Yoshua 18 - ŊMALƐ KRƆŊKRƆŊ LƐ

Aja Shikpɔŋ ni eshwɛ lɛ hu

¹ Israel asafo muu lɛ fɛɛ naa bakpe shi yɛ Shilo, ni amɛshi Yehowa Kpee Buu lɛ yɛ jɛi. Nɛkɛ be mli lɛ shikpɔŋ ni Israelbii lɛ eŋɔ̃ lɛ kã shi yɛ amɛhiɛ,

² ni eshwɛ Israelbii lɛ akutsei lɛ ateŋ kpawo lolo ni amɛ lɛ ahãko amɛ amɛshikpɔŋ akɛ amɛgbɛfaŋnɔ.

³ Kɛkɛ ni Yoshua kɛɛ Israelbii lɛ akɛ, “Mɛɛ beyinɔ nɔŋŋ nyɛaashashao shi kɛyashi dani nyɛ nyɛyaŋɔ shikpɔŋ ni Yehowa, nyɛtsɛmɛi aNyɔŋmɔ lɛ, kɛhã nyɛ lɛ?

⁴ Akutso fɛɛ akutso afamɔ hii etɛ̃ koni matsu amɛ koni amɛyakpa shikpɔŋ tso muu lɛ fɛɛ nɔ koni amɛmɔmɔ shikpɔji ni amɛaasumɔ akɛ akɛhã amɛkutsei lɛ, ni amɛŋma bɔ ni shikpɔji lɛ yɔɔ amɛkɛbahã mi.

⁵ Abaagbala shikpɔŋ tso muu lɛ mli kpawo. Yudabii lɛ baaya nɔ koni amɛhi shikpɔŋ ni ahã amɛ momo sa lɛ nɔ yɛ wuoyigbɛ lɛ; ni Yosef shwiei lɛ hu baaya nɔ amɛhi amɛnɔ lɛ nɔ yɛ kooyigbɛ lɛ.

⁶ Nyɛjaraa shikpɔŋ tso muu lɛ mli kpawo koni nyɛŋma bɔ ni husui lɛ ashikamɔ yɔɔ hãa nyɛkɛbahãa mi yɛ biɛ, koni mafɔ̃ oshiki mabi Yehowa nii mahã nyɛ bɔ ni sa akɛ akɔlɔ shikpɔji lɛ ahã.

⁷ Shi Levibii ni yɔɔ nyɛteŋ lɛ, amɛ lɛ amɛnaŋ shikpɔŋ lɛ eko, ejaakɛ amɛ lɛ amɛgbɛfaŋnɔ ji osɔfoyeli kɛhã Yehowa. Gad akutso lɛ kɛ Ruben akutso lɛ kɛ Manasebii ni yɔɔ bokãgbɛ lɛ, amɛna amɛgbɛfaŋnɔ momo yɛ Yordan lɛ sɛɛ, yɛ bokãgbɛ, he ni Yehowa tsulɔ Mose kɛhã amɛ lɛ.”

⁸ Dani hii ni afamɔ koni amɛyaŋma shikpɔŋ lɛ he sane kɛba lɛ yi mli amɛtee lɛ, Yoshua kɛɛ amɛ akɛ, “Nyɛyaa koni nyɛyakpaa shikpɔŋ lɛ nɔ koni nyɛŋma ehe sane, ni nyɛkɛku nyɛsɛɛ kɛba miŋɔ̃ɔ, ni no sɛɛ lɛ mafɔ̃ oshiki mabi Yehowa nii yɛ nyɛhewɔ yɛ Shilo nɛɛ.”

⁹ Kɛkɛ ni hii lɛ yi mli amɛtee, ni amɛyakpa shikpɔŋ tso muu lɛ fɛɛ nɔ, ni amɛŋma amɛwo wolo mli bɔ ni amɛjara shikpɔŋ lɛ mli kpawo lɛ amɛhã yɛ maji ni jwere shikpɔŋ lɛ nɔ lɛ anaa, ni amɛku amɛsɛɛ kɛba Yoshua ŋɔɔ yɛ Israelbii lɛ ashitoohe lɛ yɛ Shilo,

¹⁰ ni Yoshua fɔ̃ oshiki ni ekɛja shikpɔŋ lɛ eha amɛ, akutso fɛɛ akutso na egbɛfaŋnɔ.

Shikpɔŋ ni akɛhã Benyaminbii lɛ

¹¹ Klɛŋklɛŋ oshiki ni afɔ̃ lɛ gbee Benyaminbii akutso lɛ mli wekui lɛ anɔ. Shikpɔŋ ni akɛhã amɛ lɛ kã Yudabii lɛ ashikpɔŋ lɛ kɛ Yosefbii lɛ ashikpɔŋ lɛ teŋ.

¹² Benyaminbii nɛɛ akooyigbɛ husu lɛ jɛ Yordan Faa lɛ naa ni ekwɔ kɛtsɔ̃ gɔji lɛ anɔ kɛtee anaigbɛ kɛyamɔ Bet-Aven shiaŋa lɛ.

¹³ Kɛjɛ jɛi lɛ husu lɛ tsɔ̃ wuoyigbɛ kɛyashãrã Luz he (no nɔŋŋ ji Betel), ni etse mli kɛtee Atarot-Adar, yɛ gɔŋ lɛ ni yɔɔ Jɔɔŋgbɛ Bet-Horon wuoyigbɛ lɛ nɔ lɛ.

¹⁴ Husu lɛ lɔgɔ ehe yɛ gɔŋ ni ye wuoyigbɛ ni ekwɛɔ Bet-Horon hiɛ lɛ nɔ, ni enaa yatã yɛ Kiriat-Baal, ni ji Kiriat-Yearim, Yudabii amaŋ lɛ. Enɛ ji Benyaminbii lɛ anaigbɛ husu lɛ.

¹⁵ Amɛwuoyigbɛ husu lɛ jɛ Kiriat-Yearim kpokpai anɔ, ni etee anaigbɛ kɛyashi Neftoa Nuhiŋmɛii lɛ ahe.

¹⁶ Husu lɛ kpeleke shi kɛtee gɔŋ lɛ ni kwɛɔ Hinom Jɔɔ lɛ mli lɛ shishi, yɛ ekooyigbɛ he ni Refaim Jɔɔ lɛ naa yatãa yɛ lɛ. Husu lɛ nyɔ Hinom Jɔɔ lɛ mli agbɛnɛ, ni etsɔ̃ Yebusbii lɛ awuoyigbɛ kɛtee En-Rogel Nubu lɛ naa.

¹⁷ Egba kɛyi kooyigbɛ kɛjɛ biɛ kɛyamɔ En-Shemesh; ni etse mli kɛtee Gelilot ni yɔɔ Adumim Gɔŋ kɛ Gɔŋ teŋ gbɛ lɛ ŋlɛnɔ lɛ; kɛkɛ ni ekpeleke shi kɛtee Ruben bi Bohan Tɛ lɛ he.

¹⁸ Kɛjɛ jɛi lɛ husu lɛ sharã Yordan Jɔɔ lɛ kooyigbɛ kɛho kɛbote jɔɔ lɛ mli.

¹⁹ Husu lɛ tse mli, ni eyaje Bet-Hogla masɛi yɛ ekooyigbɛ, ni enaa yatã yɛ Ŋoo Ŋshɔ lɛ kooyigbɛ ble lɛ mli he ni Yordan lɛ naa yatãa yɛ, yɛ wuoyigbɛ lɛ. Bɔ ni Benyaminbii lɛ awuoyigbɛ husu lɛ kã shi hã lɛ nɛ.

²⁰ Belɛ Yordan Faa lɛ ji amɛshikpɔŋ lɛ husu yɛ bokãgbɛ. Shikpɔŋ ni akɛhã Benyaminbii lɛ akɛ amɛgbɛfaŋnɔ yɛ amɛwekui lɛ anaa lɛ, nɛkɛ ji bɔ ni ehe husui lɛ kamɔ shi hã.

²¹ Naa maji ni akɛhã Benyaminbii lɛ yɛ amɛwekui lɛ anaa lɛ: Yeriko kɛ Bet-Hogla kɛ Emek-Keziz,

²² kɛ Bet-Araba kɛ Zemariam kɛ Betel,

²³ kɛ Avim kɛ Para kɛ Ofra.

²⁴ Ekomɛi hu ji Kefar-Amonai kɛ Ofni kɛ Geba ni hiɛ maji nyɔŋma kɛ enyɔ kɛ amɛhe akrowai lɛ,

²⁵ kɛ Gibeon kɛ Rama kɛ Beerot,

²⁶ kɛ Mizpe kɛ Kefira kɛ Moza.

²⁷ Maji lɛ ekrokomɛi hu ji Rekem kɛ Irpeel kɛ Tarala,

²⁸ kɛ Zela kɛ Elef kɛ Yebus, ni ji Yerusalɛm, kɛ Gibea kɛ Kiriat-Yearim. Maji fɛɛ ni Benyaminbii lɛ na ji maji nyɔŋma kɛ ejwɛ kɛ amɛhe akrowai. Enɛ ji Benyaminbii lɛ agbɛfaŋnɔ ni ahã amɛ yɛ amɛwekui lɛ anaa lɛ.