Yoshua 19 - ŊMALƐ KRƆŊKRƆŊ LƐ

Shikpɔŋ ni akɛhã Simeonbii lɛ

¹ Oshiki ni ji enyɔ ni afɔ̃ lɛ gbee Simeonbii akutso lɛ wekui lɛ anɔ. Shikpɔŋ ni akɛhã amɛ lɛ bote shikpɔŋ ni akɛhã Yudabii lɛ mli.

² Maji ni Simeonbii lɛ na yɛ shikpɔŋ ni akɛhã amɛ lɛ nɔ lɛ ekomɛi ji Beersheba kɛ Sheba kɛ Molada,

³ kɛ Hazar Shual kɛ Bala kɛ Ezem,

⁴ kɛ Eltolad kɛ Betul kɛ Horma,

⁵ kɛ Ziklag kɛ Bet-Markabot kɛ Hazar-Susa,

⁶ kɛ Bet-Lebaot kɛ Sharuhem; fɛɛ fee maji nyɔŋma kɛ etɛ̃ kɛ amɛhe akrowai.

⁷ Maji lɛ ekomɛi hu ji Ain kɛ Rimon kɛ Eter kɛ Ashan, maji ejwɛ kɛ amɛhe akrowai.

⁸ Akrowai fɛɛ ni jwere maji nɛɛ ahe kɛtee Baalat-Beer, ni ji Rama ni yɔɔ wuoyigbɛ ŋã lɛ nɔ lɛ, shi nɔ. Enɛ ji Simeonbii lɛ agbɛfaŋ shikpɔŋ ni akɛhã amɛ yɛ amɛwekui lɛ anaa lɛ.

⁹ Simeonbii lɛ ashikpɔŋ ni ahã amɛ nɛɛ lɛ, afo yɛ shikpɔŋ ni akɛhã Yudabii lɛ he, ejaakɛ Yudabii lɛ ashikpɔŋ lɛ fa tsɔ̃ hã amɛ, ni no hewɔ ni akɛ eko hã Simeonbii lɛ.

Shikpɔŋ ni akɛhã Zebulonbii lɛ

¹⁰ Oshiki ni ji etɛ̃ ni afɔ̃ lɛ gbee Zebulonbii akutso lɛ wekui lɛ anɔ. Amɛgbɛfaŋ shikpɔŋ ni akɛhã amɛ lɛ, ehusu tee aahu kɛyashɛ Sarid.

¹¹ Husu nɛɛ tee anaigbɛ kɛyashɛ Marala kɛ Dabeshet, ni eyashɛ faa ni kã Yokneam bokãgbɛ lɛ naa.

¹² Edɔ eyi yɛ Sarid efɔ̃ bokãgbɛ kɛtee Krislot-Tabor husu lɛ he, ni etsa nɔ kɛtsɔ̃ Daberat kɛyashɛ Yafia.

¹³ Kɛjɛ jɛi lɛ husu lɛ tse mli kɛtsɔ̃ bokãgbɛ kɛyanina Gat-Hefer kɛ Et-Kazin. Etse mli ekoŋŋ kɛtee Rimon, kɛkɛ ni edɔ eyi kɛtee Neah.

¹⁴ Husu lɛ dɔ ehe yɛ wuoyigbɛ lɛ kɛtee Hanaton, ni etsa nɔ kɛtee ni enaa yatã yɛ Ifta-El Jɔɔ lɛ mli.

¹⁵ Shikpɔŋ ni akɛhã Zebulonbii nɛɛ nɔ maji lɛ ekomɛi ji Katat kɛ Nahalal kɛ Shimron kɛ Idala kɛ Betlehem. Maji lɛ fɛɛ fee nyɔŋma kɛ enyɔ kɛ amɛhe akrowai.

¹⁶ Nɛkɛ maji kɛ akrowai nɛɛ yɛ Zebulonbii lɛ agbɛfaŋ shikpɔŋ ni akɛhã amɛ yɛ amɛwekui anaa lɛ nɔ.

Shikpɔŋ ni akɛhã Isakarbii lɛ

¹⁷ Oshiki ni ji ejwɛ ni afɔ̃ lɛ gbee Isakarbii akutso lɛ wekui lɛ anɔ.

¹⁸ Amɛgbɛfaŋ shikpɔŋ ni akɛhã amɛ lɛ nɔ maji ji Yezreel kɛ Kesulot kɛ Shunem,

¹⁹ kɛ Hafaraim kɛ Shion kɛ Anaharat,

²⁰ kɛ Rabit kɛ Kishion kɛ Ebez.

²¹ Maji lɛ ekomɛi hu ji Remet kɛ En-Ganim kɛ En-Hada kɛ Bet-Pazez.

²² Isakarbii lɛ ahusu lɛ tsɔ̃ Tabor kɛ Shahazuma kɛ Bet-Shemesh hu, ni enaa yatã yɛ Yordan Faa lɛ naa. Amɛna maji nyɔŋma kɛ ekpaa kɛ amɛhe akrowai.

²³ Nɛkɛ maji nɛɛ kɛ amɛhe akrowai lɛ yɛ Isakarbii lɛ agbɛfaŋ shikpɔŋ ni akɛhã amɛ yɛ amɛwekui lɛ anaa lɛ nɔ.

Shikpɔŋ ni akɛhã Asherbii lɛ

²⁴ Oshiki ni ji enumɔ ni afɔ̃ lɛ gbee Asherbii lɛ akutso lɛ wekui lɛ anɔ.

²⁵ Amɛgbɛfaŋ shikpɔŋ ni akɛhã amɛ lɛ nɔ maji lɛ ekomɛi ji Helkat kɛ Hali kɛ Beten kɛ Akshaf,

²⁶ kɛ Alamelek kɛ Amad kɛ Mishal. Yɛ anaigbɛ lɛ amɛshikpɔŋ lɛ yashɛ Karmel Gɔŋ lɛ he kɛ Shihor-Libnat.

²⁷ Kɛkɛ ni husu lɛ dɔ eyi eŋmɛ bokãgbɛ kɛtee Bet-Dagon. Etse mli yɛ kooyigbɛ kɛtee Zebulon kɛ Ifta-El Jɔɔ lɛ mli yɛ kooyigbɛ kɛtee Bet-Emek kɛ Neiel. Etsa nɔ ekoŋŋ kɛtee kooyigbɛ lɛ nɔŋŋ kɛyanina Kabul,

²⁸ kɛ Ekron kɛ Rehob kɛ Hamon kɛ Kana kɛyashi Sidon.

²⁹ Husu lɛ dɔ eyi agbɛnɛ kɛtsɔ̃ Rama kɛtee Tiro, ni ji maŋ ni atswa gbogbo awo he kpula kɛkpe lɛ. Kɛkɛ ni edɔ kɛtee Hosa, ni etsa nɔ kɛtee ni enaa yatã yɛ Mediterenia Ŋshɔ lɛ naa. Asherbii ashikpɔŋ nɛɛ nɔ maji krokomɛi hu ji Malahab kɛ Akzib kɛ

³⁰ Uma kɛ Afek kɛ Rehob. Asherbii lɛ na maji nyɔŋmai enyɔ kɛ amɛhe akrowai.

³¹ Nɛkɛ maji kɛ amɛhe akrowai nɛɛ ji Asherbii lɛ agbɛfaŋ shikpɔŋ ni akɛhã amɛ yɛ amɛwekui lɛ anaa.

Shikpɔŋ ni akɛhã Naftalibii lɛ

³² Oshiki ni ji ekpaa ni afɔ̃ lɛ gbee Naftalibii lɛ akutso lɛ wekui lɛ anɔ.

³³ Shikpɔŋ ni akɛhã amɛ lɛ husu kã shi kɛjɛ Helef kɛ Zaananim koo lɛ naa kɛtee Adami-Nekeb yɛ Yamnia kɛ Lakum, ni eyamɔ Yordan Faa lɛ.

³⁴ Husu lɛ jɛ jɛi ni etsɔ̃ anaigbɛ kɛtee Aznot-Tabor, ni ekɛ Zebulonbii lɛ ahusu lɛ yatsa yɛ wuoyigbɛ, ni ekɛ Yudabii lɛ ahusu lɛ hu yatsa yɛ Yordan lɛ naa yɛ bokãgbɛ, kɛkɛ ni etsa nɔ kɛtee Hukok.

³⁵ Naftalibii lɛ ashikpɔŋ lɛ nɔ maji ni atswa gbogbo awo amɛhe kɛwaje amɛ lɛ ekomɛi ji Zidin kɛ Rakat kɛ Kineret,

³⁶ kɛ Adama kɛ Rama kɛ Hazor,

³⁷ kɛ Kedesh kɛ Edrel kɛ En-Hazor.

³⁸ Maji lɛ ekomɛi hu ji Yiron kɛ Migdal-El kɛ Horem kɛ Bet-Anat kɛ Bet-Shemesh. Fɛɛ fee maji nyɔŋma kɛ nɛɛhu kɛ amɛhe akrowai.

³⁹ Nɛkɛ maji nɛɛ kɛ amɛhe akrowai lɛ ji Naftalibii lɛ agbɛfaŋnɔ ni ahã amɛ yɛ amɛwekui lɛ anaa.

Shikpɔŋ ni akɛhã Danbii lɛ

⁴⁰ Oshiki ni ji kpawo ni afɔ̃ lɛ gbee Danbii lɛ akutso lɛ wekui lɛ anɔ.

⁴¹ Amɛgbɛfaŋ shikpɔŋ ni akɛhã amɛ lɛ nɔ maji lɛ ekomɛi ji Zora kɛ Eshtaol kɛ Irshemesh,

⁴² kɛ Shaalbim kɛ Ayalon kɛ Itla,

⁴³ kɛ Elon kɛ Timnat kɛ Ekron,

⁴⁴ kɛ Elteke kɛ Gibeton kɛ Baalat,

⁴⁵ kɛ Yehud kɛ Bene-Berak kɛ Gat-Rimon.

⁴⁶ Maji lɛ ekrokomɛi ji Me-Yarkon kɛ Rakon kɛ shikpɔŋ ni kã Yopa he lɛ.

⁴⁷ Be ni Danbii lɛ ahusu lɛ laaje amɛ lɛ, amɛto ta kɛtee ni amɛyatua Laish maŋ lɛ. Amɛye Laishbii lɛ anɔ kunim, ni amɛgbe amɛ, ni amɛŋɔ̃ amɛmaŋ lɛ, ni amɛhi mli. Amɛtsake maŋ lɛ gbɛi Laish lɛ, ni amɛwo jɛi Dan, ni ji amɛblema tsɛ, mɔ mli ni amɛjɛ, lɛ gbɛi.

⁴⁸ Nɛkɛ maji nɛɛ kɛ amɛhe akrowai lɛ ji Danbii lɛ agbɛfaŋnɔ ni ahã amɛ yɛ amɛwekui lɛ anaa.

Naagbee Shikpɔŋ ni akɛhã

⁴⁹ Be ni Israelbii lɛ ejara shikpɔŋ ni agbala lɛ amɛhã akutseiakutsei lɛ sɛɛ lɛ, afo shikpɔŋ lɛ eko yɛ nii ni aja momo lɛ he, ni akɛhã Nun bi Yoshua akɛ egbɛfaŋnɔ.

⁵⁰ Yoshua bi akɛ akɛ Timnat-Sera ni yɔɔ Efraim gɔji lɛ anɔ lɛ ahã lɛ. Ni akɛhã lɛ yɛ Yehowa famɔ naa. Yoshua saa maŋ lɛ koni ehi jɛi.

⁵¹ Nɛkɛ ji bɔ ni Osɔfo Eleazar kɛ Nun bi Yoshua kɛ Israel akutsei lɛ amli onukpai lɛ damɔ oshiki ni amɛfɔ̃, yɛ Yehowa hiɛ yɛ Kpee Buu lɛ shinaa lɛ naa, yɛ Shilo, lɛ nɔ kɛja shikpɔŋ lɛ amɛhã Israelbii lɛ awekui lɛ.