Yona 2 - ŊMALƐ KRƆŊKRƆŊ LƐ

Yona sɔlemɔ lɛ

¹ Yona yɛ ŋshɔŋloo lɛ musuŋ, kɛkɛ ni esɔle ekpa Yehowa eNyɔŋmɔ lɛ fai,

² ni ekɛɛ akɛ, “Mifimɔ lɛ mli lɛ, mibolɔ mitsɛ Yehowa, ni ehere mi nɔ; mibolɔ kɛjɛ gbohiiaje musuŋ tɔ̃ɔ, ni Yehowa, obo migbee toi.

³ Oshɛ mi ofɔ̃ bu kwɔŋkwɔŋ lɛ mli kɛtee ŋshɔ shishi tɔ̃ɔ, ni nu babaoo bɔle mihe kɛkpe; ni oshɔkei kɛ omlɛ̃mɛ̃i lɛ kumɔ shwie minɔ.

⁴ Misusu akɛ ashwie mi kɛje ohiɛ, ni te mafee tɛŋŋ mana oSɔlemɔ we krɔŋkrɔŋ lɛ ekoŋŋ lɛ?

⁵ Nu lɛ su mi, ni mitsui bɔ̃i suu; ŋshɔ lɛ su mi emuu, ni wosuma bla miyitso fɛɛ.

⁶ Mikpeleke shi kɛtee gɔji ashishitoo hei diɛŋtsɛ po, shikpɔŋ ni enaa agboi lɛ sa miyi kɛmiiya naanɔ lɛ. Shi Yehowa, miNyɔŋmɔ, ohere miyiwala kɛjɛ bu kwɔŋkwɔŋ lɛ mli.

⁷ Be ni misusuma tɔ biti yɛ mimli lɛ, mikai Yehowa, ni misɔle, ni onu misɔlemɔ lɛ yɛ oSɔlemɔ we krɔŋkrɔŋ lɛ mli.

⁸ Mɛi ni jaa yaka amãgãi lɛ, amɛyeee bo anɔkwa.

⁹ Shi mi lɛ, mala makafo bo, ni mashã afɔle mahã bo; shi ni miwo lɛ, maye nɔ. Yiwalaheremɔ lɛ, Yehowa dɛŋ ejɛɔ.”

¹⁰ Kɛkɛ ni Yehowa fã ŋshɔŋ loo lɛ, ni eyashwe Yona eŋmɛ shikpɔŋ.