Yoshua 14 - ŊMALƐ KRƆŊKRƆŊ LƐ

Bɔ ni aja Shikpɔŋ ni kã Yordan Anaigbɛ lɛ ahã

¹ Israelbii lɛ agbɛfaŋnii ni amɛna yɛ Kanaan shikpɔŋ lɛ nɔ lɛ, bɔ ni Osɔfo Eleazar kɛ Yoshua, Nun bi lɛ, kɛ Israelbii lɛ akutseiatsɛmɛi onukpai lɛ tsɔ̃ ja hã amɛ nɛ.

² Oshiki ji nɔ ni afɔ̃ akɛja akutsei nɛɛhu kɛ fã lɛ agbɛfaŋnii lɛ ahã amɛ tamɔ bɔ ni Yehowa tsɔ̃ Mose nɔ ewo amɛ ehe kitã lɛ.

³ Ejaakɛ Mose ehã akutsei enyɔ kɛ fã lɛ amɛgbɛfaŋnɔ momo yɛ Yordan lɛ sɛɛ. Shi Levibii lɛ, amɛ lɛ, ehãaa amɛ amɛ kɔkrɔɔ amɛgbɛfaŋ shikpɔŋ ko yɛ nii ni aja lɛ mli.

⁴ Akutsei enyɔ jɛ Yosef mli; amɛ ji Manase kɛ Efraim. Ahãaa Levibii lɛ amɛgbɛfaŋ shikpɔŋ pɔtɛ̃ɛ ko akɛ ja maji ni amɛaahi amɛmli kɛ maji lɛ ahe shikpɔji ni amɛkooloi ana nɔ jwɛi amɛye, ni amɛ gbɔmɛi lɛ hu amɛaana nɔ nii amɛye.

⁵ Bɔ ni Yehowa wo Mose kitã lɛ, nakai pɛpɛɛpɛ Israelbii lɛ fee kɛja shikpɔŋ lɛ amɛhã amɛhe.

Akɛ Hebron hã Kaleb

⁶ Gbi ko lɛ Yuda akutso lɛŋ bii lɛ ba Yoshua ŋɔɔ yɛ Gilgal; ni amɛteŋ mɔ kome ni ji Kaleb, Keniznyo, Yefune bi lɛ, kɛ sane bafɔ̃ Yoshua hiɛ akɛ, “Oookai wiemɔ ni Yehowa kɛ Nyɔŋmɔ gbɔmɔ Mose wie yɛ mihewɔ, kɛ bo hu ohewɔ, yɛ Kadesh Barnea lɛ.

⁷ Miye afii nyɔŋmai ejwɛ be ni Yehowa tsulɔ Mose tsu mi kɛjɛ Kadesh Barnea akɛ miyasara shikpɔŋ lɛ. Miku misɛɛ mibabɔ lɛ nɔ ni miyana anɔkwale mli kɛjɛ mitsuiŋ.

⁸ Nyɛmimɛi lɛ ni kɛ mi tee lɛ bafã maŋ lɛ tsui; shi mi lɛ mibo Yehowa, miNyɔŋmɔ lɛ, toi kɛwula shi.

⁹ Enɛ hã Mose kã kitã nakai gbi lɛ, ni ekɛɛ akɛ, ‘Naa, shikpɔŋ lɛ ni onane eyanyiɛ nɔ lɛ atsɔ̃ bo kɛ obii agbɛfaŋnɔ kɛya naanɔ, ejaakɛ obo Yehowa, miNyɔŋmɔ, lɛ toi kɛwula shi.’

¹⁰ Yehowa ehã miyi ena wala, tamɔ bɔ ni ekɛɛ lɛ, afii nyɔŋmai ejwɛ kɛ enumɔ nɛɛ fɛɛ kɛjɛ beyinɔ ni ekɛ Mose wie nɛkɛ wiemɔ nɛɛ, be ni Israelbii lɛ nyiɛ shiaŋa lɛ nɔ lɛ. Naa, ŋmɛnɛ gbi nɛɛ miye afii nyɔŋmai kpaanyɔ kɛ enumɔ.

¹¹ Kɛ̃lɛ miyɛ gbɔmɔtsoŋ hewalɛ tamɔ miyɔɔ be ni Mose tsu mi lɛ. Tawuu gbɛfaŋ ni jio, yaakɛbaa kɛkɛ gbɛfaŋ ni jio, hewalɛ ni miyɔɔ yɛ gbɔmɔtso mli nakai be lɛ mli lɛ, nakai hewalɛ lɛ nɔŋŋ miyɔɔ ŋmɛnɛ.

¹² No hewɔ lɛ, agbɛnɛ okɛ nɛkɛ gɔŋ nɛɛ nɔ shikpɔŋ lɛ ahã mi, nɔ ni Yehowa wo shi yɛ he nakai gbi lɛ. Nakai bo diɛŋtsɛ onu kɛ otoi akɛ Anakbii lɛ ji mɛi ni yɔɔ jɛi yɛ maji wuji ni atswa gbogbo awo amɛhe akɛwaje amɛ lɛ mli. Eko lɛ Yehowa aaaye abua mi koni mashwie amɛ yɛ jɛi tamɔ bɔ ni Yehowa ekɛɛ lɛ.”

¹³ Kɛkɛ ni Yoshua jɔɔ Kaleb, ni ekɛ Hebron hã Kaleb, Yefune bi lɛ, akɛ egbɛfaŋnɔ.

¹⁴ No hewɔ lɛ, Hebron tsɔ̃ Kaleb, Yefune, Keniznyo lɛ bi lɛ, gbɛfaŋ nɔ kɛbashi ŋmɛnɛ, ejaakɛ ebo Yehowa, Israel Nyɔŋmɔ lɛ, toi kɛwula shi.

¹⁵ Sa lɛ Hebron gbɛi ji Kiriat Arba, eshishi ji Arba maŋ.