Yesaia 62 - ŊMALƐ KRƆŊKRƆŊ LƐ

¹ Zion hewɔ lɛ mimuaŋ minaa, ni Yerusalɛm hewɔ lɛ mijɔŋ mihe kɛyaashi bem ni eye lɛ aaaje kpo faŋŋ tamɔ leebi hulu, ni eyiwala ni ahere lɛ aaatso tamɔ kɔti.

² Jeŋ maji lɛ aaana obemyeli lɛ, ni maŋtsɛmɛi fɛɛ aaana onunyam; ni akɛ gbɛi hei ni Yehowa aaawo bo lɛ aaatsɛ bo.

³ Oootsɔ̃ tamɔ akekre fɛɛfɛo yɛ Yehowa dɛŋ; oootsɔ̃ tamɔ maŋtsɛ fai yɛ oNyɔŋmɔ lɛ dɛŋ.

⁴ Atsɛŋ bo “Mɔ ni akwa lɛ” dɔŋŋ; shi moŋ aaatsɛ bo “Mitsui naa gbɔmɔ”; ni aaatsɛ oshikpɔŋ lɛ hu “Kpeemɔ yoo”; ejaakɛ Yehowa ena ohe tsuijurɔ ni oshikpɔŋ lɛ hu aaakpee lɛ.

⁵ Ejaakɛ bɔ ni oblanyo kpeɔ oblayoo lɛ, nakai nɔŋŋ mɔ ni bɔ bo lɛ aaakpee bo; ni bɔ ni ayɛmforo wu nyaa ayɛmforo he lɛ, nakai oNyɔŋmɔ lɛ aaanya ohe.

⁶ Ao Yerusalɛm, mito bulɔi yɛ ogbogboi lɛ anɔ. Shwaneshwane kɛ nyɔɔŋnyɔɔŋ fɛɛ lɛ, amɛmuaŋ amɛnaa. Nyɛ mɛi ni nyɛkaiɔ Yehowa shiwoi lɛ, nyɛkajɔa nyɛhe;

⁷ ni nyɛkahãa ejɔa ehe kɛyashi beyinɔ ni eeehã Yerusalɛm ama shi, ni eeehã ena gbɛi yɛ shikpɔŋ muu lɛ fɛɛ nɔ.

⁸ Yehowa ewo ehewalɛ nine lɛ nɔ ekɛkã ehe kitã akɛ, “Anɔkwa, mikɛ obele lɛ haŋ ohenyɛlɔi amɛye dɔŋŋ, ni maŋsɛɛbii enuŋ owain ni ogbo he deŋme lɛ dɔŋŋ;

⁹ shi mɛi ni buaa naa woɔ aboŋo mli lɛ, amɛ amɛaaye, ni amɛaajie Yehowa yi; ni mɛi ni buaa wainyibii lɛ anaa kɛbaa shĩa lɛ, amɛ amɛaanu wain lɛ, yɛ mihe krɔŋkrɔŋ lɛ kpoi lɛ anɔ.”

¹⁰ Nyɛjea kpo, nyɛjea kpo nyɛtsɔa agboi lɛ amli; nyɛjea maŋ lɛ gbɛ lɛ nyɛtoa maŋbii lɛ. Nyɛsaa, nyɛsaa gbɛjegbɛ lɛ; nyɛkɔlɔa enɔ tɛi lɛ; nyɛshia aflaŋaa kɛtoa okadi nyɛhãa maŋbii lɛ.

¹¹ Naa, Yehowa eha ashiɛ kɛtee shikpɔŋ lɛ naagbeehe lɛ akɛ, Nyɛkɛa Zion bi yoo lɛ akɛ, “Naa, oyiwalaheremɔ lɛ miiba; naa, ehiɛ enyɔmɔwoo kɛmiiba, ni mɛi ni ekpɔ̃ amɛ lɛ nyiɛ ehiɛ kɛmiiba.”

¹² Ni ebaatsɛ amɛ akɛ “Maŋ Krɔŋkrɔŋ, Mɛi ni Yehowa ekpɔ̃ amɛ,” ni bo hu aaatsɛ bo, “Mɔ ni ataoɔ esɛɛgbɛ Maŋ ni akwaŋ lɛ dɔŋŋ.”