Yesaia 56 - ŊMALƐ KRƆŊKRƆŊ LƐ

Jeŋmaji fɛɛ baatsɔ̃ Nyɔŋmɔ bii

¹ Bɔ ni Yehowa kɛɛ nɛ, “Nyɛyea jalɛ sane, ni nyɛfea nɔ ni ja, ejaakɛ midɛŋ yiwalaheremɔ lɛ eshɛ shi etã, ni abaajie lɛ kpo atsɔ̃ɔ.

² Ajɔɔ gbɔmɔ adesa ni feɔ enɛ. No ji mɔ ni hiɛɔ mli kpɛŋŋ, ni eyeɔ hejɔɔmɔ gbi lɛ, ni ebuleee hejɔɔmɔ gbi lɛ ni ewiɔ ehe kɛjɛɔ efɔŋ he.”

³ Gbɔ ni kɛ ehe ebakpɛtɛ Yehowa lɛ ekakɛɛ akɛ, “Yehowa baajie mi yɛ emɛi lɛ ateŋ.” Osai hu akakɛɛ akɛ, “Naa, tso gbiŋ kɛkɛ ji mi, ni abuŋ mi ashiŋ Nyɔŋmɔ webii lɛ anɔ.”

⁴ Osaii ni yeɔ hejɔɔmɔ gbi lɛ, ni amɛfeɔ nii ni sa mihiɛ, ni amɛhiɛɔ mikpãŋmɔ lɛ mli tswɛ lɛ,

⁵ maha amɛna gbɛi yɛ miSɔlemɔ we lɛ kɛ mimaŋbii lɛ ateŋ, gbɛi ni hi fe bihii kɛ biyei. Maha amɛna gbɛi ni baahi shi kɛya naanɔ fɛɛ, ni agbeŋ kɔkɔɔkɔ.

⁶ Gbɔi ni kɛ amɛhe baakpɛtɛ Yehowa koni amɛsɔmɔ lɛ ni amɛsumɔ egbɛi lɛ, asaŋ koni amɛtsɔmɔ etsuji lɛ, mɛi fɛɛ ni toɔ hejɔɔmɔ gbi lɛ, ni amɛhiɛɔ mikpãŋmɔ lɛ mli kpɛŋŋ lɛ,

⁷ amɛ ji mɛi ni mikɛaaba Zion, ni ji migɔŋ krɔŋkrɔŋ lɛ nɔ, ni maha amɛnya yɛ miSɔlemɔ we lɛ. Amɛshãa afɔlei lɛ kɛ amɛfɔlei krokomɛi lɛ aaasa mihiɛ yɛ mifɔleshãa latɛ lɛ nɔ. Ejaakɛ aaatsɛ miwe lɛ akɛ gbɔmɛi fɛɛ aSɔlemɔ we.

⁸ Bɔ ni Yehowa Ofe mɔ ni kpala emaŋ Israel kɛjɛ nomŋɔɔ mli kɛku sɛɛ kɛba lɛ kɛɛ nɛ, “Masaa makpala mɛi krokomɛi kɛba kɛbafata mɛi ni mikpala kɛba momo lɛ ahe.”

Abu Israel Maŋhiɛnyiɛlɔi lɛ fɔ

⁹ Nyɛ ŋa nɔ kooloi kɛ nyɛ koo mli kooloi hu fɛɛ, nyɛbaa nyɛbayea nii!

¹⁰ Israel maŋhebulɔi lɛ eshwila; amɛleee nii. Gbei mumui ji amɛ; amɛnyɛɛɛ amɛbolɔ; amɛwieɔ yɛ wɔ mli; amɛkamɔɔ shi, ni amɛsumɔɔ wɔdɔiwɔɔ.

¹¹ Gbei fulɔi ni; amɛleee mitɔ! Nɛkɛ tookwɛlɔi ni ji maŋhiɛnyiɛlɔi nɛɛ lɛ hu, amɛbɛ jwɛŋmɔ; amɛ fɛɛ amɛkɔlɔ amɛgbɛ, mɔ fɛɛ mɔ miifo ekome enɔ mli.

¹² Amɛkɛɔ akɛ, “Nyɛbaa, nyɛhaa wɔwoa wain wɔmaa shi ni wɔnua bɔ ni wɔɔnyɛ. Wɔ hu baatamɔ ŋmɛnɛ, ni eeeteke nɔ po.”