Yoshua 12 - ŊMALƐ KRƆŊKRƆŊ LƐ

Maŋtsɛmɛi ni Mose ye amɛnɔ kunim

¹ Israelbii lɛ ye maŋtsɛmɛi nɛɛ anɔ kunim, ni amɛŋɔ̃ amɛshikpɔŋ ni yɔɔ Yordan Jɔɔ lɛ mli kɛtee kooyigbɛ aahu kɛyanina Hermon Gɔŋ lɛ. Maŋtsɛmɛi nɛɛ ateŋ mɔ kome ji

² Sihon, Amorbii amaŋtsɛ lɛ ni hi shi yɛ Heshbon lɛ. Emaŋtsɛyeli shikpɔji lɛ ateŋ eko ji kɛjɛ Aroer (ni kã Yordan Jɔɔ shikpɔŋ lɛ naa lɛ) kɛmɔ Arnon Jɔɔ lɛ teŋ maŋ lɛ kɛyanina Yabok Faa lɛ ni ji Amonbii lɛ ahusu lɛ tɔ̃ɔ. Shikpɔŋ nɛɛ feɔ Gilead shikpɔŋ tso muu lɛ fã.

³ Maŋtsɛ Sihon nɛɛ nɔŋŋ shikpɔŋ ji Yordan Jɔɔ lɛ mli shikpɔŋ ni kã shi kɛjɛ Bet Yeshimot wuoyi (yɛ Galilea Kpaakpo lɛ bokãgbɛ) kɛyashwie Pisga Gɔŋ lɛ shishi lɛ.

⁴ Maŋtsɛ kome ko hu ji Bashan Maŋtsɛ Og. Hii oblaŋi gojogojoo ni shwɛ lɛ ateŋ eko ji lɛ. Eye emaŋtsɛ lɛ yɛ Ashtarot kɛ Edrei,

⁵ ni enɔyeli shikpɔji lɛ ekomɛi ji Hermon Gɔŋ lɛ kɛ Salka kɛ Bashan muu fɛɛ kɛyashi Geshurbii lɛ kɛ Maakatbii lɛ ahusui lɛ anaa. Lɛ nɔŋŋ eshikpɔŋ ji Gilead shikpɔŋ lɛ fã ni kã shi kɛyashi Heshbon maŋtsɛ Sihon husu lɛ naa lɛ.

⁶ Yehowa tsulɔ Mose kɛ Israelbii lɛ ye maŋtsɛmɛi enyɔ nɛɛ anɔ kunim, ni Mose kɛ maŋtsɛmɛi nɛɛ ashikpɔji lɛ hã Rubenbii lɛ kɛ Gadbii lɛ kɛ Manase akutso lɛ fã akɛ amɛnɔ.

Maŋtsɛmɛi ni Yoshua ye amɛnɔ kunim

⁷ Yoshua kɛ Israelbii lɛ ye shikpɔŋ lɛ nɔ maŋtsɛmɛi fɛɛ anɔ kunim; no ji maŋtsɛmɛi ni yɔɔ Yordan anaigbɛ kɛjɛ Baal-Gad, yɛ Lebanon Jɔɔ lɛ mli, kɛyanina Halak Gɔŋ lɛ, yɛ wuoyigbɛ yɛ Edom masɛi. Yoshua jara maŋtsɛmɛi nɛɛ ashikpɔji lɛ eha Israel akutsei lɛ akɛ amɛnɔ.

⁸ Shikpɔji ni ajara nɛɛ ekomɛi ji gɔji anɔ shikpɔŋ lɛ kɛ anaigbɛ gɔji lɛ ashishi shikpɔŋ kplanaa lɛ, kɛ Yordan Jɔɔ lɛ, ni ji wuoyigbɛ lɛ. Shikpɔŋ nɛɛ nɔ Hivbii lɛ kɛ Amorbii lɛ kɛ Kanaanbii lɛ kɛ Perizbii lɛ kɛ Hitbii lɛ kɛ Jebusbii lɛ hi.

⁹ Israelbii lɛ ye maŋtsɛmɛi ni agbɛii baa nɛɛ anɔ kunim: Yeriko maŋtsɛ kɛ Ai ni bɛŋkɛ Betel maŋtsɛ,

¹⁰ kɛ Yerusalɛm maŋtsɛ kɛ Hebron maŋtsɛ.

¹¹ Mɛi komɛi hu ji Yarmut maŋtsɛ kɛ Lakish maŋtsɛ,

¹² kɛ Eglon maŋtsɛ kɛ Gezer maŋtsɛ;

¹³ agbɛnɛ kɛ Debir maŋtsɛ kɛ Geder maŋtsɛ lɛ.

¹⁴ Maŋtsɛmɛi lɛ ekomɛi hu ji Horma maŋtsɛ kɛ Arad maŋtsɛ,

¹⁵ kɛ Libna maŋtsɛ, kɛ Adullam maŋtsɛ,

¹⁶ kɛ Makeda maŋtsɛ kɛ Betel maŋtsɛ,

¹⁷ kɛ Tapua maŋtsɛ kɛ Hefer maŋtsɛ.

¹⁸ Mɛi komɛi hu ji Afek maŋtsɛ kɛ Lasharon maŋtsɛ,

¹⁹ kɛ Madon maŋtsɛ kɛ Hazor maŋtsɛ,

²⁰ kɛ Shimron Meron maŋtsɛ kɛ Akshaf maŋtsɛ;

²¹ agbɛnɛ kɛ Taanak maŋtsɛ kɛ Megido maŋtsɛ,

²² kɛ Kedesh maŋtsɛ, kɛ Yokneam maŋtsɛ ni yɔɔ Karmel shishi lɛ,

²³ kɛ Dor maŋtsɛ ni hi Nafat Dor lɛ kɛ Goiim (ni yɔɔ Galilea lɛ) maŋtsɛ,

²⁴ kɛ Tirza maŋtsɛ. Maŋtsɛmɛi nɛɛ fɛɛ ayibɔ fee nyɔŋmai etɛ̃ kɛ ekome.