Yesaia 4 - ŊMALƐ KRƆŊKRƆŊ LƐ

¹ Nakai be lɛ mli lɛ yei kpawo baamɔ nuu kome kɛ hiɛdɔɔ, ni amɛbaakɛɛ lɛ akɛ, “Wɔ diɛŋtsɛ wɔɔnyɛ wɔlɛ wɔhe, ni wɔ diɛŋtsɛ wɔɔnyɛ wɔhe mama wɔbu. Nɔ ni wɔtaoɔ kɛkɛ ji akɛ akɛ ogbɛi atsɛ wɔ koni okɛjie wɔhiɛgbele.”

Yerusalɛm baaba eblema ekoŋŋ

² Nakai be lɛ Yehowa tso nine lɛ baafee fɛo, ni ebaashwere, ni shikpɔŋ lɛ nɔ nibaanii aaafee shwãanɔ kɛ nyam ahã Israelbii ni eje hiɛkpãtãmɔ lɛ mli lɛ.

³ Ni mɔ fɛɛ mɔ ni baashwɛ yɛ Zion, ni eeehi shi yɛ Yerusalɛm lɛ aaatsɛ lɛ mɔ krɔŋkrɔŋ, mɔ fɛɛ mɔ ni aaaŋma egbɛi afata hiɛkãalɔi lɛ ahe yɛ Yerusalɛm lɛ,

⁴ Nuŋtsɔ lɛ hewalɛ naa lɛ ebaakojo ni ebaatsuu Israelbii ahe, ebaafɔ Yerusalɛm he muji lɛ kɛ lá shi ni ashwie yɛ jɛi lɛ.

⁵ Enɛ sɛɛ lɛ Yehowa baahã atatu aha Zion Gɔŋ lɛ kɛ asafoi ni yɔɔ jɛi anɔ shwane, ni gbɛkɛ lɛ ebaahã amɛ lasu ni kpɛɔ tamɔ la, ejaakɛ enunyam lɛ baaha amɛnɔ tamɔ agba.

⁶ Ebaatsɔ̃ hɔ̃ɔŋ shwane koni hulu akashã amɛ, ni eeefee abobaahe kɛ teemɔhe yɛ ahum kɛ nunɛmɔ mli.