Yoshua 13 - ŊMALƐ KRƆŊKRƆŊ LƐShikpɔŋ ni eshwɛ ni abaaŋɔ 1 Be ni Yoshua egbɔ lɛ Yehowa kɛɛ lɛ akɛ, “Ogbɔ, ni oye afii pii; shi shikpɔŋ ni yɔɔ lolo ni sa akɛ aŋɔ lɛ fa. 2 Shikpɔji ni eshwɛ lɛ ji enɛɛmɛi: Filistibii ashikpɔŋ lɛ fɛɛ kɛ Geshurbii lɛ hu anɔ lɛ, 3 ni ji kɛjɛ Shihor Faa lɛ naa, yɛ Ijipt bokãgbɛ lɛ, kɛtee kɛyashi Ekron husu lɛ naa, he ni abuɔ akɛ Kanaanbii ashikpɔŋ lɛ. Filistibii lɛ amaŋtsɛmɛi enumɔ ni ji Gaza maŋtsɛ kɛ Ashdod maŋtsɛ kɛ Ashkelon maŋtsɛ kɛ Gat maŋtsɛ kɛ Ekron maŋtsɛ yɛ jɛi, kɛ Avimbii ashikpɔŋ lɛ hu. 4 Yɛ wuoyigbɛ lɛ Kanaanbii ashikpɔŋ lɛ fɛɛ kɛ Meara, ni ji Sidonbii anɔ mli lɛ, kɛyashi Afek kɛ Amorbii ahusu lɛ naa fata he. 5 Ekomɛi hu ji Giblibii ashikpɔŋ lɛ kɛ Lebanon muu fɛɛ kɛtee bokãgbɛ, kɛjɛ Balgad yɛ Hermon Gɔŋ lɛ wuoyigbɛ kɛyashi he ni atsɔ̃ɔ kɛyaa Hamat lɛ. 6 Sidonbii ashikpɔŋ lɛ ni kã shi kɛjɛ Lebanon gɔji lɛ anɔ kɛyashi Misrefot Maim lɛ hu fata he. Mi diɛŋtsɛ mibashwie gbɔmɛi nɛɛ yɛ Israelbii lɛ ahiɛ. Bo lɛ fɔ̃ɔ oshiki kɛkɛ koni okɛja shikpɔŋ lɛ ohã Israelbii lɛ koni etsɔ̃ amɛnɔ tamɔ bɔ ni mifã bo lɛ. 7 Jaa shikpɔŋ nɛɛ ohã Israel akutsei nɛɛhu lɛ kɛ Manase akutso lɛ fã ni eshwɛ lɛ koni etsɔ̃ amɛnɔ.” Bɔ ni aja shikpɔŋ ni kã Yordan bokãgbɛ lɛ ahã 8 Manase akutso lɛ fã kome kɛ Rubenbii lɛ kɛ Gadbii lɛ ena amɛgbɛfaŋ shikpɔŋ momo yɛ Yordan lɛ bokãgbɛ tamɔ bɔ ni Yehowa tsulɔ Mose kɛhã amɛ lɛ. 9 Amɛna kɛjɛ Aroer, ni ji Arnon Jɔɔ lɛ naa shikpɔŋ lɛ, kɛ maŋ wulu ni kã jɔɔ lɛ teŋ lɛ, kɛ gɔŋ yiteŋ shikpɔŋ kplanaa lɛ fɛɛ kɛjɛ Medeba aahu kɛyashi Dibon. 10 Agbɛnɛ amɛna Amorbii amaŋtsɛ Sihon ni ye emaŋtsɛ lɛ yɛ Heshbon lɛ shishi maji lɛ fɛɛ kɛyashi Amonbii lɛ ahusu lɛ nɔ. 11 Amɛ nɔŋŋ akɛ Gilead kɛ Geshurbii kɛ Maakatbii ashikpɔŋ lɛ kɛ Hermon Gɔŋ lɛ fɛɛ kɛ Bashan fɛɛ kɛyashi Salka hu hã. 12 Akɛ Maŋtsɛ Og maŋtsɛyeli shikpɔji lɛ ni yɔɔ Bashan lɛ fɛɛ shi nɔ hã amɛ, ejaakɛ Og ji Ashtarot kɛ Edrei nɔ maŋtsɛ. Lɛ ji hii oblaŋi gojogojoo ni Mose ye amɛnɔ kunim ni eshwie amɛ lɛ ateŋ mɔ ni shwɛ. 13 Shi Israelbii lɛ eshwieee Geshurbii lɛ kɛ Maakatbii lɛ; no hewɔ lɛ, Geshurbii lɛ kɛ Maakatbii lɛ futu Israelbii lɛ kɛhi shi kɛbashi ŋmɛnɛ. 14 Levibii akutso lɛ kɛkɛ ni Mose hãaa amɛ amɛ kɔkrɔɔ amɛshikpɔŋ akɛ amɛgbɛfaŋnɔ. Afɔlei ni akɛ la shãa akɛhãa Yehowa, Israel Nyɔŋmɔ lɛ, ji Levibii lɛ agbɛfaŋnɔ ni ahã amɛ tamɔ bɔ ni Mose ekɛɛ amɛ eto lɛ. Shikpɔŋ ni akɛhã Rubenbii lɛ 15 Mose hã Rubenbii akutso lɛ amɛgbɛfaŋ shikpɔŋ yɛ amɛwekui lɛ anaa. 16 Amɛshikpɔŋ lɛ ji Aroer, ni ji Arnon Jɔɔ lɛ, kɛ maŋ wulu lɛ ni kã jɔɔ lɛ teŋ lɛ, kɛ gɔŋ yiteŋ shikpɔŋ kplanaa lɛ fɛɛ ni yɔɔ Medeba lɛ, 17 kɛ agbɛnɛ Heshbon kɛ eshishi maji lɛ fɛɛ ni jwere gɔŋ yiteŋ shikpɔŋ kplanaa lɛ nɔ lɛ. Maji nɛɛ ji Dibon kɛ Bamot-Baal kɛ Bet-Baal-Meon, 18 kɛ Yahaz kɛ Kedemot kɛ Mefaat, 19 kɛ Kiriataim kɛ Sibma kɛ Zeret-Shahar ni kã jɔɔ lɛ he gɔŋ lɛ nɔ lɛ, 20 kɛ Bet-Peor kɛ Pisga Gɔŋ lɛ hiɛshi shikpɔji lɛ kɛ Bet-Yeshimot. 21 Maji lɛ fɛɛ ni jwere gɔŋ yiteŋ shikpɔŋ kplanaa lɛ nɔ lɛ kɛ Amorbii amaŋtsɛ Sihon ni ye maŋtsɛ yɛ Heshbon lɛ shikpɔji lɛ hu fɛɛ baje Rubenbii ashikpɔŋ lɛ mli. Mose ji mɔ ni ye Amorbii amaŋtsɛ Sihon nɛɛ nɔ kunim. Eye Midian lumɛi Evi kɛ Rekem kɛ Zur kɛ Hur kɛ Reba, ni ji Maŋtsɛ Sihon shishi lumɛi ni hi shikpɔŋ lɛ nɔ lɛ, fɛɛ anɔ kunim. 22 Israelbii lɛ gbe Bileam, Beor bi lɛ, ni ji klamɔ lɛ, hu amɛshi mɛi ni nyɔnyɔi yɛ ta mli lɛ anɔ. 23 No hewɔ lɛ, Yordan Faa lɛ tsɔ̃ Rubenbii lɛ ahusu, ni shikpɔŋ nɛɛ kɛ emli maji kɛ akrowai lɛ fɛɛ tsɔ̃ Rubenbii lɛ agbɛfaŋnɔ yɛ amɛwekui lɛ anaa. Shikpɔŋ ni akɛhã Gadbii lɛ 24 Mose hã Gadbii lɛ hu shikpɔŋ lɛ eko akɛ amɛgbɛfaŋnɔ yɛ amɛwekui lɛ anaa. 25 Ehã amɛ kɛjɛ Yazer shikpɔŋ lɛ kɛ maji fɛɛ ni yɔɔ Gilead lɛ kɛmɔ Amonbii lɛ ashikpɔŋ lɛ fã kɛyashi Aroer ni kã Raba bokãgbɛ lɛ nɔ. 26 Ekɛ kɛjɛ Heshbon kɛyashi Ramat Mizpa kɛ Betonim hu hã amɛ nɔŋŋ. Agbɛnɛ hu ehã amɛ kɛjɛ Mahanaim kɛyashi Debir husu lɛ nɔ, 27 kɛ Yordan Jɔɔ lɛ mli maji lɛ, ni ji Bet Haram kɛ Bet Nimra kɛ Sukot kɛ Zafon kɛ Heshbon maŋtsɛ Sihon shikpɔji ni eshwɛ lɛ. Shikpɔŋ lɛ kã shi kɛjɛ Yordan lɛ naa akɛ husu kɛtee Galilea Kpaakpo lɛ shishigbɛ he ni kpaakpo lɛ naa yatãa yɛ lɛ yɛ Yordan lɛ bokãgbɛ. 28 Shikpɔŋ kɛ enɔ maji wuji kɛ akrowai fɛɛ ni Gadbii lɛ na yɛ amɛwekui lɛ anaa akɛ amɛgbɛfaŋnɔ lɛ nɛ. Shikpɔŋ ni akɛhã Manasebii yɛ Bokãgbɛ lɛ 29 Mose hã Manasebii akutso lɛ fã kome amɛgbɛfaŋ shikpɔŋ koni etsɔ̃ akutso nɛɛ mli wekui lɛ anɔ. 30 Amɛshikpɔŋ lɛ kã shi kɛjɛ Mahanaim; ni shikpɔŋ nɛɛ kɔɔ Bashan shikpɔŋ tso muu lɛ fɛɛ, ni ji Bashan maŋtsɛ Og shikpɔŋ lɛ, kɛ Yair maji nyɔŋmai ekpaa lɛ fɛɛ ni yɔɔ Bashan shikpɔŋ lɛ nɔ lɛ, 31 kɛ Gilead shikpɔŋ lɛ fã kɛ agbɛnɛ Ashtarot kɛ Edrei, ni ji Bashan maŋtsɛ Og maŋtsɛyelihe lɛ mli maji wuji lɛ. Akɛ shikpɔŋ nɛɛ hã Manase bi Makir shwiei lɛ yɛ amɛwekui lɛ anaa akɛ Manasebii akutso lɛ fã lɛ gbɛfaŋ nɔ. 32 Belɛ nɛkɛ ji bɔ ni Mose ja Moab shikpɔŋ lɛ kɛ ŋã kplanaa ni yɔɔ Yordan lɛ sɛɛ, yɛ Yeriko bokãgbɛ lɛ, ehã Israelbii lɛ akɛ amɛgbɛfaŋnɔ lɛ. 33 Shi Levibii lɛ Mose hãaa amɛ shikpɔŋ lɛ eko. Amɛ lɛ afɔlei ni akɛbahãa Yehowa, Israel Nyɔŋmɔ lɛ, ji amɛgbɛfaŋnɔ ni amɛyɔɔ. Nakai ji bɔ ni Mose hã amɛnu shishi. |
Bible in Ga Language © Bible Society of Ghana, 2020.
Bible Society of Ghana