Yoshua 16 - ŊMALƐ KRƆŊKRƆŊ LƐ

Shikpɔŋ ni akɛhã Efraimbii lɛ kɛ Manasebii lɛ yɛ Anaigbɛ

¹ Yosef shwiei lɛ agbɛfaŋ shikpɔŋ ni ahã amɛ lɛ husu kã shi kɛjɛ Yordan Faa lɛ naa he ko ni kɛ Yeriko jekɛɛɛ. Husu lɛ jɛ nuhiŋmɛii ni yɔɔ Yeriko bokãgbɛ lɛ ahe kɛtee shiaŋa lɛ nɔ. Kɛjɛ Yeriko lɛ husu lɛ tsɔ̃ gɔji lɛ anɔ kɛtee Betel,

² ni kɛjɛ Betel lɛ etee Luz dani etse mli kɛtee Atarot Adar, ni ji Arkibii lɛ ashikpɔŋ lɛ.

³ Kɛkɛ ni ema eyi shi kɛtsɔ̃ anaigbɛ kɛbote Yafletbii ashikpɔŋ lɛ mli kɛtee aahu ni eyabote Bet-Horon shikpɔŋ lɛ hu mli yɛ eshishigbɛ naagbeehe lɛ kɛyashɛ Gezer, ni enaa yamɔ Mediterenia Ŋshɔ lɛ.

⁴ Shikpɔŋ nɛɛ ji nɔ ni akɛhã Yosef bii Manase kɛ Efraim shwiei lɛ akɛ amɛgbɛfaŋnɔ.

Efraimbii kɔkrɔɔ agbɛfaŋ shikpɔŋ

⁵ Shikpɔŋ ni ahã Efraimbii lɛ yɛ amɛwekui lɛ anaa lɛ ji enɛ: Yɛ bokãgbɛ lɛ amɛhusu ji kɛjɛ Atarot-Adar kɛyashi Bet-Horon yiteŋgbɛ he ko.

⁶ Kɛjɛ jɛi lɛ husu lɛ yamɔ Mediterenia Ŋshɔ lɛ. Yɛ kooyigbɛ lɛ husu lɛ yawa Mikmetat, ni edɔ eyi kɛtsɔ̃ bokãgbɛ kɛtee Taanat-Shilo; kɛkɛ ni etse mli kɛtee Yanoha yɛ bokãgbɛ.

⁷ Kɛjɛ Yanoha lɛ, husu lɛ kpeleke shi kɛba Atarot kɛ Naara, ni esharã Yeriko kɛyamɔ Yordan lɛ.

⁸ Husu lɛ jɛ Tapua kɛtee Kanaan faa lɛ naa yɛ anaigbɛ kɛyamɔ Mediterenia Ŋshɔ lɛ. Shikpɔŋ ni Efraimbii lɛ na yɛ amɛwekui lɛ anaa lɛ nɛ.

⁹ Ahã amɛ maji hu kɛ amɛhe akrowai hu afata he yɛ shikpɔŋ ni akɛhã Manasebii lɛ akɛ amɛgbɛfaŋnɔ lɛ nɔ.

¹⁰ Shi Efraimbii lɛ eshwieee Kanaanbii ni yɔɔ Gezer lɛ, ni no hewɔ lɛ, Kanaanbii nɛɛ kɛ Efraimbii lɛ futu kɛhi shi kɛbashi ŋmɛnɛ; ni Kanaanbii lɛ sɔ̃mɔ Efraimbii lɛ.