Yona 4 - ŊMALƐ KRƆŊKRƆŊ LƐ

Yona mli fu akɛ Nyɔŋmɔ ena mɔbɔ

¹ Nɔ ni Nyɔŋmɔ fee yɛ Ninevebii ahe lɛ eŋɔɔɔ Yona naa kwraa, ni efee lɛ mlifu tete.

² No hewɔ lɛ, esɔle, ni ekɛɛ akɛ, “Ao, Yehowa, ani jeee nɔ ni mikɛɛ be mli ni miyɔɔ mimaŋ lɛ eba mli nɛɛ? Enɛ hewɔ nɔŋŋ ni mijɛ mra mijo foi kɛmiiya Tarshish lɛ. Ejaakɛ mile akɛ bo lɛ, Nyɔŋmɔ durolɔ kɛ musuŋtsɔlɔ ji bo; omli fuuu mra, ni omɔbɔnalɛ fa, ni otsakeɔ oyiŋtoo yɛ toigbalamɔ he.

³ No hewɔ lɛ, agbɛnɛ, Yehowa, foo miwala nɔ ohã mi, ejaakɛ faŋ nɔ ni migbo moŋ fe nɔ ni mihiɛ kã nɛɛ.”

⁴ Yehowa bi Yona akɛ, “Kolɛ omli ni ewo la nɛɛ lɛ, eja bɛɛ?”

⁵ Sane nɛɛ sɛɛ lɛ Yona shi Nineve maŋ lɛ mli. Etee ni eyafee asese fioo ko yɛ maŋ lɛ bokãgbɛ, ni eho eta eshishi hɔ̃ɔŋ lɛ mli koni emɛ kɛyashi eeena nɔ ni baaba maŋ lɛ nɔ.

⁶ Yehowa hã adedeŋkruma ko kwɛ̃, ni eha Yona yiteŋ koni ehã lɛ hɔɔŋ koni efo ehehiamɔ lɛ sɛɛ ehã lɛ. Yona na adedeŋkruma lɛ he miishɛɛ naakpa.

⁷ Shi gbi lɛ nɔ jetsɛremɔ lɛ, Nyɔŋmɔ hã gɔgɔmi baye adedeŋkruma lɛ, ni egbe lɛ.

⁸ Ni be ni hulu te shi lɛ, Nyɔŋmɔ hã bokã kɔɔyɔɔ ko ni mli edɔ batswa, ni Yona tɔ biti yɛ hulu ni shã epampam lɛ naawalɛ hewɔ. Kɛkɛ ni Yona shwe gbele, ni ekɛɛ akɛ, “Faŋ nɔ ni migbo moŋ fe nɔ ni mihiɛ kã nɛɛ.”

⁹ Shi Nyɔŋmɔ kɛɛ Yona akɛ, “Kolɛ omli ni ewo la yɛ adedeŋkruma lɛ he nɛɛ lɛ, eja bɛɛ?” Yona here nɔ akɛ, “Eja gbɛ akɛ mimli awo la bɔ sɔŋŋ po ni kɛji gbele tete lɛ magbo.”

¹⁰ Kɛkɛ ni Yehowa kɛɛ Yona akɛ, “Adedeŋkruma lɛ ni gbi kome nyɔɔŋnyɔɔŋ kɛ jetsɛremɔ ni ekwɛ̃, asaŋ ni nyɔɔŋnyɔɔŋ kɛ jetsɛremɔ nɔŋŋ lɛ ehiɛ ekpãtã, tso ni ogboko ehe deŋme ko, ni jeee bo hu ohã ekwɛ̃ lɛ, esane miidɔ bo.

¹¹ Mɛɛba esaaa akɛ mi lɛ Nineve sane adɔ mi, maŋ kpeteŋkple nɛkɛ kɛ emli gbɔmɛi fe akpei oha kɛ nyɔŋmai enyɔ ni efeko efɔŋ ko kɛ emli toi kɛ tsinai babaoo hu lɛ?”