rubenbii akutso lɛ gbɛfaŋ shikpɔŋ lɛ nɔ maji ejwɛ hu kɛ amɛhe shikpɔji, ni akɛhã Meraribii lɛ. Maji lɛ ji Bezer kɛ Yahaz,

³⁷ kɛ Kedemot kɛ Mefaat.

³⁸ Ni kɛjɛ Gadbii akutso lɛ gbɛfaŋ shikpɔŋ lɛ nɔ lɛ ahã Meraribii lɛ maji ejwɛ ni agbɛii baa nɛɛ kɛ amɛhe shikpɔji: Ramot ni ji gbɔmɔgbelɔ abobaa maŋ ni yɔɔ Gilead lɛ kɛ Mahanaim,

³⁹ kɛ Heshbon kɛ Yazer.

⁴⁰ No hewɔ lɛ, maji fɛɛ ni Meraribii lɛ awekui srɔtoi lɛ, ni ji Levibii lɛ ateŋ mɛi ni eshwɛ lɛ, na fee nyɔŋma kɛ enyɔ.

⁴¹ Belɛ ahã Levibii lɛ fɛɛ maji nyɔŋmai ejwɛ kɛ kpaanyɔ yɛ shikpɔŋ tso muu ni Israelbii lɛ baŋɔ kɛfee amɛnɔ lɛ fɛɛ mli.

⁴² Nɛkɛ maji nɛɛ ateŋ eko fɛɛ eko kɛ ehe shikpɔŋ ni bɔle lɛ kɛkpe.

Israelbii lɛ ŋɔ̃ shikpɔŋ lɛ

⁴³ No hewɔ lɛ, Yehowa kɛ shikpɔŋ lɛ ni ekã he kitã akɛ akɛbaahã Israelbii lɛ atsɛmɛi lɛ hã Israelbii lɛ, ni be ni amɛshɔ̃ shikpɔŋ lɛ sɛɛ lɛ amɛhi nɔ kwraa.

⁴⁴ Yehowa hã amɛna hejɔlɛ yɛ shikpɔŋ lɛ nɔ he fɛɛ he tamɔ bɔ ni ewo amɛtsɛmɛi lɛ shi lɛ pɛpɛɛpɛ. Amɛhenyɛlɔi lɛ ateŋ mɔ ko mɔ ko kwraa nyɛɛɛ amɛhiɛ adamɔ, ejaakɛ Yehowa hã amɛye amɛhenyɛlɔi lɛ fɛɛ anɔ kunim.

⁴⁵ Nibii juji fɛɛ ni Yehowa wo Israel we lɛ shi yɛ he lɛ, amɛmli ekome folo nɛkɛ eyafeee yaka; fɛɛ kwa ba mli.