Yoshua 17 - ŊMALƐ KRƆŊKRƆŊ LƐ

Anaigbɛ Manasebii lɛ kɔkrɔɔ agbɛfaŋ shikpɔŋ

¹ Ahã Manase akutso lɛ fã kome ni eshwɛ lɛ amɛgbɛfaŋ shikpɔŋ ejaakɛ Manase ji Yosef kromɔbi. Manase kromɔbi Mikir, ni ji Gilead tsɛ lɛ, akɛ Gilead kɛ Bashan hã lɛ ejaakɛ tawulɔ kpanaa ji lɛ.

² Manasebii ni eshwɛ lɛ fɛɛ hu na amɛgbɛfaŋnɔ yɛ amɛwekui lɛ anaa. Amɛ ji Abiezerbii lɛ kɛ Helekbii lɛ kɛ Asrielbii lɛ kɛ Shekembii lɛ kɛ Heferbii lɛ kɛ Shemidabii lɛ. Mɛnɛɛmɛi ji Yosef bi Manase musuŋ bihii lɛ awekui lɛ.

³ Shi Manase bi Makir bi Gilead bi Hefer bi Zelofehad eyafɔɔɔ bihii, yei sɔŋŋ efɔ. Ebiyei lɛ agbɛii ji Mala kɛ Noa kɛ Hogla kɛ Milka kɛ Tirza.

⁴ Zelofehad biyei nɛɛ ba Osɔfo Eleazar kɛ Nun bi Yoshua kɛ maŋ onukpai lɛ aŋɔ̃ɔ, ni amɛkɛ sane bafɔ̃ amɛhiɛ akɛ, “Yehowa wo kitã akɛ ahã wɔ hu, wɔ kɔkrɔɔ, wɔshikpɔŋ tamɔ ahã wɔnyɛmimɛi hii lɛ.” No hewɔ lɛ, ahã Zelofehad biyei lɛ amɛgbɛfaŋ shikpɔŋ yɛ amɛtsɛ nyɛmimɛi lɛ ateŋ.

⁵ Enɛ hewɔ ni Manase shwiei lɛ na shikpɔji nyɔŋma, soro Gilead kɛ Bashan shikpɔŋ lɛ ni yɔɔ Yordan lɛ sɛɛ lɛ.

⁶ Akɛni Manase biyei lɛ na amɛgbɛfaŋ shikpɔŋ, ni ebihii lɛ hu na amɛgbɛfaŋ shikpɔŋ hewɔ lɛ akɛ Gilead shikpɔŋ lɛ hã Manasebii ni eshwɛ lɛ akɛ amɛ hu amɛgbɛfaŋnɔ.

⁷ Manasebii lɛ ahusu lɛ, ekã shi kɛjɛ Asher kɛtee Mikmetat ni yɔɔ Shekem bokãgbɛ lɛ. Husu lɛ tsa nɔ kɛtee wuoyigbɛ kɛyanina En-Tapuabii lɛ, ni ekɔ amɛshikpɔŋ lɛ eshi nɔ.

⁸ Shikpɔŋ nɔ ni Tapua yɔɔ lɛ Manasebii lɛ anɔ ni; shi Tapua maŋ lɛ diɛŋtsɛ lɛ akɛhã Efraimbii lɛ.

⁹ Agbɛnɛ husu lɛ mã eyi shi kɛtee Kana faa lɛ naa. Maji fɛɛ ni yɔɔ faa nɛɛ wuoyigbɛ lɛ Efraimbii amaji ni; tsɛbelɛ amɛyɛ Manasebii ashikpɔŋ nɔ. Manasebii ahusu lɛ tse mli kɛnyiɛ faa lɛ kooyigbɛ kɛyamɔ Mediterenia Ŋshɔ lɛ.

¹⁰ Belɛ shikpɔŋ ni kã wuoyigbɛ lɛ Efraimbii anɔ ni; ni Mediterenia Ŋshɔ lɛ fee amɛhusu yɛ anaigbɛ. Manasebii lɛ kɛ Asherbii lɛ je husu yɛ kooyi anaigbɛ, ni amɛ nɔŋŋ lɛ amɛkɛ Isakarbii lɛ je husu yɛ kooyi anaigbɛ.

¹¹ Akɛ Isakarbii lɛ kɛ Asherbii lɛ ashikpɔji lɛ anɔ maji komɛi hã Manasebii lɛ. Maji nɛɛ ji Bet-Sham kɛ ehe akrowai lɛ kɛ Ibleam kɛ ehe akrowai lɛ kɛ Dorbii akrowai lɛ kɛ En-Dorbii kɛ amɛ akrowai lɛ kɛ Taanak kɛ ehe akrowai lɛ kɛ Megidobii kɛ amɛ akrowai lɛ (nɔ ni ji etɛ̃ lɛ ji Nafat).

¹² Shi Manasebii lɛ eyanyɛɛɛ Kanaanbii ni ji mɛi ni yɔɔ maji nɛɛ amli momo sa lɛ amɛshwie; ni no hewɔ lɛ, Kanaanbii lɛ tee nɔ, ni amɛhi maji nɛɛ amli.

¹³ Shi be ni Israelbii lɛ ahe bawa tete lɛ, amɛshwieee Kanaanbii lɛ; shi moŋ Israelbii lɛ ye amɛ nyɔŋ.

Efraimbii lɛ kɛ Anaigbɛ Manasebii lɛ bi shikpɔŋ lɛ eko amɛfata he

¹⁴ Yosef shwiei lɛ bi Yoshua akɛ, “Mɛɛba ni ofo shikpɔŋ kome pɛ kɛkɛ ohã wɔ akɛ wɔgbɛfaŋnɔ be mli ni wɔyi fa babaoo, ni Yehowa ehã wɔshwere lɛ?”

¹⁵ Yoshua to he akɛ, “Kɛji nyɛyi fa tsɔ̃, ni Efraim gɔji lɛ anɔ shikpɔŋ lɛ edaaa hãaa nyɛ lɛ, no lɛ nyɛyaa Perizbii lɛ kɛ Refaimbii lɛ ashikpɔŋ lɛ nɔ, ni nyɛyagbaa koo ni yɔɔ jɛi lɛ eko, ni nyɛtoa maŋ yɛ jɛi nyɛhia mli.”

¹⁶ Yosef shwiei lɛ jie naa akɛ, “gɔji lɛ anɔ shikpɔŋ lɛ edaaa hãaa wɔ moŋ nɛ, shi Kanaanbii ni yɔɔ jɔɔ lɛ mli lɛ fɛɛ yɛ dade tayaa shwiilii; mɛi ni yɔɔ Bet-Shean kɛ ehe akrowai lɛ amli lɛ kɛ mɛi hu ni yɔɔ Yezreel Jɔɔ lɛ mli lɛ hu fɛɛ yɛ eko.”

¹⁷ Yoshua kɛɛ Yosef shwiei lɛ, ni ji Efraimbii kɛ Manasebii lɛ akɛ, “Nyɛyi fa babaoo, ni nyɛyɛ hewalɛ naakpa hu; no hewɔ lɛ, nyɛbaana fe shikpɔŋ kome lɛ,

¹⁸ ejaakɛ gɔŋ lɛ nɔ shikpɔŋ lɛ fɛɛ aaatsɔ̃ nyɛnɔ afata he. Nyɛ lɛ, nyɛgbaa koo ni yɔɔ gɔŋ lɛ nɔ lɛ kɛyashi he ni nyɛaanyɛ nyɛkɛ ehusu lɛ ayashi, koni nyɛkɔ. Eyɛ mli akɛ Kanaanbii lɛ yɛ dade tayaa shwiilii, ni amɛhe wa moŋ nɛ, shi amɛnyɛŋ nyɛhiɛ amɛdamɔ.”