Yohane 2 - ŊMALƐ KRƆŊKRƆŊ LƐ

Yookpeemɔ yɛ Kana

¹ Enɔ gbii etɛ̃ lɛ akpee yoo yɛ Kana yɛ Galilea; ni Yesu nyɛ yɛ jɛi.

² Ni akpee Yesu hu kɛ ekaselɔi lɛ kɛtee yookpeemɔ lɛ.

³ Ni be ni wain lɛ tã lɛ, Yesu nyɛ kɛɛ lɛ akɛ, “Amɛbɛ wain.”

⁴ Yesu kɛɛ lɛ akɛ, “Ohe sane mɛ ji no, Awo? Miŋmlɛtswaa lɛ shɛko.”

⁵ Enyɛ kɛɛ tsuji lɛ akɛ, “Nɔ fɛɛ nɔ ni eeekɛɛ nyɛ lɛ, nyɛfea.”

⁶ Ni tɛ botokui ekpaa mamɔ shi yɛ jɛi, yɛ Yudafoi lɛ ahetsuumɔ hewɔ, ekome yeɔ susumɔ gbɛi enyɔ loo etɛ̃.

⁷ Yesu kɛɛ amɛ akɛ, “Nyɛwoa botokui lɛ amli nu obɔ̃bɔ̃.” Ni amɛwo amɛ obɔ̃bɔ̃ɔbɔ̃.

⁸ Ni ekɛɛ amɛ akɛ, “Nyɛyɛa eko nyɛyahãa piafonyo lɛ.” Ni amɛyɛ kɛtee.

⁹ Shi be ni piafonyo lɛ sa enaa nu ni etsɔ̃ wain, ni eleee he ni jɛ, shi tsuji lɛ ni yɛ nu lɛ kɛkɛ le lɛ, etsɛ ayɛmforowu lɛ,

¹⁰ ni ekɛɛ lɛ akɛ, “Mɔ fɛɛ mɔ lɛ, wain kpakpa ekɛbamaa shi klɛŋklɛŋ, ni kɛ mɛi lɛ etɔrɔ lɛ, no dani ekɛ nɔ ni eŋɔɔɔ lɛ baa; shi bo lɛ okɛ wain kpakpa lɛ moŋ eto kɛbashi benɛ.”

¹¹ Enɛ Yesu fee yɛ Kana yɛ Galilea ekɛje ekadii ashishi ni ekɛ enunyam lɛ tsɔ̃ɔ, ni ekaselɔi lɛ he enɔ amɛye.

¹² Enɛ sɛɛ lɛ eyiŋ etee Kapernaum, lɛ kɛ enyɛ kɛ enyɛmimɛi kɛ ekaselɔi lɛ, shi amɛyeee gbii pii ko yɛ jɛi.

Yesu tsuu Sɔlemɔ we lɛ he

¹³ Agbɛnɛ Yudafoi lɛ aHehoo lɛ eshɛ etã, ni Yesu tee Yerusalɛm.

¹⁴ Ni eyana mɛi ni hɔ̃ɔ tsinai kɛ toi kɛ okpoi kɛ mɛi ni tsakeɔ shika hu tara shi yɛ amɛkpɔlɔ̃i ahe yɛ Sɔlemɔ we lɛ.

¹⁵ Ni ekɛ taŋkpei bibii fee kpelebii ni ekɛshwie amɛ fɛɛ kɛ toi kɛ tsinai lɛ kɛje Sɔlemɔ we lɛ, ni etsɔ̃ shikatsakelɔi lɛ ashika lɛ eshwie shi; ni etsirɛ okpɔlɔi lɛ etswia shi;

¹⁶ ni ekɛɛ mɛi ni hɔ̃ɔ okpoi lɛ akɛ, “Nyɛjiea nii nɛɛ kɛjea biɛ, nyɛkɛ miTsɛ we lɛ akafea jara nɔ.”

¹⁷ Shi ekaselɔi lɛ kai akɛ aŋma akɛ, “Owe lɛ he hiɛdɔɔ lɛ eye mi.”

¹⁸ Kɛkɛ ni Yudafoi lɛ bi lɛ akɛ, “Mɛɛ okadi okɛtsɔ̃ɔ wɔ akɛ oyɛ hegbɛ akɛ ofeɔ enɛɛmɛi nɛɛ?”

¹⁹ Yesu here nɔ ni ekɛɛ amɛ akɛ, “Nyɛkumɔa sɔlemɔtsu nɛɛ, ni gbii etɛ̃ mli lɛ mama ekoŋŋ.”

²⁰ Kɛkɛ lɛ Yudafoi lɛ kɛɛ, “Afii nyɔŋmai ejwɛ kɛ ekpaa akɛma Sɔlemɔtsu nɛɛ, ni bo lɛ gbii etɛ̃ okɛaama lo?”

²¹ Shi lɛ lɛ, egbɔmɔtso akɛ Sɔlemɔtsu lɛ he ewieɔ lɛ.

²² No hewɔ lɛ, be ni ete shi kɛjɛ gbohii ateŋ lɛ ekaselɔi lɛ kai akɛ ekɛɛ enɛ, ni amɛhe ŋmalɛ lɛ kɛ wiemɔ ni Yesu wie lɛ amɛye.

²³ Agbɛnɛ, be ni Yesu yɔɔ Yerusalɛm yɛ Hehoo Gbijurɔ lɛ mli lɛ, mɛi pii na okadii ni efee lɛ, ni amɛhe egbɛi lɛ nɔ amɛye.

²⁴ Shi Yesu diɛŋtsɛ lɛ ekɛ ehe efɔ̃ɔɔ amɛnɔ, ejaakɛ ele amɛ fɛɛ amɛsu.

²⁵ Ni ehe ehĩaaa akɛ mɔ ko aye gbɔmɔ he odase ahã lɛ, ejaakɛ lɛ diɛŋtsɛ ele nɔ ni yɔɔ gbɔmɔ tsui mli.