Yoshua 20 - ŊMALƐ KRƆŊKRƆŊ LƐAbobaa Maji lɛ 1 Yehowa kɛɛ Yoshua akɛ, 2 “Kɛɛmɔ Israelbii lɛ akɛ, nyɛhalaa maji ni nyɛfea amɛ abobaa maji nyɛtoa, tamɔ bɔ ni mitsɔ̃ Mose nɔ mikɛ nyɛ wie lɛ, 3 koni mɔ ni egbe gbɔmɔ, ni ehiɛ kãaa he ni efee, aloo jeee gbɛ eje lɛ, ajo foi kɛya jɛi koni eyaba abo. Maji nɛɛ atsɔ̃mɔ hei ni aaayaba abo yɛ kɛje mɔ ni taoɔ lá he owele atɔ dɛŋ. 4 Mɔ ni aaajo foi kɛaatee nɛkɛ maji nɛɛ eko mli lɛ, eyajaje esane lɛ etsɔ̃ɔ nakai maŋ lɛŋ onukpai lɛ yɛ maŋ agbo lɛ naa kojomɔhe lɛ. Maŋ lɛ mli onukpai lɛ amɔ emli kɛba maŋ lɛ mli, ni ahã lɛ shihilɛhe koni ekɛ amɛ ahi shi. 5 Kɛji mɛi ni taoɔ owele atɔ lɛ tiu gbɔmɔgbelɔ lɛ kɛba maŋ lɛ mli lɛ, onukpai lɛ kɛ gbɔmɔgbelɔ ni ebaba abo lɛ akahã oweletɔlɔ lɛ ejaakɛ jeee gbɛ eje egbe enaanyo lɛ, ni asaŋ enyɛɛɛ lɛ etooo. 6 Abobalɔ lɛ ahi shi yɛ nakai abobaa maŋ lɛ mli kɛyashi beyinɔ ni aaatsɛ lɛ maŋ onukpai lɛ ahiɛ, ni aaaye esane lɛ, asaŋ kɛyashi beyinɔ hu ni osɔfonukpa ni yɔɔ be mli ni ebaba abo lɛ aaagbo. No sɛɛ dani gbɔmɔgbelɔ lɛ aaanyɛ aku esɛɛ aya ewe kɛ lɛ diɛŋtsɛ emaŋ he ni ejo foi kɛjɛ lɛ.” 7 No hewɔ lɛ, Israelbii lɛ hala maji ni agbɛii baa nɛɛ to akɛ abobaa maji: Kadesh yɛ Galilea yɛ Naftali gɔji lɛ anɔ, kɛ Shekem yɛ Efraim gɔji lɛ anɔ, kɛ Kiriat-Arba, ni ji Hebron, ni yɔɔ Yuda gɔji lɛ anɔ lɛ. 8 Yɛ Yordan lɛ bokãgbɛ lɛ amɛkɔ Bezer ni kã Yeriko bokãgbɛ shiaŋa trɛnɛɛ lɛ nɔ lɛ yɛ Rubenbii lɛ akutso lɛ gbɛfaŋ nɔ lɛ mli. Amɛkɔ Ramot ni yɔɔ Gilead lɛ yɛ Gadbii anɔ mli; amɛkɔ Golan ni yɔɔ Bashan yɛ Manasebii anɔ mli. 9 Ahala maji nɛɛ ato ahã Israelbii fɛɛ kɛ gbɔi hu ni ebato amɛ lɛ akɛ abobaa maji koni mɔ fɛɛ mɔ ni aaagbe mɔ ko ni jeee gbɛ eje lɛ, ajo foi kɛya eko mli eyaba abo, koni mɔ ni taoɔ lá he owele atɔ lɛ nine akashɛ mɔ ni egbe gbɔmɔ lɛ nɔ; asaŋ koni gbɔmɔgbelɔ nɛɛ ahi abobaahe lɛ kɛyashi beyinɔ ni aaatsɛ lɛ onukpai lɛ ahiɛ ni aaabote esane lɛ mli. |
Bible in Ga Language © Bible Society of Ghana, 2020.
Bible Society of Ghana